Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
NOVEMBER 6-12
UMCEBO LOSEVINI LANKULUNKULU | AMOSE 1-9
“Funani Jehova Kuze Nichubeke Niphila”
(Amose 5:4) Naku lokushiwo nguSimakadze kuyo indlu yaka-Israyeli, utsi: “Ngifuneni, nitewuphila.
(Amose 5:6) Funani Simakadze, nitewuphila, ngobe nakungenjalo, utawuhlasela lendlu yakaJosefa njengemlilo. Lomlilo utawukhotsisisa, iBetheli imeswele lotawucisha lowo mlilo.
w04 11/15 24 ¶20
Funa Jehova Lohlola Tinhlitiyo
20 Kufanele kutsi bekungasiko melula kunoma ngubani bekahlala ka-Israyeli ngaleso sikhatsi kuhlala etsembekile kuJehova. Akusiko melula kwehluka, njengobe emaKristu lasemasha nalasakhulile lamuhla ati kahle. Kodvwa kutsandza Nkulunkulu nesifiso sekumjabulisa kwenta lamanye ema-Israyeli kutsi abe sekukhonteni lokuhlantekile. Ku-Amose 5:4 Jehova watsi kuwo: “Ngifuneni, nitewuphila.” Lamuhla, Nkulunkulu uba nemusa kulabo labaphendvukako baphindze bamfune ngekufundza liVi lakhe bese benta intsandvo yakhe. Akusiko melula kwenta loku, kodvwa lokujabulisako kutsi kuholela ekuphileni lokuphakadze.—Johane 17:3.
(Amose 5:14, 15) Funani lokuhle, hhayi lokubi, khona nitewuphila. Khona-ke Simakadze Nkulunkulu longuSomandla uyawuba nani, njengobe nani nisho kutsi unani. 15 Tondzani lokubi nitsandze lokulungile, etinkhundleni yehlulelani ngekungakhetsi. Mhlawumbe Simakadze Nkulunkulu longuSomandla angaba nesihawu kuyo insali yakaJosefa.
jd 90-91 ¶16-17
Phila Ngetimiso TaJehova Letiphakeme
16 Kukhetsa kabi kwa-Adamu umuntfu wekucala, kutsi ngukuphi lokuhle nalokubi kwaba bulima. Tsine sitawukhetsa ngekuhlakanipha yini? Amose wasiyala kutsi sicabangisise ngaloku, watsi: “Tondzani lokubi nitsandze lokulungile.” (Amose 5:15) William Rainey Harper, lobekanguphrofesa wetilwimi netincwadzi temaSemite e-University of Chicago, watsi ngalelivesi: “Engcondvweni [ya-Amose], timiso letimayelana nalokubi nalokulungile tikwenta intsandvo yaYahweh.” Leli liphuzu lelibalulekile lesilifundza kubaphrofethi labangu-12. Sitimisele yini kulalela timiso taJehova letimayelana nalokuhle nalokubi? Letimiso letiphakeme sembulelwe tona eBhayibhelini futsi tachazwa ngemaKhristu lakha ‘sisebenti lesetsembekile nalesihlakaniphile’ lanebuhlobo lobucinile naNkulunkulu.—Matewu 24:45-47.
17 Kwenyanya lokubi kusisita sigweme kwenta tintfo letingamjabulisi Nkulunkulu. Ngekwesibonelo, umuntfu angase etame kungatibuki titfombe letikhombisa kungcola ku-Internet ngobe ati kutsi kuyingoti kutibuka. Kodvwa, ‘umuntfu languye ngekhatsi’ utiva njani ngaloko lokucuketfwe ngema-web sites lanetitfombe letikhombisa kungcola? (Efesu 3:16) Nangabe asisebentisa sikhutsato lesiku-Amose 5:15, kutawuba lula ngaye kutondza lokubi. Nakenta njalo utawuba nebuhlobo lobuhle naNkulunkulu.
Funisisa Umcebo EVini LaNkulunkulu
(Amose 2:12) “Kodvwa nine nanatsisa baNaziri liwayini, nalela baphrofethi bami kutsi baphrofethe.
w07 10/1 14 ¶8
Emaphuzu Lagcamile Encwadzi YaJoweli Na-Amose
2:12. Akukafaneli sikhutsate emahlahlandlela lakhutsele, babonisi labajikeletako, titfunywa telivangeli noma emalunga emndeni waseBethel kutsi ayekele umsebenti wasikhatsi sonkhe kuze baphishekele indlela levamile yekuphila. Kunaloko, kufanele sibakhutsate kutsi bachubeke nemsebenti lomuhle labawentela Jehova.
