Kusebentisa Imibuto Ngemphumelelo

NGESIZATFU sekutsi imibuto idzinga timphendvulo, kungaba nguletishiwo ngemlomo nobe loticabangela tona engcondvweni, isita labo labakulalele kutsi nabo bahlanganyele kuloko lenikhuluma ngako. Imibuto ingakusita kutsi ucoce nebantfu futsi nabo bavete imibono yabo. Njengobe usikhulumi futsi ungumfundzisi, ungasebentisa imibuto kuze wente bantfu babe nesifiso sekukulalela, usite umuntfu kutsi acabange ngendzaba letsite, nobe ugcizelele loko lokushoko. Nawuyisebentisa kahle imibuto, usuke ukhutsata labanye kutsi bacabange kunekutsi bamane balalele nje. Bani nemgomo engcondvweni futsi ubute imibuto ngendlela letakusita kutsi uwufinyelele.

Kuze Wente Bantfu Bacoce. Nawusensimini, wabone ematfuba ekukhutsata bantfu kutsi nabo bavete loko labakucabangako nangabe bafisa kwenta kanjalo.

BoFakazi labanyenti bacala kucoca nebantfu ngekutsi bababute nangu umbuto: “Uke wacabanga yini nge . . . ?” Nabakhetsa umbuto bantfu labanyenti labacabanga ngawo, nome kanjani batakujabulela kuba sensimini. Ngisho nobe umuntfu angakaze acabange ngalowo mbuto, ungamenta kutsi abe nesifiso sekulalela. Tintfo letehlukehlukene ungatetfula ngekusebentisa nayi imibuto: “Ucabangani . . . ?,” “Utiva njani . . . ?,” kanye nalotsi: “Uyakukholelwa yini . . . ?”

Ngesikhatsi Filiphu umvangeli asondzela endvuneni yesigodlo saseTopiya lebeyifundza ngalokuvakalako siphrofetho sa-Isaya, Filiphu wayibuta nangu umbuto: “Uyakucondza yini loku lokufundzako?” (Imis. 8:30) Lombuto wasita Filiphu kutsi achaze emaciniso lamayelana naJesu Khristu. Ngekusebentisa umbuto lofana nalona, labanye BoFakazi balamuhla batfole bantfu labanesifiso sekucondza emaciniso eliBhayibheli.

Nabaniketwe litfuba lekutsi bavete imibono yabo, bantfu labanyenti baba nesifiso lesikhulu sekukulalela. Ngemuva kwekubuta umbuto, lalelisisa. Bani nemusa kunekutsi ugceke imphendvulo yaloyo muntfu. Mncome ngalokusuka enhlitiyweni. Ngalelinye lilanga, ngemuva kwekutsi sati semtsetfo “siphendvule ngekuhlakanipha,” Jesu wasincoma ngekutsi atsi: “Awukho khashane nekungena eMbusweni waNkulunkulu.” (Mak. 12:34) Ngisho nobe ungavumelani naloyo muntfu, ungambonga ngembono wakhe. Loko lakushoko kungakwenta ubone lokutsite lokufanele ukunake nawucoca naye ngemaciniso eliBhayibheli.

Kuze Uvete Emaphuzu Labalulekile. Nawukhuluma nelicembu nobe nemuntfu munye, yetama kusebentisa imibuto ngaphambi kwekutsi usho emaphuzu labalulekile. Ciniseka kutsi imibuto yakho imayelana netintfo letibatsintsako labo lokhuluma nabo. Ungaphindze usebentise imibuto letawukwenta bantfu babe nesifiso sekulalela ngobe imphendvulo basuke bangayati. Nawuhlaba likhefu kancane ngemuva kwekubuta umbuto, labo lokhuluma nabo batawuba nesifiso lesikhulu sekulalela loko lotakusho.

Ngalelinye lilanga, umphrofethi Mikha wasebentisa imibuto leminyenti. Ngemuva kwekubuta kutsi yini Nkulunkulu layifunako kulabo labamkhontako, lomphrofethi wabuta leminye imibuto lemine, ngamunye unalokutsite lokungaba yimphendvulo. Yonkhe lemibuto isita bafundzi kutsi balungele kutfola imphendvulo lenengcondvo lomphrofethi laphetsa ngayo. (Mik. 6:6-8) Ungayenta yini intfo lefanako nawufundzisa? Yetama kuyenta.

