Tizatfu Letivakalako Tivetiwe

NANGABE usho lokutsite, labo labakulalele banesizatfu sekubuta kutsi: “Kungani kuliciniso? Ngubuphi bufakazi lobukhombisa kutsi loko sikhulumi lesikushoko kufanele kwemukelwe?” Njengobe ungumfundzisi, kungumtfwalo wakho kuphendvula imibuto lenjalo nobe kusita labo labakulalele kutsi batitfolele timphendvulo. Nangabe liphuzu libalulekile kuloko lokhuluma ngako, ciniseka kutsi uveta tizatfu leticinile letitawukwenta labo labakulalele balemukele. Loko kutakusita ekwenteni bantfu bakukholelwe lokushoko.

Umphostoli Pawula wakwenta loko. Ngekuveta tizatfu letivakalako, ngekubonisana nebantfu ngendlela lenengcondvo, kanye nangekubancenga ngemusa, wetama kushintja indlela lebebacabanga ngayo labo labekhuluma nabo. Wasibekela sibonelo lesihle. (Imis. 18:4; 19:8) Kuliciniso kutsi letinye tikhulumi letinelikhono tidukisa bantfu ngekubenta bakholelwe tintfo letitsite. (Mat. 27:20; Imis. 14:19; Khol. 2:4) Tingase ticale ngekuveta umbono lotsite loliphutsa, tiwusekele emtfonjeni longaketsembeki, tisebentise tizatfu letingakacini, tingawanaki emaciniso langavumelani nembono wato, nobe titsintse kakhulu imiva kunekutsi tikhutsate bantfu kutsi bacabange. Kufanele siciniseke kutsi asitisebentisi leto tindlela.

Tizatfu Letisekelwe Ngalokucinile EVini LaNkulunkulu. Loko lesikufundzisako akukafaneli kuvele kitsi. Setama kutjela labanye loko lesikufundze eBhayibhelini. Kuze sikwente loko, sisitwa tincwadzi letilungiselelwa sisebenti lesetsembekile nalesihlakaniphile. Letincwadzi tisikhutsata kutsi siyihlolisise kahle imiBhalo. Ngako-ke, siyabakhombisa nalabanye loko lokuseBhayibhelini, hhayi ngobe sinemgomo wekutiveta sicinisile, kodvwa ngenca yekutsi sinesifiso sekubenta batibonele bona loko lelikushoko. Sivumelana naJesu Khristu lowathantaza kuYise wakhe, watsi: “Livi lakho liliciniso.” (Joh. 17:17) Alikho ligunya leliphakeme kakhulu kunelaJehova Nkulunkulu, uMdali welizulu nemhlaba. Kuze tizatfu tetfu tivakale, kufanele tisekelwe eVini lakhe.

Ngaletinye tikhatsi, singase sikhulume nebantfu labangakaletayeli liBhayibheli nobe labangalitsatsi njengaleliliVi laNkulunkulu. Kufanele usebentise kucondza kuze wati kutsi kunini lapho ungakhuluma khona ngemavesi eliBhayibheli kanye nekutsi ungakwenta kanjani loko. Kodvwa kufanele wetame kusheshe ubente bakunake loko lelikushoko.

Kufanele wephetse ngekutsi kucaphuna nje umbhalo lotsite kuniketa sizatfu lesingeke siphikiswe yini? Cha. Kungase kudzingeke uvete ingcikitsi yalombhalo kuze ukhombise kutsi vele uyakusekela loko lokushoko. Nangabe ukhuluma ngesimiso lesisembhalweni futsi ingcikitsi yawo ingakhulumi ngaleyo ndzaba, kungadzingeka uvete bufakazi lobunyentana. Kungase kudzingeke usebentise leminye imibhalo lehlobene naleyo ndzaba kuze wente labo labakulalele baciniseke kutsi loko lokushoko vele kusekelwe emiBhalweni.

Nawuchaza, ungeceli ngale kwaloko lokushiwo ngulowo mbhalo. Wufundze ngekucophelela. Lombhalo kungenteka ukhuluma ngaleyo ndzaba lenicoca ngayo. Kodvwa kuze umuntfu akukholelwe loko lokhuluma ngako, kufanele abone bufakazi baloko lokushoko.

Kusekela Ngalobunye Bufakazi. Kuze usite bantfu bacondze kutsi imiBhalo inengcondvo, kuletinye timo kungaba lusito kusebentisa bufakazi lobukuleminye imitfombo leyetsembekile, ngaphandle kwalobo lobuseBhayibhelini.

