Sebentisa Incwajana Letsi Setfulo SeliVi LaNkulunkulu Kute Ucoce Nebantfu
1. Nguliphi lithulusi lelisha lesilitfolile lesitawulisebentisa ensimini?
1 Emhlanganweni wesifundza lotsi “Chubekani Nifuna Kucala UMbuso WaNkulunkulu” kwakhululwa incwajana lensha lenesihloko lesitsi Setfulo SeliVi LaNkulunkulu. Singalisebentisa njani lelithulusi lelisha nasilungiselela tinshumayelo lesitawutisebentisa ensimini? Njengobe lencwajana ihlanganisa imibhalo ngephansi kwetihloko letehlukehlukene teliBhayibheli, ngendlela lefana nencwadzi letsi “Ukubonisana,” ingaba lusito kakhulu kuze sikhone kucoca nebantfu.
2. Singayisebentisa njani incwajana letsi Setfulo SeliVi LaNkulunkulu emsebentini wetfu wekushumayela?
2 Ungase usebentise umbuto 8 bese utsi: “Sivakashele bomakhelwane betfu kafishane ngobe bantfu labanyenti batibuta nangu umbuto: ‘Kufanele sisole Nkulunkulu yini ngekuhlupheka kwebantfu?’ [Kuletinye tindzawo, kuphumelela kakhulu kuvele umkhombise lombuto umnikati welikhaya.] Utsini umbono wakho ngalendzaba? [Lindzela imphendvulo.] LiBhayibheli liniketa imphendvulo leyenetisako kulombuto.” Fundza futsi uchaze umbhalo munye nobe ngetulu kuleyo lekhonjiwe, uwufundze eBhayibhelini. Nangabe umnikati welikhaya anenshisekelo, ungamkhombisa lemibuto lengu-20 lesekucaleni bese umcela kutsi akhetse munye lenitawucoca ngawo nawubuya. Nobe mhlawumbe ungamniketa lenye yetincwadzi tetfu lenekwatiswa lokubanti ngaleyo ndzaba lenisandza kucoca ngayo.
3. Singayisebentisa njani incwajana letsi Setfulo SeliVi LaNkulunkulu kute sicoce nebantfu labasetinkholweni letingasito tebuKhristu?
3 Imibuto 4, na-13 kuya ku-17 ingase ibe lusito nangabe ushumayela endzaweni lenebantfu labasetinkholweni letingasito tebuKhristu. Nasi sibonelo: Ungase usebentise kwatiswa lokusembutweni 17, utsi: “Sinivakashele kafishane kuze sisite imindeni. Ungavumelana nami yini kutsi imindeni ibhekana netinkinga letinyenti lamuhla? [Lindzela imphendvulo.] Bantfu labanyenti labashadene bawatfole alusito emavi lahlakaniphile latsi: ‘Umfati kufanele abe nenhlonipho lenkhulu ngendvodza yakhe.’ [Kute sidzingo sekutsi uze usho kutsi lamavi aku-Efesu 5:33. Nangabe ukhuluma nemfati, mhlawumbe ungasho emavi latfolakala ku-Efesu 5:28.] Ucabanga kutsi kusebentisa leseluleko kungabazuzisa yini bantfu labashadile?”
4. Yini longayenta nawucedza kucoca nemuntfu losenkholweni lengasiyo yebuKhristu?
4 Nasewephetsa, hlela kutsi nichubeke nicoca ngalendzaba ngalesinye sikhatsi. Mhlawumbe ungahlela nekutsi nikhulume ngalomunye walemibhalo letfolakala kulombuto lenicoce ngawo. Nasewubona kutsi sesikhatsi lesifanele, mtjele lomnikati welikhaya kutsi lamavi lahlakaniphile lebewumtjela wona avela eBhayibhelini. Mnikete incwadzi locabanga kutsi itamkhanga, kuye ngekutsi benicoce ngani nekutsi lomuntfu unamuphi umbono ngeliBhayibheli.—Fundza sengeto se-Msebenti Wetfu WeMbuso waDecember 2013.