Khonta Nkulunkulu Wenkhululeko

“Kutsandza Nkulunkulu kugcina imiyalo yakhe. Imiyalo yaNkulunkulu ayimatima kitsi.”—1 JOH. 5:3.

UNGAPHENDVULA?

Sathane wetama njani kwenta imitsetfo yaNkulunkulu ibonakale ingumtfwalo?

Kungani kufanele sinake kakhulu kutsi sitihlanganisa nabobani?

Yini lengasisita kutsi sihlale sicotfo kuNkulunkulu wenkhululeko?

1. Jehova uyisebentisa njani inkhululeko yakhe, futsi wakukhombisa njani loko kubo-Adamu na-Eva?

JEHOVA nguye kuphela Umuntfu lonenkhululeko lengapheli. Nobe kunjalo, akayisebentisi kabi lenkhululeko yakhe ngekutsi alawule tinceku takhe kutsi tente loko lokufunwa nguye. Esikhundleni saloko, utinike inkhululeko yekutikhetsela, letivumela kutsi titentele tincumo tiphindze tenetise tifiso tato letinhle. Sibonelo saloko kutsi Nkulunkulu wanika bo-Adamu na-Eva umyalo munye wekungadli “sitselo sesihlahla sekwati lokulungile nalokungakalungi.” (Gen. 2:17) Ngako-ke, bebanenkhululeko lenyenti futsi bebangakhona kwenta intsandvo yeMdali wabo.

2. Kungani batali betfu bekucala balahlekelwa yinkhululeko levela kuNkulunkulu?

² Kungani Nkulunkulu anika batali betfu bekucala inkhululeko lengaka? Kungobe wabenta ngemfanekiso wakhe futsi baba nanembeza, kungaleso sizatfu abelindzele kutsi lutsandvo labanalo ngaye njengeMdali wabo lubacondzise etintfweni letilungile. (Gen. 1:27; Rom. 2:15) Lokubuhlungu kutsi bo-Adamu na-Eva behluleka kubonga uMniki Wekuphila kwabo ngenkhululeko labanika yona. Esikhundleni saloko bakhetsa inkhululeko yaSathane, lebeyivumela kutiphatsa lokubi. Kunekutsi batfole inkhululeko, batali betfu bekucala batitsengisa bona kanye natsi ebugcilini besono, lokwaba nemiphumela lebuhlungu.—Rom. 5:12.

3, 4. Sathane wetama njani kusenta kutsi singatilaleli timiso taJehova?

³ Nangabe Sathane akhona kudukisa bantfu labete sono netidalwa temoya letinyenti kutsi bangavumi kubuswa nguNkulunkulu, angasidukisa natsi. Emachinga akhe awakashintji. Wetama kusidukisa ngekusenta sicabange kutsi timiso taNkulunkulu tingumtfwalo futsi tisicedzela injabulo. (1 Joh. 5:3) Umcabango lonjalo ungaba nemandla nangabe sichubeka sitihlanganisa nebantfu labanjalo. Lomunye dzadze loneminyaka lengu-24 budzala lowake watiphatsa kabi ngekwelicasi utsi: “Kutihlanganisa nebangani lababi kwangishintja kakhulu ngobe bengesaba kuba nembono lowehlukile kunewabo.” Kungenteka kutsi nawe usesimeni lesifananako sekucindzetelwa bontsanga yakho.

⁴ Lokubuhlungu kutsi ngaletinye tikhatsi kucindzetelwa bontsanga kungavela ngisho nasebandleni lebuKhristu. Lomunye umzalwane losemusha watsi: “Bengati labanye labasebasha labangemaKhristu labebatsandzana nebantfu labangakholwa. Njengobe ngangichubeka ngitihlanganisa nabo, nami ngagcina sengifanana nabo. Buhlobo bami naJehova babasengotini. Besengingasakujabuleli kuya emihlanganweni yebuKhristu ngisho nasensimini. Loko kwangenta ngabona kutsi kufanele ngitehlukanise nabo, futsi ngenta njalo.” Uyacaphela yini kutsi bangani bakho bangayishintja imphilo yakho? Ase ucabange ngesibonelo lesiseBhayibhelini lesisebentako lamuhla.—Rom. 15:4.