Nasi sibonelo: Ungase usebentise tintfo letidaliwe kuze ufakazele kutsi ukhona uMdali. Ungase ugcizelele imitsetfo yemvelo, njengemandla ladvonsela phansi, bese uyachaza kutsi kuba khona kwemitsetfo lenjalo kufakazela kutsi kunalotsite loshaya imitsetfo. Indlela lochaza ngayo itawuba nengcondvo nangabe ivumelana naloko lokushiwo liVi laNkulunkulu. (Jobe 38:31-33; Hla. 19:1; 104:24; Rom. 1:20) Bufakazi lobunjalo buyasisita ngobe buveta kutsi loko lokushiwo liBhayibheli kuyavumelana netintfo lesitibonako.

Ufuna kusita lotsite kutsi abone kutsi liBhayibheli liliVi laNkulunkulu mbamba yini? Ungase ucaphune letinye tati letivumako kutsi liliVi laNkulunkulu. Kodvwa loko kuba bufakazi lobunemandla yini? Loko kumane kwente kutsi bantfu batihloniphe leto tati. Ungayisebentisa yini isayensi kuze ufakazele kutsi liBhayibheli liliciniso? Nangabe utawusekela lokushoko emibonweni yabososayensi nabo labanemaphutsa, sisekelo saloko lokushoko ngeke sicine. Ngakulokunye, nangabe ucala ngaloko lokushiwo liVi laNkulunkulu bese usho loko lokutfolwe bososayensi lokugcizelela kutsi liBhayibheli likhuluma liciniso, bufakazi baloko lokushoko butawucina.

Nobe nguyiphi intfo lofuna kuyifakazela, kufanele unikete bufakazi lobenele ngayo. Kutawuya ngalabo labakulalele kutsi kufanele unikete bufakazi lobungakanani. Nasi sibonelo: Nangabe ukhuluma ngemalanga ekugcina njengobe achazwe ku-2 Thimothi 3:1-5, ungase ukhulume ngalokutsite lokusematseni lokuvele etindzabeni lokukhombisa kutsi bantfu ‘sebete lutsandvo.’ Leso sibonelo nje sisodvwa singase senele kuze ufakazele kutsi lesibonakaliso semalanga ekugcina sesiyagcwaliseka.

Esikhatsini lesinyenti kungasita kucatsanisa tintfo letimbili letinalokutsite lokubalulekile letifana ngako. Lokucatsanisa akubuveti bufakazi bentfo nakukodvwa; kufanele kusekelwe ngaloko lokushiwo liBhayibheli. Kodvwa kucatsanisa kungamsita umuntfu abone kutsi liphuzu lelitsite linengcondvo. Kucatsanisa lokunjalo kungasetjentiswa nawuchaza kutsi uMbuso waNkulunkulu unguhulumende. Ungase uvete kutsi njengabohulumende bebantfu, uMbuso waNkulunkulu unebabusi, bantfu labangephansi kwawo, imitsetfo, tinhlelo tetemtsetfo, kanye netinhlelo tetemfundvo.

Lokuhlangenwe nako kwebantfu kungase kusetjentiswe kuze kuvetwe kutsi kukuhlakanipha kusebentisa seluleko seliBhayibheli. Lokuhlangenwe nako kwakho nako ungakusebentisa kuze usekele loko lokushoko. Nasi sibonelo: Nangabe ukhuluma ngekubaluleka kwekufundza nekutadisha liBhayibheli, ungase uchaze kutsi kwenta njalo kukutfutfukise njani kuphila kwakho. Kuze akhutsate bazalwane bakhe, umphostoli Phetro wakhuluma ngesikhatsi lapho Jesu aguculwa khona simo, lokuyintfo latibonela yona ngemehlo. (2 Phet. 1:16-18) NaPawula naye wakhuluma ngalokuhlangenwe nako kwakhe. (2 Khor. 1:8-10; 12:7-9) Kuliciniso kutsi akukafaneli ukusebentise kakhulu lokuhlangenwe nako kwakho, kuze ungenti kutsi kunakwe wena.

Njengobe bantfu besuka etindzaweni letingafani futsi bacabanga ngetindlela letingafani, bufakazi lomunye umuntfu latabukholelwa, lomunye umuntfu yena ngeke abukholelwe. Ngako-ke, cabanga ngemibono yalabo labakulalele nawuncuma kutsi ngubuphi bufakazi lotabusebentisa, nekutsi utabetfula njani. Taga 16:23 titsi: “Inhlitiyo yemuntfu lohlakaniphile iyakwati kukhetsa emavi, onkhe emavi lawakhulumako ayalandzeleka.”