Umsebenti Wekuniketa Lusito

1, 2. (a) Ngubuphi bumatima emaKhristu aseJudiya lahlangabetana nabo? (b) EmaKhristu aseJudiya aboniswa njani lutsandvo?

BEKUCISHE kube ngu-46 C.E., futsi iJudiya beyihlaselwe yindlala. Bafundzi baKhristu labangemaJuda lebebahlala lapho bebete ngisho nemali yekutsenga kudla lokuncane lebekubita kakhulu ngaleso sikhatsi. Bebete kudla, futsi bekubonakala ebusweni kutsi balambile. Nanobe kunjalo, bebatawubona kusekelwa nguJehova ngendlela bafundzi baKhristu lebebangakake bayibone. Yini lebeseyitawenteka?

² Ngenca yekutsi bewabona kuhlupheka kwemaKhristu langemaJuda lahlala eJerusalema naseJudiya, emaKhristu langemaJuda neweTive lahlala e-Antiyokhi naseSiriya, ahlanganisa imali kute ayitfumelele labazalwane. Ngemuva kwaloko, akhetsa bazalwane lababili labafanelekako, boBhanabasi naSawula kutsi bahambise lemali kulabadzala belibandla laseJerusalema. (Fundza Imisebenti 11:27-30; 12:25.) Ase ucabange indlela bazalwane labaseJudiya labeswele labajabula ngayo ngelutsandvo lababoniswa lona bazalwane base-Antiyokhi.

3. (a) Bantfu baNkulunkulu balamuhla basilandzela njani sibonelo lesasibekelwa ngemaKhristu ase-Antiyokhi? Shano sibonelo. (Fundza nelibhokisi lelitsi “Umsebenti Wetfu Lomkhulu Wekucala, Wekuniketa Lusito Lamuhla.”) (b) Ngumiphi imibuto lesitawucoca ngayo kulesehluko?

³ Loko lokwenteka ngesikhatsi sebaphostoli, bekusento sekucala lesibhalwe eBhayibhelini semaKhristu labehlala kulenye incenye yemhlaba latfumelela lamanye emaKhristu labehlala kulenye indzawo lusito. Nalamuhla, silingisa lesibonelo lesasibekelwa bazalwane betfu base-Antiyokhi. Nasiva kutsi labo lesikholwa nabo labahlala kulenye indzawo bavelelwe yinhlekelele nobe tinkinga, siyabasita.a Kute sibone kutsi umsebenti wetfu wekuniketa lusito uhlobene nemisebenti yetfu yebuKhristu, ase sicoce ngemibuto lemitsatfu lemayelana nemsebenti wekuniketa lusito: Yini lesenta sitsatse umsebenti wekuniketa lusito njengalobalulekile? Iyini injongo yemsebenti wetfu wekuniketa lusito? Sizuza njani emsebentini wekuniketa lusito?

Lokwenta Kuniketa Lusito Kube ‘Ngumsebenti Longcwele’

4. Yini Pawula layitjela baseKhorinte mayelana nemsebenti wemaKhristu?

⁴ Encwadzini yakhe yesibili layibhalela libandla laseKhorinte, Pawula wachaza kutsi emaKhristu anemisebenti lemibili. Nanobe lencwadzi Pawula abeyibhalele emaKhristu lagcotjiwe, lamuhla, lamavi akhe asebenta ‘nakuletinye timvu’ taKhristu. (Joh. 10:16) Incenye yekucala yemsebenti wetfu ‘ngumsebenti wekubuyisana,’ lokungumsebenti wekushumayela newekufundzisa. (2 Khor. 5:18-20; 1 Thim. 2:3-6) Lena lenye incenye ifaka ekhatsi umsebenti lesiwentela emakholwa lesikanye nawo. Kuloku, Pawula abekhuluma ‘ngemsebenti wekusita.’ (2 Khor. 8:4) Lamavi latsi ‘umsebenti wekubuyisana’ nalatsi ‘umsebenti wekusita’ ahumusha ligama lesiGriki lelitsi di·a·ko·niʹa. Kungani loko kubalulekile?

