Jehova Ungivule Emehlo
Njengobe ilandziswa ngu-Patrice Oyeka
Bekukusentsambama. Ngalelolanga bengicindzetelekile ngobe ngiyimphumphutse, nginesitunge. Bengisolo ngilalele umsakato. Ngabona kuncono kutsi ngitibulale kute ngiphumule kuloku-hlupheka. Ngatsela shevu enkomishini lenemanti ngayibeka embikwami etafuleni. Bengifuna kugeza kwekugcina, ngembatse kahle bese ngiyatibulala. Bengifuna kutibulalelani? Yini leyenta kutsi ngingasatibulali njengobe sengikucocela lendzaba?
NGATALWA nga-February 2, 1958, esifundzeni saseKasaï Oriental eDemocratic Republic of Congo. Ngafelwa ngubabe ngineminyaka leyimfica, ngabese ngikhuliswa ngumnaketfu lomdzala.
Ngemuva kwekucedza sikolwa, ngatfola umsebenti epulazini letihlahla te-rubber. Ngalelinye lilanga ekuseni nga-1989, ngisehhovisini lami ngibhala umbiko wasemsebentini, ngatikhandza ngisebumnyameni. Ekucaleni bengicabanga kutsi kuhambe gesi kodvwa bengiyiva injini yagesi idvuma futsi bekusesekuseni. Ngetfukile, kwafika engcondvweni yami kutsi angisaboni lutfo ngisho naloku lebengikubhala.
Ngekushesha ngabita lomunye wemadvodza lebengiwaphetse kutsi angiyise emtfolamphilo. Lendvodza yatsi kuncono ngimikiswe kudokotela lochwepheshile edolobheni. Nakabona lodokotela kutsi incenye lengemuva yemehlo ami (retina) idzabukile futsi simo sami sibucayi, wase ungitfumela esibhedlela lesisenhlokodolobha iKinshasa.
Kuphila EKinshasa
EKinshasa, ngaya kubodokotela bemehlo labanyenti kodvwa kute ngisho namunye lowakhona kungisita. Ngemuva kwekuhlala emalanga langu-43 esibhedlela, dokotela wangitjela kutsi ngitawuba yimphumphutse kuphila kwami konkhe. Ngemuva kwaloko, umndeni wakitsi wangimikisa emasontfweni lehlukehlukene kute ngelashwe ngendlela lesimangaliso, kodvwa kute lelakhona kungisita.
Ekugcineni, ngaphelelwa litsemba lekutsi ngiyawuphindze ngibone. Bengihlale ngicindzetelekile. Ngaba yimphumphutse ngaphindze ngaphelelwa ngumsebenti. Ngase ngilahlekelwa nangumfati lowangishiya watsatsa tonkhe tintfo lebesinato endlini. Ngativa nginemahloni ekuba semkhatsini webantfu. Ngatehlukanisa nebantfu futsi bengihlale ngitivalele endlini. Besengitihlalela ngedvwana futsi ngitiva ngiyintfo lengenamsebenti.
Ngetama emahlandla lamibili kutibulala. Umetamo wami wesibili ngulona lengikhulume ngawo ekucaleni kwalendzaba. Ngasindziswa ngumntfwana lomncane. Angakacondzi, watsatsa lenkomishi wacitsa loshevu ngalesikhatsi mine ngisageza. Ngiyabonga ngekutsi akazange awunatse loshevu. Ngaphoceka kakhulu nangingasayitfoli lenkomishi yami. Ngabese ngiyabatjela bakitsi kutsi bengiyifunelani lenkomishi nekutsi bengifuna kutibulala.
Ngibonga Nkulunkulu nemndeni wakitsi ngekunginakekela kwabo. Lisu lami lekufuna kutibulala alizange liphumelele.
