Uyatsandza Yini Kuba Sembili?

UKHONA yini umuntfu lomatiko lotsandza kuba sembili njalo?— Kungenteka kutsi uze afuce umuntfu kute abe sembili elayinini. Uke wakubona yini loko kwenteka?— Umfundzisi Lomuhle Kakhulu wabona ngisho nebantfu labadzala labatsandza kuba sembili, nobe kuba setindzaweni letincono kakhulu. Akazange akutsandze loko. Ase sibone kutsi kwentekani.

LiBhayibheli litsi Jesu wamenywa edzilini lelikhulu emtini wemFarisi, labengumholi lobalulekile wenkholo. Ngesikhatsi Jesu sekafikile, wabona labanye bantfu lebebamenyiwe bangena futsi batikhetsela tindzawo tekuhlala letincono. Ngako wacocela labantfu lebebamenyinwe indzaba letsite. Ungatsandza yini kuyiva?—

Jesu watsi: ‘Nangabe umuntfu akumema edzilini lemshado, ungakhetsi indzawo lencono nobe lesembili kunato tonkhe.’ Kungani Jesu asho njalo?— Wachaza kutsi kungenteka kumenywe umuntfu lobaluleke kakhulu. Njengobe ubona kulesitfombe, umnikati walelidzili uyeta afike atsi: ‘Sukuma kuhlale lendvodza, wena hamba uyohlala laphaya.’ Ucabanga kutsi lomuntfu lomenyiwe wativa njani?— Waba nemahloni ngobe bonkhe laba labanye labamenyiwe batambuka njengobe asuka ayohlala endzaweni levamile.

Jesu bekakhombisa kutsi akukafaneli sifune tindzawo letisembili. Watsi: ‘Nawumenyiwe edzilini lemshado, hlala endzaweni lesemuva kute umuntfu lokumemile atewukuta atsi: “Mnganami, yani embili.” Ngako utawuhlonishwa ngibo bonkhe labamenyiwe njengobe uhamba uyohlala endzweni lesembili.’​—Lukha 14:1, 7-11.

Uyabona kutsi isho kutsini lendzaba yaJesu?— Ase ngikwentele sibonelo kute ngibone kutsi uyabona yini. Ase uticabange ugibela ebhasini legcwele bantfu. Kufanele yini ugijimele kuyotfola indzawo yekuhlala bese uyekela umuntfu lomdzala eme ngetinyawo?— Jesu bekatawujabula yini nawenta njalo?—

Labanye bantfu bangase batsi Jesu akanendzaba naloko lesikwentako. Ucabanga kutsi kuliciniso yini loko?— Ngesikhatsi Jesu akulelidzili lelikhulu emtini wemFarisi, wababuka bantfu njengobe batikhetsela tindzawo labatawuhlala kuto. Awucabangi yini kutsi Jesu nanyalo usanendzaba naloko lesikwentako?— Njengobe nyalo Jesu asezulwini, usendzaweni lekahle kakhulu langasibona kuyo.

Nangabe umuntfu etama kuba sembili, loko kungabanga tinkinga. Imvamisa kubanga kutsi bantfu bacabane, baphindze bakwatelane. Ngaletinye tikhatsi loku kwenteka nangabe bantfwana bayogibela ibhasi. Ngesikhatsi umnyango webhasi uvuleka, bagijimela kuyogibela kucala. Bafuna kutfola indzawo yekuhlala lekahle lengasefasiteleni. Yini lengase yenteke ngemuva kwaloko?— Bangase bakwatelane.

Kufuna kuba sembili kungabanga tinkinga letinyenti. Loko kwabanga tinkinga ngisho nakubaphostoli baJesu. Njengobe sifundzile eSehlukweni 6 kulencwadzi, baphikisana ngekutsi ngubani lomkhulu emkhatsini wabo. Usakhumbula kutsi yini Jesu layenta?— Wabekhuta. Kodvwa nangemuva kwaloko baphindze baphikisana. Ase sibone kutsi loko kwacala njani.

Baphostoli kanye nalabanye, bebahamba naJesu kwekugcina baya edolobheni laseJerusalema. Jesu bekasolo abacocela ngeMbuso wakhe, ngako boJakobe naJohane bebasolo bacabanga ngekutsi batawubusa naye babe ngemakhosi. Baze bacocela make wabo Salome ngalendzaba. (Matewu 27:56; Makho 15:40) Ngako ngesikhatsi basendleleni baya eJerusalema, Salome waya kuJesu, wafike waguca embikwakhe wamncenga.

Jesu wambuta: “Ufunani?” Watsi ufuna kutsi Jesu avumele emadvodzana akhe ahlale eceleni kwakhe eMbusweni wakhe, lomunye ahlale ngesekudla kantsi lomunye ahlale ngesencele. Ucabanga kutsi bativa njani laba labanye baphostoli labalishumi ngesikhatsi beva ngaloko boJakobe naJohane labacele make wabo kutsi akwente?—

Babatfukutselela boJakobe naJohane. Ngako Jesu wanika bonkhe baphostoli bakhe seluleko lesibalulekile. Watsi babusi betive bayatsandza kuba bakhulu futsi batsatfwe njengebantfu lababalulekile. Bafuna tikhundla letisetulu kuze bonkhe bantfu babahloniphe. Kodvwa Jesu watjela balandzeli bakhe kutsi bangabi njalo. Kunaloko, Jesu watsi: “Nobe ngubani lofuna kuba mkhulu emkhatsini wenu kufanele abe yinceku yenu.” Ase ucabange nje ngaloko!​—Matewu 20:20-28

Inceku ngumuntfu lonjani?— Ngumuntfu losebentela labanye bantfu, kodvwa longalindzeli kutsi labanye bantfu nabo bamsebentele. Ukhetsa kuhlala endzaweni lephasi, hhayi lesembili. Akatiphatsi njengemuntfu lobalulekile, kodvwa utiphatsa njengalongakabaluleki. Khumbula kutsi Jesu watsi umuntfu lofuna kuba sembili kufanele atiphatse njengenceku yalabanye.

Ucabanga kutsi kusho kutsini loko kitsi?— Inceku ingaphikisana yini nemphatsi wayo ngekutsi ngubani lokufanele ahlale endzaweni lesembili? Nobe imphikise ngekutsi ngubani lokufanele adle kucala? Ucabangani ngaloko?— Jesu wachaza kutsi inceku lekahle itsatsa umphatsi wayo njengalobalulekile kunayo.​—Lukha 17:7-10.

Ngako-ke, kunekutsi setame kuba sembili, yini lokufanele siyente?— Kufanele sibe njengenceku kulabanye. Loko kusho kubeka labanye embili kunatsi. Kusho nekubabuka njengalababalukile kunatsi. Ngutiphi tindlela locabanga kutsi singabeka labanye ngato embili?— Kungani ungaphindzi ufundze ekhasini 40 na-41 kuze utfole letinye tetindlela longatisebentisa kute ubeke labanye embili ngekutsi ubentele tintfo letinhle.

Uyakhumbula kutsi Umfundzisi Lomuhle Kakhulu bekabeka labanye kucala kunaye ngekutsi abentele tintfo letinhle. Ngebusuku bekugcina anebaphostoli bakhe, waguca ngemadvolo wageza tinyawo tabo. Nangabe sibeka labanye bantfu kucala kunatsi ngekutsi sibentele tintfo letinhle, sitawube sijabulisa Umfundzisi Lomuhle Kakhulu kanye naBabe wakhe, Jehova Nkulunkulu.