5. Kungani kuphawuleka kutsi Pawula watsi umsebenti wekuniketa lusito ubalulekile?

⁵ Ngekutsi asebentise leligama linye lesiGriki kulemisebenti lemibili, Pawula bekahlobanisa umsebenti wekuniketa lusito naleminye imisebenti lebeyentiwa ebandleni lebuKhristu. Ngaphambilini bekatsite: “Kunetinkonzo letehlukahlukene letentiwako, kodvwa iNkhosi yinye; futsi kunetinhlobo letehlukahlukene temisebenti, . . . Kepha yonkhe lemisebenti yentiwa ngumoya munye.” (1 Khor. 12:4-6, 11) Ecinisweni, Pawula abefananisa imisebenti leyehlukahlukene leyentiwa ebandleni ‘nemsebenti longcwele.’b (Rom. 12:1, 6-8) Kungaleso sizatfu abona kufanele kutsi asebentise lesinye sikhatsi sakhe kuze ‘asite labangcwele.’​—Rom. 15:25, 26.

6. (a) Njengobe Pawula achaza, yini leyenta umsebenti wekuniketa lusito ube yincenye yekukhonta kwetfu? (b) Chaza kutsi umsebenti wetfu wekuniketa lusito wentiwa njani emhlabeni wonkhe lamuhla. (Fundza libhokisi lelitsi “Nakugadla Inhlekelele!” likhasi 214.)

⁶ Pawula wasita baseKhorinte babona kutsi kungani kuniketa lusito bewuyincenye yemsebenti labawentela Jehova kanye nekumkhonta. Ase unake lamavi akhe: EmaKhristu lasita labanye, enta njalo ngobe ‘alalela tindzaba letimnandzi latimemetelako, letimayelana naKhristu.’ (2 Khor. 9:13) Ngenca yesifiso sawo sekusebentisa timfundziso taKhristu, emaKhristu asita emakholwa lakanye nawo. Pawula watsi imisebenti yemusa emaKhristu layentela labanye bazalwane, ikubonakaliswa ‘kwemusa waNkulunkulu lomkhulu.’ (2 Khor. 9:14; 1 Phet. 4:10) Ngesikhatsi sikhuluma ngekusita bazalwane betfu labeswele, lokufaka ekhatsi nemsebenti wekuniketa lusito, Sicongosekulindza saDecember 1, 1975, satsi: “Akukafaneli singabate kutsi Jehova Nkulunkulu neNdvodzana yakhe, Jesu Khristu, bawutsatsa njengalobaluleke kakhulu lomsebenti.” Kuyacaca kutsi umsebenti wekuniketa lusito ungumsebenti longcwele.​—Rom. 12:1, 7; 2 Khor. 8:7; Heb. 13:16.

Umsebenti Wekuniketa Lusito Lonetinjongo Leticacile

7, 8. Nguyiphi injongo yekucala yemsebenti wetfu wekuniketa lusito? Chaza.

⁷ Tiyini tinjongo temsebenti wetfu wekuniketa lusito? Pawula waphendvula lombuto encwadzini yakhe yesibili layibhalela baseKhorinte. (Fundza 2 Khorinte 9:11-15.) Kulamavesi, Pawula ugcizelela tinjongo letintsatfu nobe imigomo lesiyitfolako nasihlanganyela ‘kulomsebenti lesiwentela labanye,’ lokungumsebenti wekuniketa lusito. Ase sicoce ngaletinjongo letintsatfu.

⁸ Yekucala, umsebenti wetfu wekusita labanye ukhatimulisa Jehova. Phawula kutsi kulamavesi lasihlanu lacashunwe ngenhla, Pawula ucondzisa bazalwane bakhe kuJehova Nkulunkulu tikhatsi letinyenti. Lomphostoli ubakhumbuta ‘ngekubonga Nkulunkulu’ ‘nangekubonga Nkulunkulu ngalokuphuphumako.’ (Emavesi 11, 12) Uchaza indlela imetamo yekuniketa lusito leyenta emaKhristu ‘akhatimulise Nkulunkulu’ futsi advumise ‘umusa waNkulunkulu lomkhulu.’ (Emavesi 13, 14) Pawula uphindze aphetse loko labecoca ngako ngemsebenti wekuniketa lusito ngalamavi latsi: “Akabongwe Nkulunkulu.”​—Livesi 15; 1 Phet. 4:11.