(Amose 8:1, 2) Naku-ke iNkhosi Simakadze lengibonise kona: Ngabona libhasikidi letitselo letivutsiwe. 2 Simakadze wase uyangibuta utsi: “Ubonani, ye Amose?” Ngamphendvula ngatsi: “Ngibona libhasikidi lelinetitselo letivutsiwe.” Simakadze wase ukhuluma kimi utsi: “Sikhatsi sesive sami saka-Israyeli sesiphelile, ngingeke ngisasicolela.”
w07 10/1 14 ¶6
Emaphuzu Lagcamile Encwadzi YaJoweli Na-Amose
8:1, 2—Abesho kutsini emavi latsi “libhasikidi letitselo letivutsiwe”? Abesho kutsi lilanga laJehova lisedvute. Titselo letivutsiwe tikhiwa ngasekupheleni kwesikhatsi sekuvuna, lokusho kutsi, ngasekupheleni kwemnyaka wekuvuna titselo. Ngesikhatsi Jehova akhombisa Amose “libhasikidi letitselo letivutsiwe,” loko bekusho kutsi bese kusedvute kuphela ka-Israyeli. Ngako, Nkulunkulu watsi ku-Amose: “Sikhatsi sesive sami saka-Israyeli sesiphelile, ngingeke ngisasicolela.”
Kufundvwa KweliBhayibheli
(Amose 4:1-13) Lalelani nali livi, nine bafati basentsabeni yaseSamariya, leniphila kahle, nitamase njengetinkhomati taseBhashani, nine lenicindzetela labamphofu, nifihlite labeswele, niphocelele emadvodza enu kutsi aninike tjwala! 2 INkhosi Simakadze ifungile ngebungcwele bayo, yatsi: “Lalelani la: Siyeta sikhatsi lapho niyawutsatfwa khona ngemadweba, ngisho nebekugcina benu bayawutsatfwa ngemahhuka ekudweba tinhlanti. 3 Nitawuhudvulwa lapho ngamunye nikhishwe ngetikhala letiselubondzeni, nilahlelwe ngephandle eHemoni,” kusho Simakadze. 4 Simakadze utsi: “Sive saka-Israyeli, hambani niye eBetheli, indzawo lengcwele, niyekona, nichubeke niye eGilgali, nandzise khona tono tenu, njengobe nitsandza kwenta. Onkhe emalanga ekuseni niletse imihlatjelo yenu, bese kutsi kanye ngeminyaka lemitsatfu niletse kwelishumi kwenu. 5 Shisani sinkhwa senu lesinemvubelo kube ngumnikelo wekubonga, tigabatiseni ngeminikelo yenu yesihle. Gungubalani ngayo, nine ma-Israyeli, ngobe nguko loko lenitsandza kukwenta. 6 “Ngimi lenganinika tisu letingenalutfo kuwo onkhe emadolobha enu, nekwesweleka kwesinkhwa emakhaya enu onkhe; kodvwa anikabuyeli kimi,” kusho Simakadze. 7 “Ngaphindze ngabamba imvula, sekusele tinyanga letintsatfu nje kutsi kuvunwe; ngatfumela imvula kulelinye lidolobha, kodvwa ngayibamba kulelinye. Lenye insimi yatfola imvula, lenye yangete yayitfola imvula yaze yoma. 8 Bantfu badzayitela besuka kulelinye lidolobha baya kulelinye, bafunana nemanti, kodvwa abazange bawatfole lenele kutsi banganatsa baze bakholwe; noko anikabuyeli kimi,” kusho Simakadze 9 “Sekukanyenti ngishaya tingadze tenu netivini tenu, ngatishaya ngemswenya nangasicencane. Sikhonyane sashaya sacotfula emakhiwa enu netihlahla tenu temincumo, kwaphela kwatsi nya, noko anikabuyeli kimi,” kusho Simakadze. 10 “Nginitfumela tishayo njengaloku ngenta naseGibhithe. Emajaha enu ngawabulala ngenkemba, kanye nemahhashi enu latfunjiwe. Emakhala enu ngawagcwalisa ngeluboti etinkanjini tenu; noko anikabuyeli kimi,” kusho Simakadze. 11 “Labanye benu ngababhubhisa njengaloku ngabhubhisa iSodoma neGomora. Nanifanana nendvuku leshako, lehlwitfwe emlilweni; noko anikabuyeli kimi,” kusho Simakadze 12 “Ngako-ke, ma-Israyeli, ngitanijezisa; futsi njengobe ngitakwenta njalo nje, tilungiseleleni kubhekana naNkulunkulu wenu, nine ma-Israyeli!” 13 Ngako-ke lalelani! Yena lowo lobumba tintsaba, adale umoya, embule imicabango yakhe kumuntfu, yena lowo logucula intsatsakusa, ayente bumnyama, anyatsele tindzawo letiphakeme temhlaba, nguSimakadze Nkulunkulu longuSomandla libito lakhe.
