Jesu Uyabatsandza Bantfwana

UYAMBONA yini Jesu lapha agace lomfanyana? Kuyabonakala kutsi Jesu abebatsandza bantfwana. Lamadvodza lambukile, baphostoli bakhe. Yini Jesu layishoko kuwo? Ase sibone.

Jesu nebaphostoli bakhe bebasandza kubuya eluhambeni loludze. Baphostoli bakhe bebaphikisana bodvwa endleleni. Ngemuva kwaloluhambo, Jesu wababuta: “Beniphikisana ngani endleleni?” Empeleni Jesu bekati kutsi bebaphikisana ngani. Kepha abefuna kubona kutsi batawumtjela yini.

Baphostoli abamphendvulanga, ngoba endleleni bebaphikisana ngekutsi ngubani lomkhulu emkhatsini wabo. Labanye bebaphostoli, bebafuna kubonakala bagcamile kunalabanye. Jesu abetawubatjela kanjani kutsi akusiyo intfo lenhle kufuna kuba mkhulu kunalabanye?

Wabita lomfanyana, wammisa embikwabo. Wase utsi kubo: ‘Ngifuna nati kutsi, naningaphendvuki nibe njengebantfwana, ningeke ningene embusweni waNkulunkulu. Umuntfu lomkhulu embusweni waNkulunkulu, nguloyo loyawutitfoba njengalomntfwana.’ Uyati yini kutsi kungani Jesu asho loku?

Bantfwana labancane abakhatsateki ngekutsi ngubani lomkhulu nobe logcamile emkhatsini wabo. Ngako-ke, baphostoli kwakufanele bafundze kulabantfwana, hhayi kutsi balibale kuphikisana ngekutsi ngubani lomkhulu nobe logcamile emkhatsini wabo.

Kunaletinye futsi tikhatsi, lapho Jesu akhombisa khona kutsi ubatsandza kangakanani bantfwana. Ngemuva kwetinyanga letimbalwa, labanye baletsa bantfwana babo kutsi batewubona Jesu, kepha baphostoli betama kubavimba. Jesu watsi kubo: “Vumelani bantfwana bete kimi, ningabavimbeli, ngobe umbuso waNkulunkulu walabanjalo.” Ngako-ke watsatsa labantfwana wabagona, futsi wababusisa. Akujabulisi yini kwati kutsi Jesu abebatsandza bantfwana?