Kuphendvula Ngelibhayibheli

NANGABE bantfu basibuta ngetinkholelo tetfu, ngendlela yetfu yekuphila, nobe bafuna kuva umbono wetfu ngetintfo letisematseni nelitsemba letfu ngelikusasa, sisebentisa liBhayibheli nasibaphendvula. Kungani senta njalo? Kungobe liBhayibheli liliVi laNkulunkulu. Tinkholelo tetfu tisekelwe eBhayibhelini. Indlela yetfu yekuphila icondziswa liBhayibheli. Lisenta siticondze tintfo letenteka emhlabeni. Litsemba letfu ngelikusasa lisekelwe etetsembisweni letiseBhayibhelini.​—2 Thim. 3:16, 17.

Siwati kahle umsebenti lohambisana neligama letfu. SiBoFakazi BaJehova. (Isa. 43:12) Ngako-ke nasiphendvula imibuto, timphendvulo tetfu asitisekeli etimfundzisweni tebantfu kodvwa sitisekela kulokushiwo nguJehova eVini lakhe. Nanobe sinemibono leyehlukehlukene, kodvwa sivumela liVi laNkulunkulu kutsi licondzise indlela yetfu yekucabanga ngobe siyaciniseka kutsi liliciniso. LiBhayibheli lisiniketa inkhululeko yekutikhetsela etintfweni letinyenti. Kunekutsi siphocelele labanye kutsi bente lokufunwa ngitsi, sibafundzisa timiso letisemiBhalweni. Nasenta njalo, nabo batawusebentisa inkhululeko yekutikhetsela njengatsi. NjengaPawula, sifisa kutsi “kutfutfukiswe kulalela ngekukholwa.”​—Rom. 16:26.

KuSembulo 3:14, Jesu Khristu uchazwa ngekutsi ‘ungufakazi lowetsembekile naloliciniso.’ Wayiphendvula njani imibuto, futsi yini layenta nakahlangabetana netimo letehlukehlukene? Ngaletinye tikhatsi abesebentisa imifanekiso lebeyenta bantfu bacabange. Kulokunye, abebuta loyo muntfu lobute umbuto kutsi yena ukuva njani lokushiwo ngumbhalo lotsite. Etikhatsini letinyenti abecaphuna imibhalo, ayikhulumele nobe avete loko lekushoko, kodvwa hhayi ngalokucondzile. (Mat. 4:3-10; 12:1-8; Luk. 10:25-28; 17:32) Ekhulwini lekucala leminyaka, imiculu lebeyicuketse imiBhalo beyibekwa emasinagogeni. Kute bufakazi bekutsi Jesu bekanayo lemiculu, kodvwa bekayati kahle imiBhalo futsi bekavame kucaphuna kuyo nakafundzisa. (Luk. 24:27, 44-47) Kungako atsi loko lebekakufundzisa bekungaveli kuye. Wakhuluma loko lakuva kuYise.​—Joh. 8:26.

Sifiso setfu kutsi silandzele sibonelo saJesu. Tsine asifani naJesu, asikaze simuve Nkulunkulu akhuluma. LiBhayibheli liliVi laNkulunkulu, ngako nasilisebentisa ekuphendvuleni imibuto, senta kutsi kunganakwa tsine. Sikhombisa kutsi sitimisele kuvumela Nkulunkulu avete kutsi liciniso liyini kunekutsi sivete imibono yetfu.​—Joh. 7:18; Rom. 3:4.

Sifiso setfu akusiko kumane nje sisebentise liBhayibheli, kodvwa sifuna kulisebentisa ngendlela letawuzuzisa lesicoca nabo. Sifuna kutsi umuntfu lesicoca naye acabange njengobe asilalele. Kuye ngemuntfu, ngembikwekutsi ufundze liBhayibheli ungase ucale ngekutsi: “Uyavumelana yini nami kutsi lokubaluleke kakhulu ngulokushiwo nguNkulunkulu?” nobe utsi: “Bewati yini kutsi liBhayibheli liyawuphendvula lombuto?” Nawukhuluma nemuntfu longalihloniphi liBhayibheli kungase kudzingeke kutsi usebentise lenye indlela. Ungase utsi: “Ngicela kucoca nawe nganasi siphrofetho,” nobe utsi: “Naku lokushiwo yincwadzi letfolakala emhlabeni wonkhe . . . ”

Ngaletinye tikhatsi ungavele uwukhulumele umbhalo lotsite. Nobe kunjalo, nangabe simo sivuma, kuhle kutsi ulivule liBhayibheli bese ufundza loko lelikushoko. Nakungenteka mkhombise lelo vesi eBhayibhelini lakhe. Kulifundza ngalokucondzile liBhayibheli kuvame kubatsintsa bantfu.​—Heb. 4:12.

Labadzala belibandla kufanele basebentise liBhayibheli nabaphendvula imibuto. Lenye yetintfo letidzingekako kumzalwane kuze abe ngulomdzala welibandla kutsi “abambelele emavini letsembekile mayelana nelikhono lakhe lekufundzisa.” (Thit. 1:9) Lilunga lelibandla lingenta sincumo lesibalulekile ekuphileni ngemuva kwekutfola seluleko kulomdzala welibandla. Kubaluleke kakhulu-ke kutsi lomdzala asekele seluleko sakhe emiBhalweni. Nangabe enta njalo, nalabanye labanyenti batawusibona sibonelo sakhe futsi bamlingise nabafundzisa.