9. Umsebenti wekuniketa lusito ungasishintja njani simo sengcondvo? Shano sibonelo.

⁹ NjengaPawula, tinceku taNkulunkulu talamuhla titsatsa umsebenti wekuniketa labanye lusito njengelitfuba lekukhatimulisa Jehova nekuhlobisa timfundziso takhe. (1 Khor. 10:31; Thit. 2:10) Ecinisweni, umsebenti wekuniketa lusito uvame kudlala indzima lenkhulu ekucedzeni imibono leliphutsa labanye bantfu labanayo ngaJehova nangaBoFakazi bakhe. Nasi sibonelo: Lomunye lomsikati lohlala endzaweni leyahlaselwa siphepho wabeka luphawu emnyango wakhe, lobelutsi: “BoFakazi BaJehova​—Kufanele Bangangeni.” Ngalelinye lilanga wabona tisebenti letiniketa lusito tilungisa indlu leyonakele lebeyingesheya kwesitaladi. Kwendlula emalanga solo abuka letisebenti letinebungani, ngako waya kuto kute atfole kutsi tibobani. Nakeva kutsi lamavolontiya aBoFakazi BaJehova, wamangala wase utsi: “Bengihlale nginembono loliphutsa ngani.” Kwaba namiphi imiphumela? Wasusa loluphawu emnyango wakhe.

10, 11. (a) Ngutiphi tibonelo letikhombisa kutsi siyayifeza injongo yesibili yemsebenti wetfu wekuniketa lusito? (b) Nguyiphi incwadzi lesita tisebenti letiniketa lusito? (Fundza libhokisi lelitsi “Lelinye Lithulusi Letisebenti Letiniketa Lusito.”)

¹⁰ Yesibili, ‘sitinakekela kahle tidzingo’ temakholwa lesikanye nawo. (2 Khor. 9:12a) Sitimisele kunakekela tidzingo futsi sinciphise tinkinga tebazalwane kanye nabodzadzewetfu labadzinga lusito. Kungani senta njalo? Kungenca yekutsi emalunga elibandla lebuKhristu akha ‘umtimba munye,’ futsi “nangabe kuhlupheka sitfo sinye, kuhlupheka titfo tonkhe kanye naso.” (1 Khor. 12:20, 26) Ngaleso sizatfu, lutsandvo lwebuzalwane kanye neluvelo lwenta bazalwane kanye nabodzadze labanyenti lamuhla bashiye konkhe labakwentako ngekushesha, batsatse emathulusi abo bese baya lapho kwenteke inhlekelele khona kute basite emakholwa labakanye nawo. (Jak. 2:15, 16) Sibonelo saloko kutsi ngemuva kwekugadla kwe-tsunami eJapan nga-2011, lihhovisi leligatja laseMelika latfumelela emaKomidi Ekwakhiwa KwemaHholwa EMbuso laseMelika tincwadzi, acela kutsi “bazalwane labambalwa labafanelekako” basite ekwakheni kabusha emaHholwa eMbuso eJapan. Yini leyentiwa ngulabazalwane? Ngemaviki nje lambalwa, emavolontiya lacishe abe ngu-600 atsi angakhona kuyosita, futsi avuma nekutibhadalela imali yendiza leya kuleyo ndzawo. Lihhovisi leligatja laseMelika latsi: “Yasimangalisa kakhulu indlela labazalwane lebenta ngayo.” Ngesikhatsi umzalwane waseJapan abuta lesinye sisebenti lesiniketa lusito kutsi yini lesente safuna kusita, lesisebenti satsi: “Bazalwane baseJapan bayincenye ‘yemtimba wetfu.’ Natsi siyabuva buhlungu lababuvako kanye nekuhlupheka kwabo.” Ngenca yekutsi tinelutsandvo lwekutinikela, tisebenti letiniketa lusito tize tafaka kuphila kwato engotini ngaletinye tikhatsi kute tisite bazalwane letikanye nabo.c​—1 Joh. 3:16.

¹¹ Nebantfu labangasibo BoFakazi bayawujabulela umsebenti wetfu wekuniketa lusito. Nasi sibonelo: Ngemuva kwekutsi inhlekelele igadle esifundzeni sase-Arkansas, eMelika, nga-2013, lelinye liphephandzaba labika ngekusukumela etulu kwemavolontiya laBoFakazi, latsi: “BoFakazi BaJehova bahlele emavolontiya abo ngendlela lenhle kakhulu ngobe enta umsebenti wawo ngelikhono nangemphumelelo.” Njengobe umphostoli Pawula asho, ‘sibanakekela kahle’ bazalwane betfu labadzinga lusito.

12-14. (a) Kungani kubalulekile kwenta injongo yesitsatfu yemsebenti wetfu wekuniketa lusito? (b) Ngumaphi emavi lagcizelela kubaluleka kwekuchubeka senta imisebenti yaNkulunkulu?