WEBA TINHLITIYO TAWO

5, 6. Absalomu wabadukisa njani labanye bantfu, futsi laphumelela yini lichinga lakhe?

⁵ LiBhayibheli likhuluma ngebantfu labanyenti labebatibonelo letimbi kulabanye. Sibonelo sekucala ngu-Absalomu, indvodzana yeNkhosi Davide. Absalomu abelijaha lelihle. Kodvwa njengaSathane, wavumela sifiso sebugovu sakhela enhlitiyweni yakhe, ngobe wacala kufuna sihlalo sebukhosi sababe wakhe labekete lilungelo lekusitfola.a Absalomu wasebentisa bucili kute abe yinkhosi. Wenta shengatsi unendzaba nema-Israyeli akubo ngobe afuna acabange kutsi inkhosi ayiwanaki. Absalomu wenta shengatsi usekela babe wakhe kodvwa abe akhuluma kabi ngaye, njengobe kwenta Develi ensimini yase-Edeni.—2 Sam. 15:1-5.

⁶ Laphumelela yini lichinga la-Absalomu? Kulokunye laphumelela, ngobe liBhayibheli litsi: “Wateba tonkhe tinhlitiyo temadvodza aka-Israyeli.” (2 Sam. 15:6) Nobe akwati kwenta njalo, kodvwa akazange aphumelele kuko konkhe. Lokubuhlungu kutsi wagcine afile akanye netinkhulungwane tebantfu lebetimsekela.—2 Sam. 18:7, 14-17.

7. Ngutiphi tifundvo lesititfola endzabeni ya-Absalomu? (Buka sitfombe lesisekhasini 14.)

⁷ Kungani lama-Israyeli adukiswa melula kangaka? Kungenta kutsi abefuna letintfo Absalomu lawatsembisa tona. Nobe kungenta kutsi ayengwa kubukeka kwakhe. Kunobe ngukuphi, singaciniseka ngekutsi abengaketsembeki kuJehova nasenkhosini yakhe. Lamuhla, Sathane uyachubeka asebentisa “bo-Absalomu” kute adukise tinhlitiyo tetinceku taJehova. Bangase batsi:‘Timiso taJehova tiyacindzetela. Ase ubuke labo labangamkhonti Jehova kutsi bajabula kangakanani.’ Utalibona yini lelo chinga bese uhlala ucotfo kuNkulunkulu? Utawucaphela yini kutsi ‘umtsetfo waJehova lophelele,’ lokungumtsetfo waKhristu ungakuholela enkhululekweni sibili? (Jak. 1:25) Nangabe kunjalo, wutsandze lomtsetfo futsi ungavumeli lutfo lukwente uyisebentise kabi lenkhululeko yakho yebuKhristu.—Fundza 1 Phetro 2:16.

8. Ngukuphi lokwenteke kulabanye lokuveta kutsi kungalaleli timiso taJehova akuyiletsi injabulo?

⁸ Sathane ufuna kudukisa bantfu labasebasha. Naku lokwashiwo ngumzalwane loseminyakeni yabo-30 budzala ngaloko lokwenteka ebusheni bakhe: “Bengitsatsa timiso taJehova tekutiphatsa njengaleto leticindzetelako hhayi letisivikelo.” Umphumela waba kutsi lomzalwane atiphatse kabi ngekwelicasi futsi loko akuzange kumletsele injabulo. Utsi: “Ngatisola futsi ngeva buhlungu iminyaka leminyenti.” Lomunye dzadze akhumbula ebusheni bakhe wabhala watsi: “Ngemuva kwekutiphatsa kabi ngekwelicasi, uva buhlungu lobukhulu nekutisola. Ngisho nanyalo njengobe sekwendlule iminyaka lengu-19, ngihle ngikukhumbula loko lokwenteka.” Lomunye dzadze watsi: “Kucabanga nje ngekutsi kutiphatsa kwami kwalimata bantfu lengibatsandza kakhulu kwaba nemiphumela lemibi kakhulu kimi, bekungivisa buhlungu futsi kuphatamise buhlobo bami naJehova. Kubuhlungu kuphila wati kutsi ute umusa waJehova.” Sathane akafuni ucabange ngemiphumela lenjalo yesono.

