Litsini LiBhayibheli Ngekuhlala Ndzawonye Kwebantfu Labangakashadi?

Lokushiwo liBhayibheli

LiBhayibheli litsi intsandvo yaNkulunkulu ikutsi bantfu ‘babubalekele bugwadla.’ (1 KubaseThesalonika 4:3) Njengobe lisetjentiswe eBhayibhelini, ligama lelitsi “bugwadla” lifaka ekhatsi kuphinga, butabane kanye nekuya ecansini kwemuntfu wesilisa newesifazane labangakashadi.

• Yini leyenta kube nendzaba kuNkulunkulu kutsi bantfu bayashada nobe cha?

• Kutsiwani ngekuhlala ndzawonye nisengakashadi kuze nibone kutsi niyafanelana yini?

• Bantfu labashadile bangawucinisa njani umshado wabo?

Yini leyenta kube nendzaba kuNkulunkulu kutsi bantfu bayashada nobe cha?

• Umshado uvela kuNkulunkulu. Wawucalisa nakahlanganisa bo-Adamu na-Eva. (Genesisi 2:22-24) Inhloso yakhe bekungasiko kutsi indvodza nemfati bahlale ndzawonye ngaphandle kwesibopho semshado.

• Nkulunkulu uyakwati lokungenta bantfu bajabule. Wenta umshado kutsi ube sibopho lesihlala njalo emkhatsini wendvodza nemfati lesitawuzuzisa siphindze sivikele onkhe emalunga emndeni. Cabanga nganasi sibonelo lesimelula. Njengobe ticondziso letivela kumakhi wefenisha tikutjela kutsi ungayihlanganisa njani lefenisha ngendlela lekahle, kanjalo neticondziso taNkulunkulu tisitjela kutsi singayakha njani imindeni lephumelelako. Timiso taNkulunkulu tihlale tibazuzisa labo labatilalelako.​—Isaya 48:17, 18.

  

• Kuya ecansini nemuntfu longakashadi naye kungaba nemiphumela lemibi. Sibonelo nje, kungaholela ekukhulelweni lokungafunwa, ekutfoleni tifo letitsatselwana ngekuya ecansini kanye nasekucindzetelekeni.

• Nkulunkulu waniketa emadvodza nebafati lilungelo lekuya ecansini kuze batale bantfwana. Kuphila kungcwele kuNkulunkulu futsi lilungelo lekutala bantfwana lisipho lesiligugu. Nkulunkulu ufuna sisihloniphe lesipho ngekutsi silalele imiyalo yakhe lemayelana nemshado.​—KumaHebheru 13:4.

Kutsiwani ngekuhlala ndzawonye nisengakashadi kuze nibone kutsi niyafanelana yini?

Akudzingeki bantfu bahlale ndzawonye kwesikhashanyana ngaphambi kwekutsi bashade kuze babe nemshado lophumelelako. Kunaloko, imishado iyacina nangabe laba lababili batibophetele kulomunye nalomunye futsi basebenta ngekutimisela kuze bacatulule tinkinga.a Umshado ucinisa kutibophetela.​—Matewu 19:6.

Bantfu labashadile bangawucinisa njani umshado wabo?

Kute imishado lete tinkinga. Nobe kunjalo, labashadene bangaba nemshado lophumelelako ngekusebentisa seluleko seliBhayibheli. Nati tibonelo:

• Cabangela kakhulu loyo loshade naye kunekuticabangela wena.​—1 KubaseKhorinte 7:3-5; KubaseFiliphi 2:3, 4.

• Tsandzanani niphindze nihloniphane.​—Kubase-Efesu 5:25, 33.

• Fundza kulawula indlela lokhuluma ngayo.​—Taga 12:18.

• Beketela futsi usheshe kucolela.​—KubaseKholose 3:13, 14.