Kuze Uchaze Indzaba. Imibuto ingasetjentiswa kuze isite labanye bacondze indzaba letsite. Nakakhipha sehlulelo lesimatima kuma-Israyeli, Jehova wakwenta loku njengobe kuvetwe kuMalakhi 1:2-10. Wacale wawatjela watsi: “Nginitsandzile.” Ema-Israyeli ehluleka kukhombisa kubonga ngalolo tsandvo, ngako wawabuta watsi: “Esawu bekungesiye yini umnakaboJakobe?” Ngemuva kwaloko Jehova wakhuluma ngesimo lesibi saka-Edomi, lebesibufakazi bekutsi Nkulunkulu akazange asitsandze lesive ngenca yekungalaleli kwaso. Wabese usho imifanekiso lehambisana nemibuto kuze agcizelele indlela ema-Israyeli labehluleke ngayo kwemukela lutsandvo lwakhe. Leminye imibuto ibutwe ngatsi beyibutwa ngulabaphristi labangaketsembeki. Leminye yimibuto Jehova labeyibuta labo baphristi. Lencociswano itsintsa imiva futsi isenta sinake; indlela lebekwe ngayo lendzaba icacile futsi umlayeto wayo uyawuhlale ukhunjulwa.

Letinye tikhulumi tiyaphumelela ekusebentiseni imibuto ngendlela lefanako. Ngisho nobe kungadzingeki imphendvulo leshiwo ngemlomo, labo labalalele basuke basebentisa tingcondvo tabo, kube shengatsi bacocisana nesikhulumi.

Nasichuba tifundvo teliBhayibheli, sisebentisa indlela ledzinga kutsi umfundzi aphendvule. Kuliciniso kutsi kuzuzisa kakhulu nangabe umfundzi angafundzi imphendvulo lebhalwe phansi. Ngelivi lelinemusa, sebentisa imibuto leseceleni kuze usite umfundzi kutsi acabange. Emaphuzwini layinhloko, mkhutsate kutsi asebentise liBhayibheli nakaphendvula. Ungase umbute utsi: “Loko lesicoca ngako kuhlangana njani neliphuzu lesisandza kufundza ngalo? Kungani kubalulekile? Kufanele kukutsintse njani kuphila kwetfu?” Lendlela iphumelela kakhulu kunekutsi usho loko lokucabangako nobe kutsi unikete inchazelo lebanti. Nawenta njalo, usuke usita umfundzi kutsi asebentise ‘emandla akhe ekucabanga’ kuze akhonte Nkulunkulu.​—Rom. 12:1.

Nangabe umfundzi angalicondzi liphuzu lelitsite, mbeketelele. Mhlawumbe wetama kucatsanisa loko lokushoko naloko lasaneminyaka leminyenti akukholelwa. Kungaba lusito kuyibeka ngalenye indlela lendzaba lenikhuluma ngayo. Ngalesinye sikhatsi kusuke kudzingeka kutsi uchaze tintfo letisisekelo nje kuphela. Sebentisa kakhulu imiBhalo, futsi uyisebentise nemifanekiso. Ngetulu kwaloko, sebentisa nemibuto lemelula letamsita kutsi acabange ngebufakazi lobuvetiwe.

Kuze Utfole Loko Lokusenhlitiyweni Yemuntfu. Bantfu nabaphendvula imibuto, abakavami kuyiveta indlela labativa ngayo. Bangavele bakutjele imphendvulo labacabanga kutsi ufuna kuyiva. Kudzingeka ube nekucondza. (Taga 20:5) Njengobe kwenta Jesu, ungabuta lomuntfu utsi: “Wena uyakukholwa yini loko?”​—Joh. 11:26.

