Uyini UMtsetfo Weligolide?

Lokushiwo liBhayibheli

Emagama latsi “uMtsetfo Weligolide” awekho eBhayibhelini. Nobe kunjalo, bantfu labanyenti basebentisa lamagama nabakhuluma ngemtsetfo wekutiphatsa lowafundziswa nguJesu. ENshumayelweni yakhe ledvumile yaseNtsabeni, Jesu watsi: “Tonkhe tintfo lenifuna bantfu batente kini, nani tenteni kubo.” (Matewu 7:12; Lukha 6:31) UMtsetfo Weligolide uphindze ubekwe ngalendlela: “Yenta kulabanye njengobe ungafuna kwentiwe nakuwe.”—I-Encyclopedia of Philosophy.

• Usho kutsini uMtsetfo Weligolide?

• Yini leyenta uMtsetfo Weligolide ube lusito?

• UMtsetfo Weligolide ukhuluma ngaloko lesingakutfola kulabanye yini?

• Ungawusebentisa njani uMtsetfo Weligolide?

Usho kutsini uMtsetfo Weligolide?

UMtsetfo Weligolide usikhutsata kutsi siphatse labanye ngendlela lesingatsandza kutsi natsi basiphatse ngayo. Sibonelo nje, bantfu labanyenti bayatsandza kuphatfwa ngenhlonipho, ngemusa, nangelutsandvo. Ngendlela lefanako, natsi ‘asenteni kanjalo’ kulabanye.—Lukha 6:31.

Yini leyenta uMtsetfo Weligolide ube lusito?

UMtsetfo Weligolide usebenta kuto tonkhe timo. Sibonelo nje, ungasita . . .

• Ekuciniseni imishado.—Kubase-Efesu 5:28, 33.

• Ekucondziseni batali nabakhulisa bantfwana babo.—Kubase-Efesu 6:4.

• Ekutfutfukiseni buhlobo lobuhle emkhatsisini webangani, bomakhelwane, kanye nebantfu labasebenta ndzawonye.—Taga 3:27, 28; KubaseKholose 3:13.

Lokunyenti lokukhulunywa ngako eTestamenteni Lelidzala kuyafana nesimiso seMtsetfo Weligolide. LoMtsetfo Weligolide “nguloko lokushiwo nguMtsetfo [tincwadzi tekucala letisihlanu teliBhayibheli] nebaPhrofethi [tincwadzi tebaphrofethi].” (Matewu 7:12) Ngalamanye emagama, uMtsetfo Weligolide uneliciniso lelisisekelo lelitfolakala eTestamenteni Lelidzala: lokukutsandza makhelwane.—KubaseRoma 13:8-10.

UMtsetfo Weligolide ukhuluma ngaloko lesingakutfola kulabanye yini?

Cha. Ngalokuyinhloko, uMtsetfo Weligolide umayelana nekupha. Jesu nakasho loMtsetfo Weligolide, bekangakhulumi ngendlela yekuphatsa bantfu nje kuphela kodvwa nangendlela yekuphatsa titsa tetfu. (Lukha 6:27-31, 35) Ngako loMtsetfo Weligolide ukhutsata bantfu kutsi baphatsane kahle.

Ungawusebentisa njani uMtsetfo Weligolide?

1. 1. Naka. Banake bantfu losondzelene nabo. Sibonelo saloko, ungahle ubone umuntfu aphetse kabi, uve kutsi makhelwane ulaliswe esibhedlela, nobe ubone losebenta naye akhatsatekile. ‘Nawungaticabangeli wena kuphela . . . ucabangela nalabanye,’ utawutfola ematfuba ekusho nobe ekwenta tintfo letingabasita.—KubaseFiliphi 2:4.

2. 2. Bani neluvelo. Tifake eticatfulweni talomunye umuntfu. Bewungativa njani nawungaba sesimweni lakuso? (KubaseRoma 12:15) Nawungetama kucondza indlela labanye labativa ngayo, kutawuba melula kutsi ubasite.

3. 3. Vumelana netimo. Hlale ukhumbula kutsi bantfu abafani. Loko lomunye langatsandza kutsi kwentiwe kuye kungenteka kwehlukile kuloko wena longatsandza kwentiwe kuwe. Ngako-ke, kuko konkhe longatsandza kukwenta, yetama kukhetsa loko lokutojabulisa loyo muntfu.—1 KubaseKhorinte 10:24.