Yini Labanye Labayifundzako Esibonelweni Sakho?
1. Yini bafundzi baJesu labayifundza esibonelweni sakhe?
1 Jesu watsi: “Bekani lijoka lami etikwenu, nifundze kimi.” (Mat. 11:29) Ngendlela lecacile, wafundzisa labanye ngekubabekela sibonelo lesihle, hhayi ngemavi akhe nje kuphela. Cabanga ngaloko bafundzi baJesu labakufundza esibonelweni sakhe. Abemnene, anemusa futsi anelutsandvo. (Mat. 8:1-3; Mak. 6:30-34) Abetfobeke ngebucotfo. (Joh. 13:2-5) Njengobe bebahamba naJesu enkonzweni, labafundzi babona kutsi abesisebenti lesikhutsele lebesiphumelela ekufundziseni labanye emaciniso. (Luk. 8:1; 21:37, 38) Labanye batsintseka njani ngekusibuka enkonzweni?
2. Kubukeka nekutiphatsa kwetfu enkonzweni kungasenta njani sitsandzeke kubanikati bemakhaya?
2 Banikati Bemakhaya: Timphahla tetfu letihloniphekile, kutiphatsa kwetfu lokuhle, kanye nenshisekelo yetfu lecotfo ngebantfu ingabatsintsa kakhulu banikati bemakhaya. (2 Khor. 6:3; Fil. 1:27) Bayacaphela kutsi liBhayibheli silisebentisa sonkhe sikhatsi. Labanye bayajabula ngekutsi sibalalela ngenhlonipho nabakhuluma. Ungacali ubukele phansi kutsi kuba sibonelo lesihle kuletici kungadvonsela bantfu esigijimini seMbuso.
3. Sibonelo setfu lesihle singabatsintsa njani bazalwane betfu?
3 Bazalwane Betfu: Cabanga futsi nangendlela sibonelo setfu lesihle lesingabatsintsa ngayo bazalwane betfu. Kukhutsala kwetfu enkonzweni kungabenta nabo bakhutsale. Njengobe insimbi ilola lenye insimbi, inshumayelo yetfu lesiyilungiselele kahle ingenta labanye bafune kutfutfukisa emakhono abo ekufundzisa. (Taga 27:17) Kwetsembeka kwetfu ekugcineni imininingwane lecondzile ngalabo lababonise inshisekelo, bese sibuyela kubo masinyane, kungenta labanye basilingise. Sitawuba sibonelo lesihle kubazalwane nabodzadze ngekuyifeza ngendlela lephelele inkonzo yetfu.—2 Thim. 4:5.
4. Kungani kufanele sihle sisihlola sibonelo lesingiso kulabanye?
4 Kungani ungake uhlole tento takho, emavi akho kanye nendlela lobatsintsa ngayo labanye ngesibonelo sakho? Sibonelo setfu lesihle sitawujabulisa Jehova futsi sisente sitive njengemphostoli Pawula lowatsi: “Hambani etinyatselweni tami, njengobe nami ngihamba etinyatselweni taKhristu.”—1 Khor. 11:1.