Umati Kahle Yini Nkulunkulu?

Kuba nelitfuba lekucoca nemuntfu losesikhundleni lesiphakeme kuyajabulisa. Bantfu labasetikhundleni bavame kubitwa kusetjentiswa emagama lafanana nalawa: “Mengameli,” “Wena waPhakathi” nobe “Mhlonishwa.” Nakwenteka umuntfu lomkhulu atsi kuwe “ngibite ngelibito lami,” uvele utive ungumuntfu sibili.

NKULUNKULU weliciniso usebentisa liVi lakhe liBhayibheli kute asitjele naku: “NginguSimakadze [Jehova]: lelo libito lami!” (Isaya 42:8) Nanobe aneticu letinyenti letifanana nanati “Umdali,” “Somandla” kanye “neMbusi Wendzawo Yonkhe,” Nkulunkulu uhlala njalo anika tinceku takhe litfuba lekutsi timbite ngelibito lakhe.

Nasi sibonelo: Umphrofethi Mosi wake wakhuluma ngekuncenga kuNkulunkulu watsi: ‘Awu, Jehova!’ (Eksodusi 4:10) Ngalesikhatsi kunikelwa lithempeli eJerusalema, iNkhosi Solomoni yacala umthandazo wayo ngemavi latsi: ‘Awu! Jehova.’ (1 Emakhosi 8:22, 23) Umphrofethi Isaya naye ngalesikhatsi akhulumela bantfu baka-Israyeli kuNkulunkulu, watsi: ‘Kodvwa wena, Jehova, unguBabe wetfu.’ (Isaya 63:16) Kuyacaca kutsi Babe wetfu losezulwini ufuna simbite ngelibito lakhe.

Kubita Jehova ngelibito lakhe kubalulekile, kodvwa kumati kufaka ekhatsi tintfo letinyenti. Mayelana nemuntfu lotsandza aphindze etsembe Jehova, naku lametsembisa kona: ‘Ngitamuvikela ngobe alati libito lami.’ (Tihlabelelo 91:14) Kuyacaca kutsi kunalokunyenti lokudzingekako kute sati Nkulunkulu, njengobe kunguyona ndlela yekutfola sivikelo sakhe. Ngako-ke, yini ledzingekako kute wati Jehova ngelibito lakhe?