NOVEMBER 13-19
UMCEBO LOSEVINI LANKULUNKULU | OBADIYA 1–JONA 4
“Fundza Emaphutseni Akho”
(Jona 3:1-3) Livi laSimakadze laphindze lefika kuJona kwesibili, latsi: 2 “Hamba, uye eNineve, kulelidolobha lelikhulu, ufike umemetele lesimemetelo lengikunike sona.” 3 Ngako-ke wahamba Jona waya eNineve, njengekusho kwelivi laSimakadze. INineve lena kwakulidolobha lelikhulukati; bekungatsatsa emalanga lamatsatfu kutsi umuntfu alihambe lonkhe.
Wafundza Emaphutseni Akhe
22 Kutsiwani ngaJona? Wafundza yini kumbonga Jehova ngekutsi amlalele? Yebo. Ngemuva kwemalanga lamatsatfu nebusuku lobutsatfu, lenhlanti yaya elugwini, “yase ihlantela Jona elugwini, emhlabatsini lowomile.” (Jona 2:10) Asewucabange nje, ngemuva kwako konkhe loku, Jona akudzingekanga kutsi atihlambele aye elugwini! Nanobe kunjalo, kwadzingeka atihambele yena kusuka lapho. Kungakendluli sikhatsi lesidze, kubonga kwakhe kwavivinywa. Jona 3:1, 2 utsi: “Livi laSimakadze laphindze lefika kuJona kwesibili, latsi: ‘Hamba, uye eNineve, kulelidolobha lelikhulu, ufike umemetele lesimemetelo lengikunike sona.’” Yini Jona layenta?
23 Akazange aphotise emaseko. LiBhayibheli litsi: “Ngako-ke wahamba Jona waya eNineve, njengekusho kwelivi laSimakadze.” (Jona 3:3) Jona walalela. Kuyacaca kutsi wafundza emaphutseni akhe. Natsi kudzingeka silingise kukholwa kwaJona kulendzaba. Sonkhe siyona futsi siyawenta emaphutsa. (Rom. 3:23) Kodvwa siphelelwa ngemandla yini, nobe siyafundza emaphutseni etfu bese siyashintja simlalele Nkulunkulu?
Funisisa Umcebo EVini LaNkulunkulu
(Obadiya 10) Ngenca yebudlova bakho lobente kubomnakenu, titukulwane taJakobe, uyakwembeswa ngelihlazo, ubhujiswe ingunaphakadze.
w07 11/1 13 ¶5
Emaphuzu Lagcamile Encwadzi Ya-Obadiya, YaJona NeyaMikha
10—Edomu ‘wabhujiswa njani ingunaphakadze’? Njengobe kwabiketelwa, sive saka-Edomu, lebesinahulumende nebantfu lebabehlala endzaweni letsite, saphela. Nabonidasi, inkhosi yaseBhabhulona, yamncoba Edomu ngelikhulu lesi-6 B.C.E. Ngelikhulu lesine B.C.E., indzawo yaka-Edomu beseyihlala emaNabataea, futsi baka-Edomu kwadzingeka bahlale encenyeni leseningizimu yeJudiya, indzawo yemaNegevu leyabese ibitwa ngekutsi yi-Idumiya. Ngemuva kwekutsi baseRoma babhubhise iJerusalema nga-70 C.E., baka-Edomu baphela nya.