Kuphindze Ngitfole Injabulo Ekuphileni
BekuliSontfo nga-1992, ngisekhaya ngitibhemela, ngavakashelwa boFakazi BaJehova lababili lebebashumayela emtini ngemuti. Batsi nababona kutsi ngiyimphumphutse bangifundzela Isaya 35:5, lotsi: “Emehlo etimphumphutse ayawuvuleka, netindlebe tetihhulu tiyawuva.” Ngajabula kakhulu nangiva lawomavi. BoFakazi abazange batsi batangelapha ngendlela lesimangaliso njengobe bebangitjela loko emasontfweni. Esikhundleni saloko, bangichazela kutsi ngitawuphindze ngibone eveni lelisha leletsenjiswa nguNkulunkulu yingci nje nangingafundza ngaye. (Johane 17:3) Ngekushesha ngacala kufundza liBhayibheli naboFakazi ngencwadzi letsi “Ungaphila Phakade Epharadesi Emhlabeni.” Ngacala nekuya kuyo yonkhe imihlangano yebuKhristu eHholweni LeMbuso ngaphindze ngagucula kuphila kwami. Ngakuyekela kubhema.
Kuba yimphumphutse, bekungenta ngingakhoni kutfutfuka kuloko lebengikufundza. Ngaya esikolweni salabangaboni kute ngifundze kufundza nekubhala i-Braille. Loku kwangenta ngakhona kutfola kuceceshwa eHholweni LeMbuso kute ngishumayele. Ngekushesha ngacala kushumayela kubomakhelwane. Ngacala kutfola injabulo ekuphileni. Ngachubeka ngitfutfuka ekukhonteni Jehova futsi nganikela kuphila kwami kuye. Ngabhajatiswa nga-May 7, 1994.
Njengobe lutsandvo lwami ngaJehova nangebantfu belukhula, ngaba nesifiso sekushumayela sikhatsi sonkhe. Kusukela nga-December 1, 1995, bengisolo ngilihlahlandlela lelivamile, ngicitsa sikhatsi lesinyenti ekushumayeleni. Nga-February 2004, ngacala kukhonta njengalomdzala ebandleni lakitsi. Ngaletinye tikhatsi emabandla lasedvutane nelibandla lakitsi, ayangimema kutsi ngitewetfula tinkhulumo letisekelwe eBhayibhelini. Tonkhe letibusiso tingenta ngijabule kakhulu futsi ngikhumbule kutsi kute luhlobo lwekukhubateka lolungasivimba kutsi sifeze sifiso setfu sekukhonta Nkulunkulu Jehova.
Jehova Ungiphe “Emehlo”
Njengobe ngike ngasho ekucaleni, umfati wami wangilahla ngesizatfu sekutsi ngiyimphumphutse, kepha Jehova ungiphe lesinye sibusiso. Ngendlela lekhetsekile, ungiphe emehlo kute ngibone. Anny Mavambu lowavuma kutsi ngibe yindvodza yakhe ngisho nome ngikhubatekile, sewungemehlo ami. Njengobe naye ashumayela sikhatsi sonkhe, uhlale ahamba nami nasiyoshumayela. Nguye longifundzela kwatiswa kwetinkhulumo tami kute ngikhone kubhala emaphuzu ami nge-Braille. Usibusiso lesikhulu kimi. Ngaye, ngibone kuba liciniso kwemavi eTaga 19:14 latsi: “Indlu nemcebo lifa lelitfolakala kubatali, kodvwa umfati lohlakaniphile utfolakala kuSimakadze.”
Jehova uphindze wasibusisa ngebantfwana lababili, umfana nentfombatane. Ngilangatelela liPharadisi lapho ngiyawubona khona buso babo! Lesinye sibusiso kutsi umnaketfu lomdzala lowasiniketa indzawo yakhe kutsi sihlale kuyo, wemukela liciniso leliBhayibheli futsi wabhajatiswa. Sonkhe sisebandleni linye.
Ngisho nome ngikhubatekile, sifiso sami lesisuka enhlitiyweni sikutsi ngente konkhe lokusemandleni ami kute ngikhonte Nkulunkulu ngobe ungibusise kakhulu. (Malakhi 3:10) Malanga onkhe ngithandazela kutsi uMbuso wakhe ufike ususe konkhe kuhlupheka emhlabeni. Njengobe sengimati Jehova, sengiyakwati kusho lamavi: “Sibusiso saSimakadze lesenta umuntfu acebe, akengeti kuhlupheka kuso.”—Taga 10:22.
[Titfombe ekhasini 15]
Ngetfula inkhulumo; nginemndeni wami nemnaketfu