9. (a) Ngumiphi imibuto lengasisita sihlolisise imibono yetfu ngaJehova nemitsetfo yakhe nangetimiso takhe? (b) Kungani kubalulekile kwati Nkulunkulu kancono?

⁹ Kuvisa buhlungu kutsi labanyenti labasebasha nalasebakhulile bafundze kabuhlungu kutsi kujabula esonweni kuba nemiphumela lebuhlungu. (Gal. 6:7, 8) Ngako-ke, tibute: ‘Ngiyawabona yini emachinga aSathane lanelunya? Jehova ngimtsatsa njengeMngani wami losedvute yini lohlale angitjela liciniso futsi longifunela lokuncono? Ngiyaciniseka yini ngekutsi angeke angigodlele lokuhle lokutangiletsela injabulo?’ (Fundza Isaya 48:17, 18.) Kute uphendvule lemibuto ngayebo losuka enhlitiyweni, udzinga lokungetulu kwekumane ube nelwati loluncane ngaJehova. Kufanele umati njengemngani, wati nekutsi imitsetfo netimiso letiseBhayibhelini tiveta kutsi uyakutsandza hhayi kutsi unesifiso sekukucedzela inkhululeko.—Hla. 25:14.

THANTAZELA INHLITIYO LENEKUHLAKANIPHA NALELALELAKO

10. Kungani kufanele sitimisele kulingisa iNkhosi Solomoni ngalesikhatsi iselijaha?

¹⁰ Ngesikhatsi aselijaha, Solomoni wathantaza ngekutitfoba: “Kodvwa mine ngisengumfanyana nje, ngimncane, angati nekwati kutsi ngitawenta kanjani umsebenti wami.” Ngako wathantazela kuba nenhlitiyo lenekuhlakanipha nalelalelako. (1 Khos. 3:7-9, 12) Jehova wasiphendvula lesicelo sakhe lesicotfo, futsi angenta lokufananako nakuwe ngisho nobe umncane nobe umdzala. Kuliciniso kutsi Jehova angeke akunike lwati kanye nekuhlakanipha ngalokusimangaliso. Kodvwa utakwenta uhlakaniphe nangabe ufundza liVi lakhe ngekutimisela, uthantazele umoya longcwele futsi ukusebentise loko lakufundzisa kona ebandleni lebuKhristu. (Jak. 1:5) Ngako-ke, asebentisa letindlela, Jehova wenta ngisho netinceku takhe letisetinsha kutsi tihlakaniphe kwendlula labo labangasilaleli seluleko sakhe, ngisho nalabo lokutsiwa “tati netihlakaniphi” talelive.—Luk. 10:21; fundza Tihlabelelo 119:98-100.

11-13. (a) Ngutiphi tifundvo letibalulekile lesingatitfola kuTihlabelelo 26:4, kuTaga 13:20 naku-1 Khorinte 15:33? (b) Ungatisebentisa njani letimiso letikulemiBhalo?

¹¹ Kute sichaze kubaluleka kwekufundza liBhayibheli nekuzindla ngaloko lesikufundzako futsi sati Jehova njengemngani, ase sihlole lemibhalo lelandzelako. Ngamunye wayo unesimiso lesibalulekile lesimayelana nekukhetsa bangani betfu: “Angihambisani nebantfu bemanga, futsi anginabudlelwane nebatentisi.” (Hla. 26:4) “Lohambisana nebantfu labahlakaniphile naye ugcina asahlakaniphile; kodvwa umngani wetilima uyawuhlupheka.” (Taga 13:20) “Bangani lababi bonakalisa similo lesihle.”—1 Khor. 15:33.