(Obadiya 12) Bekungakafaneli umbukele phansi umnakenu, nakavelelwe ngulokubi. Bewungakafaneli utsakase nangabe bakaJuda behlelwa yimbhubhiso. Yebo, bewungakafaneli kubacoloshela namzukwane behlelwa yinhlupheko.
jd 112 ¶4-5
Kuphatsa Labanye Ngendlela Nkulunkulu Lafuna Ngayo
4 Ungatfola sifundvo kuloko lokwashiwo nguNkulunkulu kubaka-Edomu, live lelisedvute naka-Israyeli: “Bekungakafaneli umbukele phansi umnakenu, nakavelelwe ngulokubi. Bewungakafaneli utsakase nangabe bakaJuda behlelwa yimbhubhiso. Yebo, bewungakafaneli kubacoloshela namzukwane behlelwa yinhlupheko.” (Obadiya 12) BaseThire bebangase babe ‘banakabo’ ngenca yekutsengiselana, kodvwa baka-Edomu bona bebatihlobo tema-Israyeli ngobe bebatalwa ngu-Esawu, liphahla laJakobe. Ngisho naJehova wabita baka-Edomu ngekutsi ‘banakabo’ bema-Israyeli. (Dutheronomi 2:1-4) Ngako, baka-Edomu benta intfo lembi kakhulu ngekutsi bajabule ngesikhatsi baseBhabhulona bancoba emaJuda.—Hezekeli 25:12-14.
5 Kuyacaca kutsi Nkulunkulu akayitsandzanga indlela baka-Edomu lababaphatsa ngayo banakabo labangemaJuda. Singase sitibute kutsi ‘Nkulunkulu angayitsatsa njani indlela lengibaphatsa ngayo bazalwane bami?’ Lokunye lokudzinga sikucabange yindlela lesibaphatsa ngayo bazalwane betfu nangabe kwenteka sicabana. Ngekwesibonelo, ase sitsi umKhristu ukukhubile noma ucabene nesihlobo sakho. Nangabe ‘unesizatfu sekukhonona,’ utamzonda yini loyomuntfu noma wetame kulungisa? (Kholose 3:13; Joshuwa 22:9-30; Matewu 5:23, 24) Kwenta njalo kungayitsintsa indlela lomphatsa ngayo umzalwane wakho; ungase ungakujabuleli kukhuluma naye, ungamnaki noma ukhulume kabi ngaye. Nangabe sisenabisa lesibonelo, ase sitsi lomzalwane uyona, kuze kudzingeke elulekwe ngulabadzala belibandla. (Galathiya 6:1) Botawulingisa baka-Edomu yini, usitakale ngebumatima bemzalwane wakho? Nkulunkulu bekangafuna wente njani?
Kufundvwa KweliBhayibheli
(Jona 3:1-10) Livi laSimakadze laphindze lefika kuJona kwesibili, latsi: 2 “Hamba, uye eNineve, kulelidolobha lelikhulu, ufike umemetele lesimemetelo lengikunike sona.” 3 Ngako-ke wahamba Jona waya eNineve, njengekusho kwelivi laSimakadze. INineve lena kwakulidolobha lelikhulukati; bekungatsatsa emalanga lamatsatfu kutsi umuntfu alihambe lonkhe. 4 Jona walingenela lelidolobha, wahamba lilanga lonkhe. Wase uyacala uyamemetela utsi: “Sekusele emalanga langemashumi lamane kutsi iNineve ibhujiswe!” 5 Bantfu baseNineve balikholwa lelivi laNkulunkulu. Ngako base bamemetela kutsi bonkhe bantfu abazile, kusukela kulomkhulu kuze kube ngukulomncane, bembatse emasaka, bakhombise kutsi baphendvukile. 6 Letindzaba tatsi natifika enkhosini yaseNineve, yasukuma esihlalweni sayo sebukhosi, yakhumula ingubo yayo yebukhosi, yatembonya ngendvwangu yemasaka, yahlala phansi emlotseni. 7 Yakhipha simemetelo kuyo yonkhe iNineve, yatsi: “Inkhosi netiphatsimandla tayo itsi: ‘Akubete lodlako nalonambitsa lutfo nome lonatsa emanti: Umuntfu nome silwane, umhlambi wetinkhomo nome timvu ungadli unganatsi. 8 Kodvwa bantfu netilwane akumbonywe ngetindvwangu temasaka kukhalwe kuNkulunkulu. Wonkhe umuntfu akaphendvuke endleleni yakhe lembi nasebudloveni lobusetandleni takhe. 9 Ngobe ngubani nje lowatiko, mhlawumbe Nkulunkulu angatisola ayiyekele lentfukutselo yakhe leyesabekako, kuze singabhubhi?’” 10 Watsi kube Nkulunkulu abone loko labasebakwentile, kutsi batishiye tindlela tabo letimbi, watisola ngalokubi labeshito kutsi utabehlisela kona. Akazange abajezise.