¹² Yesitsatfu, sisita labacindzetelekile kutsi baphindze babe nebuhlobo naNkulunkulu. Kungani loku kubalulekile? Pawula watsi labo labatfola lolusito batawufuna ‘kubonga Nkulunkulu ngalokuphuphumako.’ (2 Khor. 9:12b) Lena yindlela lencono kakhulu labo labacindzetelekile labangaveta ngayo kubonga kwabo Jehova ngekutsi ngekushesha, baphindze babuyele eluhlelweni lwabo loluhle lwekumkhonta. (Fil. 1:10) Nga-1945, Sicongosekulindza satsi: “Pawula wakhutsata . . . kukolekwa kweminikelo ngobe bekusita . . . bazalwane labeswele kutsi batfole lusito lwetintfo tekutiphilisa, futsi bakhone kuhlanganyela ngenkhululeko nangenkhutsalo emsebentini wabofakazi baJehova.” Natsi lamuhla sinenjongo lefanako. Ngekuphindze bente umsebenti wekushumayela, bazalwane betfu abagcini ngekucinisa bomakhelwane babo labacindzetelekile, kodvwa nabo baphindze baticinise.​—Fundza 2 Khorinte 1:3, 4.

¹³ Ase sicoce ngaloko lokwashiwo ngulabo labatfola lusito lebebaludzinga kakhulu, ngemuva kwaloko bacala kushumayela, futsi kwabacinisa kwenta njalo. Lomunye umzalwane watsi: “Kwaba sibusiso emndenini wami kwenta umsebenti wekushumayela. Njengobe besidvudvuta labanye, sativa sikhululeke kwesikhashana ekucindzetelweni tinkinga tetfu.” Lomunye dzadze watsi: “Kwenta imisebenti lehlobene nekukhonta Nkulunkulu kwangenta ngangacabangi ngenhlekelele lebeyingehlele. Kwangenta ngativa ngiphephile.” Nalomunye dzadze watsi: “Nanobe tintfo letinyenti lebetenteka betingetulu kwemandla etfu, umsebenti wekushumayela waniketa umndeni wetfu sicondziso. Kucocela labanye ngelitsemba letfu lemhlaba lomusha kwacinisa kuciniseka lesinako kwekutsi tonkhe tintfo titakwentiwa tibe tinsha.”

¹⁴ Kuya emihlanganweni kungulomunye umsebenti webuKhristu emakholwa lesikanye nawo lacindzetelekile lokudzingeka kutsi awente ngekushesha. Asewucabange ngaloko lokwenteka kudzadze Kiyoko lobekaseminyakeni yabo-50 ngaleso sikhatsi. Ngemuva kwekutsi alahlekelwe tintfo takhe tonkhe ngesikhatsi kugadla i-tsunami, wasala netimphahla kanye neticatfulo labetigcokile, bekangati kutsi atsatseni ayihlanganise nani. Lomdzala welibandla wamtjela kutsi imihlangano yebuKhristu bebatayichuba emotweni yakhe. Kiyoko utsi: “Lomzalwane nemkakhe, nalomunye dzadze kanye nami sahlala emotweni. Lona bekungumhlangano lomelula, kodvwa lokumangalisako kutsi ngakukhohlwa kwesikhashana loko lobekwentiwe yi-tsunami. Ngaba nekuthula kwengcondvo. Lomhlangano wangikhombisa emandla ekutihlanganisa nalamanye emaKhristu.” Naku lokwashiwo ngulomunye dzadze ngemihlangano laya kuyo ngemuva kwekugadla kwenhlekelele: “Yangisita kutsi ngibeketele.”​—Rom. 1:11, 12; 12:12.

Umsebenti Wekuniketa Lusito Uletsa Tinzuzo Letingapheli

15, 16. (a) Ngutiphi tinzuzo lebetitawutfolwa ngemaKhristu aseKhorinte nangulamanye labehlala kuletinye tindzawo ngekusekela umsebenti wekuniketa lusito? (b) Tsine sizuza njani emsebentini wekuniketa lusito lamuhla?

¹⁵ Ngesikhatsi Pawula acoca ngemsebenti wekuniketa lusito, waphindze wachazela libandla laseKhorinte tinzuzo lebetitawutfolwa ngilo kanye nalamanye emaKhristu latawuhlanganyela kulomsebenti. Watsi: “Ngekunincusela, [emaKhristu aseJerusalema lasitwa] baveta lutsandvo labanalo ngani ngenca yemusa waNkulunkulu lomkhulu leniboniswe wona.” (2 Khor. 9:14) Kuyacaca kutsi umusa webaseKhorinte bewutawenta emaKhristu langemaJuda kutsi athantazele bazalwane babo labaseKhorinte, lokufaka ekhatsi nebeTive, futsi bewutawucinisa indlela lababatsandza ngayo.

