Lokuvela Emtatjeni Wetfu
Kuhamba Nema-Pilgrim
“MINE angeke ngikhone kungena umuti nemuti!” Banyenti bafundzi beliBhayibheli labebativa kanjalo ngekushumayela kubantfu labangabati. Kodvwa lamavi langenhla ashiwo sikhulumi lesinalokuhlangenwe nako lebesingumfundzisi weliBhayibheli, sibitwa ngekutsi li-pilgrim.
Bafundzi labanyenti be-Zion’s Watch Tower labashiya emasontfo abo, bebafisa kuhlangana nalamanye emakholwa nawo labekanesifiso sekuva emaciniso eliBhayibheli. Lomagazini wakhutsata labafundzi kutsi bafune labanye labanekukholwa lokuligugu njengabo bese bahlangana ndzawonye kute batadishe liBhayibheli. Kusukela nga-1894, i-Watch Tower Society yatfumela bameleli labajikeletako kutsi baye kulamacembu lafuna kuvakashelwa. Ngemuva kwesikhatsi labameleli babitwa ngekutsi ngema-pilgrim. Bebangemadvodza lanalokuhlangenwe nako nalakhutsele, lakhetfwa ngobe abemnene, anelwati ngeliBhayibheli anemakhono lamahle ekukhuluma nekufundzisa futsi akhombisa kwetsembeka enhlawulweni yaJesu. Lama-pilgrim abehlala nalamacembu lilanga linye nobe mabili. Bafundzi beliBhayibheli labanyenti bacala umsebenti wekushumayela ngekuhambisa timemo tenkhulumo yelinyenti lebeyitawubekwa li-pilgrim. Ngemuva kwekubeka inkhulumo yakhe ntsambama kulesinye sikolwa, Hugo Riemer lowaba lilunga leSigungu Lesibusako waphendvula imibuto yeliBhayibheli kwaze kwaba sebusuku. Nobe abedziniwe, abejabulile futsi watsi lomhlangano “bewumuhle.”
I-The Watch Tower yachaza kutsi “injongo leyinhloko” yekuvakasha kwalabazalwane labajikeletako, bekukwakha “indlu yekukholwa” ngalemihlangano lebeyibanjelwa emakhaya alabanye bazalwane. Bafundzi beliBhayibheli labebahlala etindzaweni letisedvutane bebeta kutewulalela letinkhulumo neluhlelo lwemibuto netimphendvulo. Ngemuva kwaloko bekuba nelitfuba lekutsi emaKhristu angenise tihambi. Ngesikhatsi aseyintfombatana, Maude Abbott walalela inkhulumo yasekuseni, lokwatsi ngemuva kwayo bonkhe labebakhona bahlala ndzawonye etafuleni lelikhulu. Utsi: “Bekunekudla lokumnandzi lokunyenti—i-ham, inkhukhu leyosiwe, tinhlobonhlobo tesinkhwa, ema-pie nemakhekhe. Wonkhe umuntfu wadla watenetisa, kwatsi ngensimbi yesibili emini saphindze sahlangana kute silalele lenye inkhulumo. Ngaleso sikhatsi wonkhe umuntfu abesetela.” Benjamin Barton lowaba li-pilgrim sikhatsi lesidze watsi: ‘Kube bengidla tonkhe tibiliboco lebenginiketwa tona, ngabe kadze ngafa.’ Ngekuhamba kwesikhatsi, incwadzi levela endlunkhulu eBrooklyn yakhutsata bodzadze labebetama kwenta lokuhle kutsi kungaba ncono baphekele ema-pilgrim “kudla lokwetayelekile kwemalanga onkhe” futsi “bangawaphatamisi nawalele.”
Ema-pilgrim abephumelela ekufundziseni asebentisa emashadi, imifanekiso yetintfo letitsite nobe lokunye langakutfola kute acacise sihloko lakhuluma ngaso. Tinkhulumo taR. H. Barber “betijabulisa kakhulu.” W. J. Thorn abekhuluma njengababe lonelutsandvo, “njengemadvodza esikhatsi lesendlulile.” Ngalelinye lilanga ngesikhatsi Shield Toutjian ahamba ngemoto yeluhlobo lwe-Ford, wevakala asamemeta atsi: “Manini!” Waphuma ngekushesha emotweni wakha timbali wase ufundzisa labo labegibele nabo ngendalo yaJehova.