NOVEMBER 20-26
UMCEBO LOSEVINI LANKULUNKULU | MIKHA 1-7
“Yini Jehova Lafuna Siyente?”
(Mikha 6:6, 7) Ngiyawuletsani mine kuSimakadze, Nkulunkulu wemazulu, nangitemkhonta? Ngiyawuletsa emazinyane lamnyaka munye abe ngumnikelo wekushiswa kuye yini? 7 Kungabe Simakadze uyawujabula yini, nangimletsela tinkhulungwane tetimvu nome imifula lengancamuki yemafutsa emncumo? Ngifanele yini kunikela kuye ngelitubulo lami, lekusitselo semtimba wami, kutsi libe yinhlawulo yetono tami?
w08 5/15 6 ¶20
Kufanele Sibaphatse Njani Labanye?
20 KuJehova, budlelwane lesinabo nebazalwane betfu buyincenye yekukhonta kwetfu. Iminikelo yetilwane yayingasho lutfo kuJehova nangabe labo labayinikelako bebangabaphatsi kahle labanye. (Mika 6:6-8) Ngako, Jesu wakhutsata bafundzi bakhe kutsi ‘basheshe bayilungise inkinga nemuntfu.’ (Math. 5:25) Pawula wabhala emavi lahambisana naloko lokwashiwo nguJesu watsi: “Tfukutselani kodvwa ningoni; ningavumi kutsi lilanga lishone nisetfukutsele, ningamniki Develi litfuba.” (Efe. 4:26, 27) Nangabe kwenteka siba nesizatfu lesifanele sekutfukutsela, kufanele sitsatse sinyatselo sekulungisa indzaba ngekushesha kuze singahlali sitfukutsele, futsi singamniki Sathane litfuba.—Lukha 17:3, 4.
(Mikha 6:8) Cha, Simakadze usitjelile lokungukona kukuhle. Lakufunako kitsi ngunaku: Ufuna sente kulunga, siphatsane ngemusa, siphilele Nkulunkulu ngentfobeko.
“Yini Jehova Layicelako Kuwe?”
“Khombisa bulungisa.” Ligama lesiHebheru lelitsi “bulungisa,” lifaka ekhatsi “kuphatsana kahle kwebantfu.” Nkulunkulu usicela kutsi sibaphatse kahle labanye ngendlela yena lafuna sibaphatse ngayo. Sikhombisa kutsi sinebulungisa ngekungakhetsi, ngekuba cotfo nangekwetsembeka nasisebentelana nalabanye. (Levithikhusi 19:15; Isaya 1:17; Hebheru 13:18) Nangabe sibaphatsa kahle labanye, nabo batawufisa kusiphatsa kahle.—Matewu 7:12.
“Tsandza umusa.” Nkulunkulu akasiceli kutsi sibe nemusa nje kuphela kodvwa ucela kutsi siwutsandze. Leligama lesiHebheru lelitsi “umusa” lingase lihunyushwe ngekutsi “sihawu” nobe “lutsandvo.” Lesinye sati seliBhayibheli sitsi: “Emagama latsi lutsandvo, sihawu nemusa awalichazi kahle ligama lelitsi [cheʹsedh]; leligama lichazwa ngiwo onkhe lamagama nakahlanganisiwe, hhayi nakatimele.” Nangabe siwutsandza umusa, siwukhombisa ngekutitsandzela; sikujabulele kusita labeswele sitawutfola injabulo nasibapha labanye.—Imisebenti 20:35.
‘Zitsa nawuhamba naNkulunkulu.’ EBhayibhelini ligama lelitsi “kuhamba” lisho “kulandzela indlela letsite.” Sihamba naNkulunkulu ngekulandzela timiso takhe letiseBhayibhelini. Kufanele ‘sizitse’ nasilandzela timiso taJehova. Njani? Kuzitsa embikwaNkulunkulu kusho kuhlola buhlobo betfu naye futsi sikhumbule kutsi sibantfu labanesono. Ngako-ke, “kuzitsa nawuhamba nalotsite” kusho kuba nembono lokahle ngaloko lakufunako naloko lesingamnika kona.