¹² Ngutiphi tifundvo letibalulekile lesingatitfola kulamavesi? (1) Jehova ufuna sibakhetse kahle bangani betfu. Ufuna kusivikela ekutiphatseni kanye nasebuhlotjeni betfu naye. (2) Bantfu lesitihlanganisa nabo bangasenta sente tintfo letinhle nobe letimbi, futsi loko siyakubona kwenteka ekuphileni. Indlela lamavesi langenhla labekwe ngayo, ikhombisa kutsi Jehova uncenga tinhlitiyo tetfu. Njani? Caphela kutsi lamavesi awakabhalwa aba yimitsetfo, njengekutsi “akukafaneli u . . ,” kodvwa abhalwe aba nemavi lacondzile lamaciniso lasisekelo. Kuba shengatsi Jehova utsi: ‘Nankha emaciniso. Utawenta njani ngawo? Yini lesenhlitiyweni yakho?’

¹³ Ngesizatfu sekutsi lamavesi lamatsatfu abhalwe ngendlela lecondzile futsi angemaciniso lasisekelo, awaphelelwa sikhatsi futsi asebenta etimeni letehlukehlukene. Kute sifananise, ase utibute imibuto lefanana nalena: Ngingakubalekela njani kutihlanganisa nebantfu ‘labatentisako’? Kunini lapho ngingatikhandza ngitihlanganise nebantfu labanjalo? (Taga 3:32; 6:12) Bobani ‘bantfu labahlakaniphile’ Jehova lafuna ngitihlanganise nabo? Bobani ‘labatilima’ lokufanele ngibabalekele? (Hla. 111:10; 112:1; Taga 1:7) Ngusiphi “similo lesihle” lengitawusona ngekutihlanganisa nebantfu lababi? Ngingabatfola kulelive lelibi kuphela yini bangani lababi? (2 Phet. 2:1-3) Ungayiphendvula njani lemibuto?

14. Ningakutfutfukisa njani Kukhonta kwenu Kwemndeni kwakusihlwa?

¹⁴ Njengobe sesihlole lemiBhalo, kungani ungahlolisisi lamanye emavesi laseBhayibhelini laveta imibono yaNkulunkulu ngaloko lokutsintsa wena nemndeni wakho?b Batali, cocani ngetihloko letifanana naleti eKukhonteni Kwemndeni kwakusihlwa. Njengobe nenta njalo, khumbulani kutsi umgomo wenu kusita lilunga ngalinye lemndeni kutsi libonge ngekujula kwelutsandvo lwaNkulunkulu ngatsi, njengobe lubonakala emitsetfweni nasetimisweni takhe. (Hla. 119:72) Ngako-ke, kufundza ngalendlela kutawenta emalunga emndeni asondzele kuJehova aphindze asondzelane.

15. Ungabona njani kutsi sewuba nenhlitiyo lehlakaniphile nalelalelako?

¹⁵ Ungabona njani kutsi sewuba nenhlitiyo lehlakaniphile nalelalelako? Lenye indlela kucatsanisa indlela wena locabanga ngayo neyalabo basendvulo labetsembekile, labafaka ekhatsi iNkhosi Davide leyabhala: “Yebo, Nkulunkulu wami, kujabula kwami kusekwenteni intsandvo yakho, imiyalo yakho isenhlitiyweni yami.” (Hla. 40:8) Ngendlela lefananako, nembhali weTihlabelelo 119 watsi: “Maye, ngiyawutsandza umtsetfo wakho! Ngizindla ngawo imini yonkhe.” (Hla. 119:97) Lutsandvo lolunjalo alumane nje lutivelele. Kunaloko, luba ngumphumela wekulifundza njalo liBhayibheli, kuthantaza, kuzindla nekubona tibusiso letinyenti letitfolakala ngekulalela timiso taNkulunkulu.—Hla. 34:8.