Bumatima bemsebenti wema-pilgrim bebubangela tinkinga letinyenti ikakhulukati kulabo lasebakhulile. Nobe kunjalo, kulabanye inkinga lenkhulu kwaba kushintja injongo yemsebenti wabo. Nyalo besekudzingeka kutsi kube ngibo labahamba embili ekushumayeleni umuti nemuti. Sicongosekulindza sangaMarch 15, 1924, satsi “umsebenti loyinhloko” wemaKhristu eliciniso “kuniketa bufakazi ngembuso. Ema-pilgrim atfunyelwe leyo njongo.”
Lamanye ema-pilgrim awazange ahambisane nalolushintjo ngobe awuyekela umsebenti wekujikeleta, lamanye aze atakhela awo emacembu enkholo. Robie D. Adkins walandzisa kutsi lomunye umzalwane loli-pilgrim lobesikhulumi lesihle washo emavi labuhlungu watsi: “Kuphela kwentfo lengikwati kuyenta kushumayela ngime endzaweni yesikhulumi. Mine angeke ngikhone kungena umuti nemuti!” Umzalwane Adkins uchubeka atsi: “Ngaphindze ngambona lomzalwane emhlanganweni wanga-1924 lowawuseColumbus, Ohio. Abebonakala angumuntfu losebuhlungwini, eme yedvwana ngaphansi kwesihlahla, angakajabuli emkhatsini wetinkhulungwane tebazalwane labajabulile. Angizange ngiphindze ngimbone ngemuva kwaloko. Wayishiya inhlangano.” Kulolunye luhlangotsi, “bazalwane labanyenti bebajabulile baphetse tincwadzi baya nato etimotweni tabo,” bebabonakala kutsi banenshisekelo yekufakaza emtini nemuti.—Imis. 20:20, 21.
Ngisho nobe ema-pilgrim lamanyenti abekwesaba kushumayela emtini nemuti njengalabazalwane lobekufanele babaceceshe, bewashumayela ngemdlandla. Maxwell G. Friend (Freschel) lobekali-pilgrim lelikhuluma siJalimane, wabhala mayelana nekushumayela emtini nemuti, watsi: “Lencenye yemsebenti wema-pilgrim iletsa tibusiso kuloluhambo lwetfu.” John A. Bohnet loli-pilgrim wabika kutsi bazalwane bakwemukela ngenhlitiyo yonkhe kugcizelelwa kwekushumayela ngeMbuso. Ngekusho kwakhe, bazalwane labanyenti “bebanenshisekelo yekuhamba embili kulomkhankaso.”
Kuyo yonkhe leminyaka, bazalwane labetsembekile labajikeletako babe sikhutsato lesihle kulabanye. Norman Larson losanesikhatsi lesidze anguFakazi watsi: “Tinzuzo tekuba nema-pilgrim betibonakala, ngisho nangesikhatsi ngisesengumfana lomncane. Kunyenti lakwenta kute angisite ngihambe endleleni lefanele.” Ngisho nalamuhla, babonisi labajikeletako labetsembekile nalabatinikelako basita lamanye emakholwa kutsi atsi: “Singakhona kungena umuti nemuti!”
[Emavi lacashuniwe lasekhasini 32]
Bekulilanga lelijabulisako ngesikhatsi kufika ema-pilgrim!
[Sitfombe ekhasini 31]
Luhambo lwaBenjamin Barton lwanga-1905 belufaka ekhatsi tindzawo letingu-170
[Sitfombe ekhasini 32]
Walter J. Thorn abeli-pilgrim, atiwa ngekutsi nguPappy ngobe abengubabe lonelutsandvo futsi anesimo sengcondvo lesifana nesaKhristu
[Sitfombe ekhasini 32]
J. A. Browne watfunyelwa kutsi abe li-pilgrim eJamaica ngabo-1902 kute acinise futsi akhutsate emacembu langu-14 lamancane
[Sitfombe ekhasini 32]
Umsebenti wema-pilgrim bewakha kukholwa, ucinisa bunye bebuKhristu futsi wenta bazalwane basondzelane nenhlangano