Kuyasijabulisa kwati kutsi angeke kwenteke Jehova afune lokungetulu kwemandla etfu. Ujatjuliswa yimetamo yetfu lemihle kakhulu yekumkhonta. (Kholose 3:23) Uyati kutsi sinesono. (Tihlabelelo 103:14) Nangabe natsi sifundza kukwemukela kutsi kunetintfo lesingeke sikhone kutenta, sitawumkhonta ngekujabula. Fundza kutsi yini lokufanele uyente kuze ukhonte Nkulunkulu. Nawenta njalo, utakubusisa.—Taga 10:22.
Funisisa Umcebo EVini LaNkulunkulu
(Mikha 2:12) Kodvwa ngiyakunibutsela ndzawonye, nonkhe nine sive saka-Israyeli lenisasele. Ngiyawunibutsela nonkhe ndzawonye njengetimvu tibuyela esibayeni sato; nanjengelidlelo leligcwele timvu, live lenu lisetawubuye ligcwale bantfu labanyenti.
w07 11/1 15 ¶6
Emaphuzu Lagcamile Encwadzi Ya-Obadiya, YaJona NeyaMikha
2:12—Sagcwaliseka nini siphrofetho ‘sekubutselwa ndzawonye kwema-Israyeli lebekasele’? Sagcwaliseka kwekucala nga-537 B.C.E. ngesikhatsi emaJuda lebekasele abuyela eveni lawo ngemva kwekutfunjelwa eBhabhulona. Lamuhla, lesiphrofetho sigcwaliseka “ku-Israyeli waNkulunkulu.” (Galathiya 6:16) Kusukela nga-1919, emaKhristu lagcotshiwe abutselwa ndzawonye ‘njengemhlambi munye.’ Njengobe “sicumbi lesikhulu” ‘saletinye timvu’ siye satihlanganisa nawo, kusukela nga-1935 ‘sekugcwele bantfu labanyenti.’ (Sembulo 7:9; Johane 10:16) Bakusekela ngetimisela kukhonta kweliciniso.
(Mikha 7:7) Kodvwa mine ngitakwetsembela kuSimakadze, ngilindzele Nkulunkulu ngesibindzi, ngobe nguye lotangiphephisa. Nkulunkulu wami utangiva.
w03 8/15 24 ¶20
Yini Jehova Layilindzele Kitsi?
20 Kutfola sibusiso saJehova kusenta sibe nesimo sengcondvo lesifana nesaMikha. Lowatsi: “Ngilindzele Nkulunkulu ngesibindzi, ngobe nguye lotangiphephisa.” (Mika 7:7) Lamavi ahlobene njani nekukhonta kwetfu Nkulunkulu? Kuba nesimo sengcondvo sekulindza, nobe kubeketela, kusisita sikubalekele kukhatsateka ngekutsi lilanga laJehova solo alifiki. (Taga 13:12) Ecinisweni, sonkhe siyakulangatelela kuphela kwalelive lelibi. Nobe kunjalo, liviki ngalinye kuba netinkhulungwane tebantfu letisuke ticala kufundza ngaJehova. Kwati loko kusenta sibe nesimo sengcondvo sekulindza. Lomunye losekanesikhatsi lesidze anguFakazi watsi: “Nangabe ngicabanga ngaleminyaka lengu-55 ngenta umsebenti wekushumayela, ngiyaciniseka kutsi kute lokwangilahlekela ngekulindza Jehova. Kunekulahlekelwa, ngisindze etintfweni letinyenti letibuhlungu.” Utiva ngendlela lefanako yini nawe?