Ngesikhatsi bafundzi baJesu labanyenti bakhubeka ngaloko lakusho futsi bamshiya, Jesu wacela baphostoli bakhe kutsi basho indlela labativa ngayo. Wababuta watsi: “Nani senifuna kuhamba yini?” Phetro wachaza indlela lebebativa ngayo, watsi: “Nkhosi, singahamba siyephi? Ngobe nguwe lonemavi ekuphila lokuphakadze; sibe nekukholwa sabese siyati kutsi wena unguLongcwele waNkulunkulu.” (Joh. 6:67-69) Ngalelinye futsi lilanga, Jesu wabuta bafundzi bakhe watsi: “Bantfu batsi iNdvodzana yemuntfu ingubani?” Wabese ubabuta umbuto lowabakhutsata kutsi basho loko lokusetinhlitiyweni tabo. Watsi: “Nine-ke nitsi ngingubani?” Phetro waphendvula watsi: “UnguKhristu, iNdvodzana yaNkulunkulu lophilako.”​—Mat. 16:13-16.

Nawuchuba sifundvo seliBhayibheli, kungakuzuzisa kusebentisa indlela lefanako etimeni letitsite. Ungabuta umbuto lotsi: “Labo lofundza nabo (nobe losebenta nabo) bayitsatsa njani lendzaba?” Ngemuva kwaloko ungabuta utsi: “Wena utiva njani ngayo?” Nangabe uyati indlela umuntfu lativa ngayo, utawukhona kutsi nawumfundzisa ube lusito lolukhulu.

Kuze Ugcizelele. Imibuto ingaphindze isetjentiselwe kugcizelela imicondvo. Umphostoli Pawula wakwenta loku, njengobe kubhalwe kubaseRoma 8:31, 32: “Nangabe Nkulunkulu angakitsi, ngubani longamelana natsi? Njengobe angayigodlanga iNdvodzana yakhe kodvwa ayinikela ngenca yetfu, angehluleka kanjani kusinika ngemusa tonkhe letintfo, anendvodzana yakhe?” Naka kutsi encenyeni ngayinye, lombuto usuke uchaza umshwana lacale ngawo.

Ngemuva kwekubhala ngesehlulelo saJehova lebesiya enkhosini yaseBhabhulona, umphrofethi Isaya waveta kuciniseka labenako, watsi: “Ngobe Simakadze longuSomandla sewutimisele ngaloko, ngubani nje longamvimbela kuloko? Sandla sakhe selulekile, ngubani nje longasijikisa?” (Isa. 14:27) Loko lokushiwo yimibuto lenjengalena kukhombisa kutsi intfo lokukhulunywa ngayo ngeke iphikiswe. Kute imphendvulo lesuke idzingeka.

Kuze Uvete Imibono Leliphutsa. Imibuto lecatjangwe kahle iyindlela lenemandla yekuveta imibono leliphutsa. Ngaphambi kwekutsi elaphe indvodza letsite, Jesu wabuta baFarisi naletinye tati teMtsetfo, watsi: “Kuvumelekile yini kwelapha ngeliSabatha?” Nasayelaphile lendvodza, wabuta lomunye umbuto watsi: “Ngubani emkhatsini wenu lokutsi nangabe indvodzana nobe inkunzi yakhe igcumukela emgodzini ngeliSabatha angasheshi ayikhiphe?” (Luk. 14:1-6) Kute imphendvulo lebeyidzingeka futsi kute nalowaphendvula. Lemibuto yaveta imibono yabo leliphutsa.

Ngaletinye tikhatsi ngisho nemaKhristu eliciniso angaba nayo imibono leliphutsa. Labanye bantfu eKhorinte ngelikhulu lekucala bebayisa bazalwane babo enkantolo kuze bacatulule tinkinga lebekufanele ngabe baticatulula bona. Yini umphostoli Pawula layenta ngaleso simo? Wabuta imibuto leminyenti lecacile kuze alungise indlela lebebacabanga ngayo.​—1 Khor. 6:1-8.

Nawuphrakthiza utawufundza kuyisebentisa ngalokuphumelelako imibuto. Nome kunjalo, khumbula kutsi kufanele uhloniphe ikakhulukati nawukhuluma nebantfu labadzala, bantfu longakabetayeli kanye nalabo labasetikhundleni. Sebentisa imibuto kuze wetfule emaciniso eliBhayibheli ngendlela lekhangako.