Jesu Uta NjengeNkhosi

NGEMUVA kwesikhashana nje avule emehlo etimphumphutse, Jesu waya kulomunye umuti losedvute neJerusalema. Watjela bafundzi bakhe lababili watsi: ‘Hambani niye edolobhaneni, nitawukhandza litfole lembongolo likhungiwe, nilikhumule nililetse lapha.’

Lapho sebabuyile nayo lembongolo, Jesu wayigibela waya eJerusalema. Nakangena edolobheni, sicumbi sebantfu samhlangabeta. Labanyenti babo bakhumula emajazi abo bawendlala emgwacweni. Labanye bajuba emagala etihlahla, nawo bawendlala emgwacweni, base bayamemeta batsi: ‘Ubusisiwe lota egameni laJehova!’

Kadzeni emakhosi lasandza kubekwa ka-Israyeli, abegibela imbongolo aye kubantfu kute atibonakalise. Nguloko naJesu lakwentako lapha. Labantfu bakhombisa kutsi bafuna Jesu abe yinkhosi yabo, kodvwa akusibo bonkhe labebafuna kutsi abe yinkhosi yabo. Loku singakubona kuloko lokwenteka ngesikhatsi Jesu asethempelini.

Ethempelini, Jesu welapha labakhubatekile, wavula nemehlo etimphumphutse. Kwatsi lapho bantfwana bakubona loku bamemeta bambonga futsi bamdvumisa. Kepha loku kwabatfukutselisa baphristi, futsi babuta Jesu batsi: ‘Uyabeva yini kutsi batsini labantfwana?’

Wabaphendvula watsi: ‘Yebo, ngiyeva. Anizange nifundze yini eBhayibhelini kutsi: “Emlonyeni webantfwana Nkulunkulu utilungiselele ludvumo?”’ Ngako-ke bantfwana bachubeka nekumdvumisa Jesu.

Asifuni yini tsine kufana nalabantfwana? Labanye bantfu bangase betame kusiyekelisa kukhuluma ngembuso waNkulunkulu. Kepha nobe kunjalo sitawuchubeka sitjela labanye ngetintfo letinhle Jesu latawutentela bantfu.

Kwakungasiso sikhatsi sekutsi Jesu acale kubusa emhlabeni. Siyawufika nini leso sikhatsi? Bafundzi baJesu bebafuna kwati ngaloku. Sitawufundza ngako esihlokweni lesilandzelako.