Kufundvwa KweliBhayibheli
(Mikha 4:1-10) Ngemalanga ekugcina intsaba yelithempeli laSimakadze iyawucina, ibe ngulephakeme kwendlula tonkhe tintsaba; iyawuphakanyiswa ibe ngetulu kwemagcuma, tive letinyenti tiyawubekelela tiye kuyo tingasakhawuli. 2 Tive letinyenti tiyawufika titsi: “Wotani, senyukele entsabeni yaSimakadze, endlini yaNkulunkulu waJakobe. Utasifundzisa tindlela takhe, khona sitewuhamba emikhondvweni yakhe. Ngobe umtsetfo uyawuphuma eSiyoni, livi laSimakadze liphume eJerusalema.” 3 Uyakwehlulela emkhatsini wetive, acatulule imibango yetive letinemandla, edvute nakhashane. Tona-ke tiyawukhandza tinkemba tato, titente tibe ngemakhuba, tikhali tato tibe tikelo tekutsena tihlala. Sive singeke sihlasele lesinye ngenkemba, futsi tive tingeke tisaceceshelwa kulwa imphi. 4 Bonkhe bantfu bayawuhlala ngekuthula ngulowo nalowo esivinini sakhe nasemikhiweni yakhe, kubete lobesabisako. Loku kwetsenjiswe nguSimakadze, longuSomandla. 5 ‘Tonkhe tive tikhonta tihloniphe bonkulunkulu bato, kodvwa tsine siyawukhonta Simakadze Nkulunkulu wetfu phakadze naphakadze. 6 Simakadze utsi: “Sikhatsi siyeta, mhlazane ngiyawubutsela ndzawonye sive lengasijezisa, bona labo lababuva buhlungu ekutfunjweni. 7 Bantfu balesive batishosha kantsi bakhashane nemakhaya abo, kodvwa ngiyawukwenta sicalo lesisha ngensali yabo, babe sive lesinemandla. Ngiyawuba yiNkhosi yabo eSiyoni kuze kube phakadze naphakadze.” 8 Nawe Jerusalema, njengobe bewuyinqaba yekulondvolota umhlambi wakho, wena ntsaba yaseSiyoni uyawuphindza futsi ube yinhlokodolobha yalowo mbuso, lowawuvele ungiyo. 9 Nikhalelani kakhulu kangaka? Yini nikhale nijilajile njengemfati aphetfwe ngumhelo? Kungobe anisenayo yini inkhosi, nebaholi benu sebafile yini? 10 Shumpani nibubule, bantfu baseJerusalema, nilingise umfati aphetfwe ngumhelo nasatawubeleka, ngobe nyalo senitawuphuma ekhaya niyewuhlala etigangeni. Nitakuya eBhabhulona; noko lapho niyawusindziswa, Simakadze uyakunephula etitseni tenu.
NOVEMBER 27–DECEMBER 3
UMCEBO LOSEVINI LANKULUNKULU | NAHUME 1–HABAKHUKI 3
“Hlala Uphapheme Futsi Ukhutsele”
(Habakhuki 2:1-4) Ngitawuma embonisweni yami ngibuke, ngitimise kahle etingosini tami, ngitawubukisisa kahle ngitewubona kutsi Nkulunkulu utawutsini kimi, nekutsi ngitawuphendvula ngitsini ngalokukhonona. 2 Simakadze wase uyaphendvula, watsi: “Bhala phansi lesembulo, usibhale sicace kuletibhelekeca, kuze kutsi kufundzeke kahle. 3 Ngobe lesembulo silindzele sikhatsi lesimisiwe; sikhuluma ngesiphetfo lesiphutfumako, futsi ngeke sibonakale singemanga. Nome sephutisa nje, silindzele, sona sitawufika nome kanjani, futsi ngeke sephute. 4 “Nasi sembulo: Lotiphakamisako angeke aphephe, kodvwa lolungile uyawuphila ngekukholwa kwakhe.
w07 11/15 10 ¶3-5
Emaphuzu Lagcamile Encwadzi YaNahume, YaHabakhuki NeyaZefaniya
2:1. NjengaHabakhuki, kufanele sihlale siphapheme futsi sikhutsele. Kufanele sihlale sikulungele nekulungisa indlela lesicabanga ngayo kuze semukele nobe ngukuphi ‘kusolwa,’ nobe kulungiswa, lesingahle sikutfole.
2:3; 3:16. Njengobe sikulindzele ngekukholwa kufika kwelilanga laJehova, singaphelelwa ngumuva wekuphutfuma.
2:4. Kuze sisindze ngelilanga laJehova lekwehlulela lelitako, kufanele sicinisele ngekwetsembeka.—Hebheru 10:36-38.
Funisisa Umcebo EVini LaNkulunkulu
(Nahume 1:8) Ngesikhukhula lesinemandla baseNineve labaphambene naye uyawubacedza, abacoshe baye ebumnyameni.