YILWELE INKHULULEKO YAKHO YEBUKHRISTU

16. Yini lokufanele siyikhumbule nangabe sifuna kuncoba imphi yetfu yekulwela inkhululeko sibili?

¹⁶ Kusukela endvulo, tive betiya emphini kute tilwele inkhululeko. Ngendlela lefananako, nawe kufanele utimisele kulwela inkhululeko yakho yebuKhristu. Khumbula kutsi titsa takho akusuyeSathane nelive lakhe nobe umoya walo lomubi kuphela. Kufanele ulwe nesono lonaso lokufaka ekhatsi inhlitiyo leyengako. (Jer. 17:9; Ef. 2:3) Nobe kunjalo, ungakwati kuyincoba lemphi ngelusito lwaJehova. Imphi ngayinye loyincobako—nobe iyinkhulu nobe iyincane—itawuba nemiphumela lemibili lemihle. Wekucala, utawujabulisa inhlitiyo yaJehova. (Taga 27:11) Wesibili, utawutimisela kuhlala ‘endleleni lencane’ leholela ekuphileni lokuphakadze njengobe ubona emandla ‘emtsetfo waNkulunkulu lophelele losikhululako.’ Ngesikhatsi lesifanele, utawujabulela inkhululeko lenkhulu Jehova layibekele labacotfo bakhe.—Jak. 1:25; Mat. 7:13, 14.

17. Kungani kungakafaneli siphatseke kabi ngemaphutsa lesiwentako, futsi nguluphi lusito Jehova lasiniketa lona?

¹⁷ Kuliciniso kutsi sonkhe siyawenta emaphutsa ngaletinye tikhatsi. (Shu. 7:20) Nakwenteka loko, ungaphelelwa ngemandla nobe utibone ungakabaluleki. Nangabe uwa, vuka uchubekele embili—ngisho nobe loko kungadzinga kutsi ufune lusito lwalabadzala. Jakobe wabhala: “Umthandazo [wabo] wekukholwa uyawumphilisa logulako, iNkhosi imvuse, nome entile tono uyawutsetselelwa tona.” (Jak. 5:15) Ungakhohlwa kutsi Nkulunkulu unemusa futsi wakudvonsela ebandleni ngobe abona lokuhle kuwe. (Fundza Tihlabelelo 103:8, 9.) Ngako-ke, nangabe uchubeka wetsembele kuJehova, angeke akushiye.—1 Khr. 28:9.

18. Singatiphatsa njani ngekuvumelana nemthantazo waJesu lokuJohane 17:15?

¹⁸ Ngebusuku bakhe bekugcina anebaphostoli bakhe labetsembekile labangu-11, Jesu wabathantazela washo lamavi lesingeke siwakhohlwe: “Ubalondvolote bangatfunjwa nguLomubi.” (Joh. 17:15) Jesu abengacabangi ngebaphostoli bakhe kuphela, kodvwa nangabo bonkhe balandzeli bakhe. Singaciniseka ngekutsi Jehova utawuphendvula umthantazo waJesu ngekutsi asilondvolote kulamalanga ekugcina lamatima kakhulu. Jehova ‘ulihawu kulabo labatiphatsa ngekwetsembeka. . . . Agadze indlela yalabangcwele bakhe.’ (Taga 2:7, 8) Kuphila lokucotfo kunetinsayeya letinyenti, kodvwa kuholela ekuphileni lokuphakadze nasenkhululekweni sibili. (Rom. 8:21) Ungavumeli nobe ngubani akuyekelise lendlela yekuphila.

[Imibhalo lengentansi]

[Titfombe ekhasini 14]

Singababona njani bo-Absalomu balamuhla futsi singativikela njani kubo?