Fundzisa Bantfwana Bakho

Bebabitwa Ngekutsi ‘Ngemadvodzana Ekudvuma Kwelitulu’

NAKUNESIPHEPHO, ungase uve kudvuma kwelitulu. Uye wetfuke yini?—a Kuyamangalisa kutsi Jesu wabita bafundzi bakhe lababili ngekutsi ‘Ngemadvodzana Ekudvuma Kwelitulu.’ Asesibone kutsi kungani ababita kanjalo.

Labafundzi baJesu lababili, bekuboJakobe naJohane. Bebabantfwana bandzawonye, futsi bangemadvodzana aZebedi, kanye naSalome umfati wakhe. Kungenteka kutsi Salome abengudzadze waboMariya, lokungumake waJesu. Ngako-ke, kungenteka kutsi Jesu, Jakobe, kanye naJohane bebabomnaka futsi bakhula babangani labakhulu.

Zebedi abengumdwebi, futsi boJakobe naJohane bebasebenta naye. Laba lababili ngibo bekucala Jesu labakhetsa kutsi babe balandzeli bakhe. Ngesikhatsi ababita, ngekushesha bashiya umsebenti wabo futsi bamlandzela. Ngekuhamba kwesikhatsi, Jesu wakhetsa balandzeli bakhe labangu-12 kutsi babe baphostoli bakhe. BoJakobe naJohane bebangulabanye babo.

Ngalelinye lilanga kusesele tinyanga letimbalwa kutsi Jesu abulawe, yena nebaphostoli bakhe bebahamba endzaweni lenetintsaba yaseSamariya. Besekucala kuhlwa, futsi bonkhe besebadziniwe. Kodvwa bantfu baseSamariya bebangafuni kutsi Jesu kanye nebaphostoli bakhe bacitse busuku kulelo dolobha. Uyati yini kutsi kungani?— Asesibone.

Jesu kanye nebaphostoli bakhe bebangemaJuda, futsi emaJuda lamanyenti abengawaphatsi kahle emaSamariya. Kodvwa-ke Jesu abengasinjalo. Abewaphatsa ngemusa, futsi boJakobe naJohane bekufanele bente lokufananako. Kodvwa labafundzi lababili bawatfukutselela emaSamariya langazange abemukele, futsi babuta Jesu: ‘Nkhosi, uyafuna yini sibite umlilo wehle ezulwini ubacedze bonkhe?’ Ucabanga kutsi Jesu watsini?— Wabekhuta, abatjela kutsi yimbi lentfo labayishoko. BoJakobe naJohane bekufanele bafundze kuba nemusa.

Lenye inkinga lenkhulu boJakobe naJohane labebanayo bekukufuna kubonakala babalulekile. Sekusele sikhashana kutsi Jesu afe, batfumela make wabo kuJesu, wafike watsi: “Yetsembisa kutsi lamadvodzana ami lamabili ayawuhlala, lenye ngesekudla sakho, lenye ngesancele sakho embusweni wakho.” Kwatsi lapho lalabanye baphostoli labalishumi beva loko lokwakwentiwe boJakobe naJohane, batfukutsela. Nawe bewutawutfukutsela yini?—

Mhlawumbe bewutawutiva kanjalo. Asitsandzi nangabe labanye bantfu batibeka embili futsi batenta lababalulekile. Ngemuva kwaloko, boJakobe naJohane babona kutsi bebente intfo lembi nalengaveti umusa, futsi bashintja. Baba baphostoli labanelutsandvo kanye nemusa lomkhulu. Yini lesingayifundza kuloku?—

Sifundvo lesisifundza kuJesu kutsi kufanele sibe nemusa kulabanye. Jesu abebaphatsa kahle bonkhe bantfu, kuhlanganise emadvodza, bafati, kanye nebantfwana. Utawetama yini kuhlale usikhumbula sibonelo sakhe futsi usilingise?—

Fundza eBhayibhelini lakho

Makho 3:17

Matewu 27:55, 56; Makho 15:40, 41

Matewu 4:18-22

Johane 4:4-15, 21-26; Lukha 9:51-55

Matewu 20:20-24; Makho 10:35-37, 41

[Umbhalo longentansi]