Fundza EVini LaNkulunkulu
Yini Longayenta Kute Umndeni Wakho Ujabule?
Lesihloko siphakamisa imibuto lokungenteka wake watibuta yona futsi siveta nekutsi ungatitfola kuphi timphendvulo eBhayibhelini lakho. BoFakazi BaJehova batawukujabulela kucoca nawe ngaletimphendvulo.
1. Kungani kushada ngalokusemtsetfweni kubalulekile kute umndeni ujabule?
Jehova, longuNkulunkulu lojabulako, nguye lowasungula umshado. Kushada ngalokusemtsetfweni kubalulekile kute umndeni ujabule ngobe kwenta kutsi kube nebungani kanye nendzawo lelondzekile yekukhulisa bantfwana. Nkulunkulu uwutsatsa njani umshado? Ufuna kutsi ube sibopho lesihlala njalo nalesibhaliswe ngalokusemtsetfweni emkhatsini wendvodza nemfati wayo. (Lukha 2:1-5) Nkulunkulu ufuna kutsi emadvodza kanye nebafati betsembeke kulomunye nalomunye. (Hebheru 13:4) Jehova uvumela idivosi kanye nekuphindze ushade kuphela nangabe lomunye walaba labashadile aphingile.—Fundza Matewu 19:3-6, 9.
2. Indvodza kanye nemfati wayo kufanele baphatsane njani?
Jehova wadala indvodza kanye nemfati ngendlela yekutsi basitane emshadweni. (Genesisi 2:18) Njengenhloko yemndeni, indvodza kufanele ihole ekondleni umndeni wayo nasekuwufundziseni ngaNkulunkulu. Kufanele imtsandze ngekungatigodli umfati wayo. Indvodza kanye nemfati wayo kufanele batsandzane futsi bahloniphane. Njengobe emadvodza kanye nebafati bawenta emaphutsa, kufundza kucolelana kubalulekile kute bahlale bajabula.—Fundza Efesu 4:31, 32; 5:22-25, 33; 1 Phetro 3:7.
3. Kufanele yini ushiye umuntfu loshade naye nawubona kutsi awujabuli?
Nangabe wena naloshade naye nihlangabetana nebumatima, yetamani kuphatsana ngelutsandvo. (1 Khorinte 13:4, 5) LiVi laNkulunkulu alikukhutsati kwehlukana njengendlela yekucatulula tinkinga leninato emshadweni. Nanobe kunjalo, etimeni letimatima kakhulu, umKhristu kufanele atentele sincumo sekutsi utawehlukana yini naloyo lashade naye nobe cha.—Fundza 1 Khorinte 7:10-13.
4. Bantfwana, yini Nkulunkulu lanifunela yona?
Jehova ufuna kutsi nijabule. Uniniketa seluleko lesincono kakhulu sendlela yekujabulela busha benu. Ufuna kutsi nizuze ekuhlakanipheni kanye naselwatini lolunyenti batali benu labanalo. (Kholose 3:20) Jehova uyakujabulela konkhe lenikwentako kute nimkhonte.—Fundza Umshumayeli 11:9–12:1; Matewu 19:13-15; 21:15, 16.
5. Batali, yini leningayenta kute bantfwana benu bajabule?
Kufanele nisebente kamatima kute nibondle, nibalungiselele indzawo yekuhlala kanye netintfo tekwembatsa. (1 Thimothi 5:8) Kodvwa kute bantfwana benu bajabule, kufanele niphindze nibafundzise kutsandza Nkulunkulu kanye nekufundza kuye. (Efesu 6:4) Sibonelo lenibabekela sona sekutsandza Nkulunkulu singabatsintsa kakhulu. Nangabe seluleko senu sisekelwe eVini laNkulunkulu, singasita bantfwana benu kutsi batiphatse kahle.—Fundza Dutheronomi 6:4-7; Taga 22:6.
Bantfwana bayajabula nangabe nibakhutsata futsi nibancoma. Bayasidzinga siyalo kanye neseluleko senu. Kubacecesha ngaleyo ndlela kungabavikela ekutiphatseni lokungababangela buhlungu. (Taga 22:15) Kodvwa-ke, akukafaneli nibakhahlamete nanibajezisa.—Fundza Kholose 3:21.
BoFakazi BaJehova bashicilela tincwadzi letinyenti letentelwe kusita batali kanye nebantfwana. Letincwadzi tisekelwe eBhayibhelini.—Fundza Tihlabelelo 19:7, 11.
Kute utfole kwatiswa lokubanti, fundza sehluko 14 salencwadzi, Lifundzisani Mbambambamba LiBhayibheli?, leshicilelwa boFakazi BaJehova.