Chubeka Utfutfuka Njengobe Usikhonti
1. Ngutiphi tibonelo tangelikhulu lekucala letikhombisa kutsi kufanele sitfutfuke njengobe sitikhonti?
1 EmaKhristu kufanele atfutfuke njengobe atikhonti. Nguleso sizatfu lesabangela Jesu kutsi achubeke acecesha balandzeli bakhe ekwenteni umsebenti wekushumayela. (Luk. 9:1-5; 10:1-11) Kungako bo-Akhwila naPhrisila batsatsa Apholosi “bamchazela kahle indlela yaNkulunkulu.” (Imis. 18:24-26) NaPawula wakhutsata Thimothi lobesanesikhatsi angumvangeli kutsi achubeke atimisela ekufundziseni kuze intfutfuko yakhe “itewubonakala kahle kubo bonkhe bantfu.” (1 Thim. 4:13-15) Ngisho nobe sesikhonte iNkhosi sikhatsi lesidze kangakanani sibamemeteli betindzaba letimnandzi, kudzingeka sichubeke sitfutfukisa emakhono etfu ekushumayela.
2. Singafundza njani kulabanye?
2 Fundza Kulabanye: Lenye indlela lesingatfutfukisa ngayo emakhono etfu kutsi sifundze kulabanye. (Taga 27:17) Ngako-ke kufanele unake nangabe labanye bamemeteli bashumayela. Cela lusito kubamemeteli labanelikhono, futsi ukulalelisise loko labakushoko. (Taga 1:5) Uyati yini kutsi kufanele wenteni nawubuyela kumuntfu lococe naye, kutsi ungasicalisa njani sifundvo seliBhayibheli, nobe kutsi ungahlanganyela njani kuletinye tincenye temsebenti wekushumayela? Nangabe ungaciniseki, kufanele utsatse sinyatselo ucele umbonisi welicembu lokulo nobe lomunye ummemeteli lonalokuhlangenwe nako kutsi akuceceshe. Khumbula nekutsi umoya longcwele waJehova ungawatfutfukisa emakhono etfu, ngako-ke thantaza njalo uwucele.—Luk. 11:13.
3. Kufanele sente njani nangabe siniketwa lusito, ngisho nome singakaluceli?
3 Nangabe lomunye ummemeteli akutjela loko longakwenta kuze utfutfuke ngisho nobe ungakamceli, ungaphatseki kabi. (Shu. 7:9) Njenga-Apholosi, lwemukele ngekutfobeka lolo lusito futsi ubonge. Kwenta njalo kukhombisa kuhlakanipha.—Taga 12:15.
4. Jesu watsi ngusiphi sizatfu lesibalulekile sekutsi sitfutfuke njengobe sibavangeli?
4 Kutfutfuka Kuyamkhatimulisa Nkulunkulu: Jesu wasebentisa umfanekiso kute akhutsate balandzeli bakhe kutsi batfutfuke njengobe batikhonti. Yena watifanisa nemvini, balandzeli bakhe labagcotjiwe bona wabafanisa nemagala. Watsi uYise uyawatsena onkhe emagala latselako, awahlobise, “khona atewutsela titselo letinyenti.” (Joh. 15:2) Njengobe umnikati wensimu yemagilebisi afisa kutsi emagala etihlahla takhe temagilebisi atsele kakhulu, naJehova ufuna kutsi sichubeke sitfutfukisa emakhono etfu ekuveta ‘sitselo setindzebe tetfu.’ (Heb. 13:15) Ngumuphi umphumela lomuhle loba khona nangabe sichubeka sitfutfuka njengobe sibavangeli? Jesu uyasiniketa imphendvulo: “Babe uyakhatinyuliswa ngekutsi nichubeke nitsela titselo letinyenti futsi nitivete nibafundzi bami.”—Joh. 15:8.