(Nahume 2:6) Emasango emifula ayavuleka, sigodlo siyabhidlika.
w07 11/15 9 ¶2
Emaphuzu Lagcamile Encwadzi YaNahume, YaHabakhuki NeyaZefaniya
2:6—Ngumaphi “emasango emifula” lavuleka? Lamasango asho sikhala lesavulwa ngemanti eMfula iTigrisi elubondzeni lwaseNineve. Nga-632 B.C.E. ngesikhatsi lelidolobha laseNineve lihlaselwa ngemabutfo aseBhabhulona newemaMede, bantfu lebebahlala khona bebatitjela kutsi bavikelekile. Lelidolobha belinetindvonga letindze futsi bekungangeneki kulo. Nanobe kunjalo, tikhukhula tabangela kutsi iTigrisi igcwale iphuphume. Ngekusho kwesatimlandvo Diodorus, loku “kwabhidlita incenye letsite yetindvonga talelidolobha.” Kalula kanjalo, emasango emfula avuleka futsi njengoba bekubiketelwe, iNineve yadliwa ngekushesha njengemlilo ushisa tinhlanga letomile.—Nahume 1:8-10.
(Habakhuki 3:17-19) Nome sihlahla semkhiwa singahlumi, nemagelebisi kute esihlahleni semvini, nome umncumo ungatseli, nemasimi angasatitseli tivuno, nome sekute timvu esibayeni, netinkhomo sekute esibayeni, 18 noko ngitawujabula ngaSimakadze, ngijabulele Nkulunkulu, uMsindzisi wami. 19 Simakadze loyiNkhosi ungemandla ami; wenta tinyawo tami tibe njengetenyamatane, ungenta ngihambe ngiphephile etindzaweni letiphakeme. Lemhlabelisi wetemiculo. Elugujini lwami lolunetintsambo.
w07 11/15 10 ¶10
Emaphuzu Lagcamile Encwadzi YaNahume, YaHabakhuki NeyaZefaniya
3:17-19. Ngisho singabhekana nebumatima nyalo kanye nangesikhatsi se-Amagedoni, singaciniseka kutsi Jehova utasinika “emandla” njengobe sichubeka simkhonta ngenjabulo.
Kufundvwa KweliBhayibheli
(Habakhuki 2:15–3:6) Maye kulowo muntfu lonatsisa bomakhelwane bakhe tjwala, abutfululele kuso sikhumbasikhwama, banatse baze badzakwe, entele kutsi atewubukela imitimba yabo nase bangcunu. 16 Wena uyawudliwa ngemahloni esikhundleni sekudvunyiswa. Manje-ke selitfuba lakakho! Natsa nawe, ungcunuleke! Lendzebe lesuka esandleni saSimakadze sangasekudla seyijikela ngakuwe, nelihlazo liyawumbonya ludvumo lwakho. 17 Lobudlova lobente kuyo iLebanoni buyawukwehlula, nekubhubhisa kwakho tilwane kuyawukwesabisa. Ngobe ucitse ingati yebantfu, wabhubhisa emave nemadolobha kanye nabo bonkhe labebahlala kuwo. 18 “Sinamsebenti muni sithico, njengaloku sibatwe ngumuntfu nje? Yebo, sisitani sitfombe lesifundzisa emanga? Ngobe lowo losibatako wetsembela emsebentini wetandla takhe, wakha tithico letingeke tize tikhulume. 19 Nako kulowo muntfu losho esigodvweni atsi: ‘Phila!’ nome etjeni lelingenamphilo atsi: ‘Vuka!’ Lingasinika yini seluleko? Lembeswe ngegolide nangesiliva, kute umphefumulo kulo. 20 “Kodvwa Simakadze usethempelini lakhe lelingcwele. Umhlaba wonkhe awuthule embikwakhe.”
3 Umthandazo waHabakhuki, umphrofethi, ngeShigiyonothi. 2 Awu Simakadze, ngivile ngeludvumo lwakho; ngimangaliswa tento takho, wena Simakadze. Phindza utivusetele nangalamalanga etfu, tente tatiwe nangaletikhatsi tetfu. Elulakeni lwakho khumbula umusa. 3 Nkulunkulu uchamuka eThemani, Longcwele wesuka eNtsabeni iPharani. Inkhatimulo yakhe isibekela emazulu, ludvumo lwakhe lugcwalisa umhlaba. 4 Kucwebetela kwakhe kunjengekuphuma kwelilanga; kubaneka imisebe etandleni takhe, lapho kufihlakele khona emandla akhe. 5 Sishayo sihamba embikwakhe, mashayacotfule wesifo ulandzela etinyatselweni takhe. 6 Nakema, kunyikanyika umhlaba, nakabuka, kutfutfumela tive. Tintsaba takudzala tiyahhihlika, nemagcuma akadzenidzeni ayagocana. Tindlela takhe taphakadze naphakadze.