¹⁶ Ngesikhatsi sichaza emavi aPawula lamayelana netinzuzo tekuniketa lusito esikhatsini setfu, Sicongosekulindza saDecember 1, 1945, satsi: “Nangabe incenye yebantfu baNkulunkulu labangcwele banakekela tidzingo talelinye licembu leliyincenye yabo, kuba nebunye lobukhulu.” Nguloko tisebenti letiniketa lusito letikujabulelako lamuhla. Lomdzala lowasita ngesikhatsi kunetikhukhula utsi: “Kwenta umsebenti wekuniketa lusito kwangenta ngativa ngisondzelene kakhulu nebazalwane bami kwendlula sikhatsi lesendlulile.” Lomunye dzadze lowatfola lusito utsi: “Bunye betfu bebuzalwane bukuphela kwentfo lesinayo lesisondzeta ePharadisi lasemhlabeni.”​—Fundza Taga 17:17.

17. (a) Emavi latfolakala ku-Isaya 41:13 asebenta njani emsebentini wekuniketa lusito? (b) Shano letinye tibonelo letikhombisa kutsi umsebenti wekuniketa lusito udvumisa Jehova futsi ucinisa bunye betfu. (Fundza nelibhokisi lelitsi “Emavolontiya Lavela Emhlabeni Wonkhe Aniketa Lusito.”)

¹⁷ Ngesikhatsi tisebenti letiniketa lusito tifika lapho kwenteke inhlekelele khona, bazalwane betfu labacindzetelekile batibonela bona ngendlela lekhetsekile kuba liciniso kwesetsembiso saNkulunkulu, lesitsi: “Mine nginguSimakadze, Nkulunkulu wakho, lobamba sandla sakho sangesekudla, atsi kuwe: ‘Ungesabi, ngitakusita.’” (Isa. 41:13) Ngemuva kwekusindza enhlekeleleni, lomunye dzadze watsi: “Ngaphelelwa litsemba nangibona umonakalo lobewentekile, kodvwa Jehova wangisita. Lusito lengalutfola kubazalwane aluchazeki.” Ngemuva kwekutsi inhlekelele igadle endzaweni yakubo, labadzala lababili babhala incwadzi egameni lemabandla labebakhonta kuwo, batsi: “Lokutamatama kwemhlaba kwasibangela buhlungu lobukhulu, kodvwa satibonela lusito Jehova lasinika lona asebentisa bazalwane betfu. Besike safundza ngemsebenti wekuniketa lusito, kodvwa nyalo siwubone wenteka kitsi.”

Ungahlanganyela Yini Kuwo?

18. Yini longayenta nangabe ufuna kuhlanganyela kulomsebenti wekuniketa lusito? (Fundza nelibhokisi lelitsi “Kwatsintsa Indlela Labephila Ngayo.”)

¹⁸ Ungakujabulela yini kunambitsa injabulo letfolakala ngekwenta umsebenti wekuniketa lusito? Nangabe kunjalo, hlale ukhumbula kutsi letisebenti letiniketa lusito tivame kukhetfwa kulabo labenta umsebenti wekwakha emaHholwa eMbuso. Ngako, tjela labadzala belibandla lakini kutsi ufuna kufaka sicelo sekusita ekwakhiweni kwemaHholwa eMbuso. Naku lomdzala welibandla lonalokuhlangenwe nako kulomsebenti wekuniketa lusito lasikhumbuta kona: “Kufanele uye lapho kugadle inhlekelele kuphela nangabe utfole simemo lesivela eKomidini Yekusita Nakuvele Tehlakalo.” Ngaleyo ndlela, umsebenti wetfu wekuniketa lusito utawuchubeka ngendlela lehlelekile.

19. Tisebenti letiniketa lusito tisita njani ekukhombiseni kutsi tsine sibafundzi baKhristu mbamba?

¹⁹ Umsebenti wekuniketa lusito uyindlela lehamba embili lesilalela ngayo umyalo waKhristu wekutsi ‘sitsandzane.’ Nasitsandzana, sisuke sikhombisa kutsi sibafundzi baKhristu mbamba. (Joh. 13:34, 35) Kusibusiso kitsi lamuhla kuba netisebenti letinyenti kangaka letitinikela ngekutitsandzela kute tikhatimulise Jehova, njengobe tiniketa lusito loludzingekako kulabo labasekela uMbuso waNkulunkulu ngekwetsembeka.