Kungani Kunekuhlupheka Lokungaka?
Kute sicondze sizatfu sekutsi kube nekuhlupheka lokungaka nesekutsi imetamo yebantfu yekukucedza ingaphumeleli, kufanele sitfole kutsi yini lekubangelako. Nanobe tintfo letibangela kuhlupheka tehlukahlukene futsi kumatima kuticondza, kuyajabulisa kutsi liBhayibheli lingasisita sitibone. Kulesihloko sitawuhlola tizatfu letisihlanu letiyinhloko letenta kutsi kube nekuhlupheka lokungaka. Siyakumema kutsi uhlolisise loko liBhayibheli lelikushoko futsi ubone indlela liVi laNkulunkulu lelisisita ngayo kutsi sicondze loko lokubangela lenkinga lengaka.—2 Thimothi 3:16.
IMIPHUMELA YEKUBUSA KWEMIBUSO LEMIBI
LiBhayibheli litsi: “Nakubusa bantfu lababi, bantfu bayakhonona.”—Taga 29:2.
Umlandvo wonkhe usitjela ngebabusi labacindzetelako lebebabusa ngelunya, futsi babangela bantfu babo kuhlupheka lokukhulu. Kuliciniso kutsi akusibo bonkhe babusi labanjalo. Labanye kungenteka bebabafisela lokuhle bantfu babo. Nanobe kunjalo, nasebasetikhundleni tifiso tabo tivame kuphatanyiswa kuphikisana nekulwela tikhundla. Kulokunye bangase balisebentise kabi ligunya labo kute batizuzise bona bese kulimala bantfu. Henry Kissinger lowake waba yiNdvuna Yelitiko Letangaphandle eMelika, watsi: “Umlandvo usitjela ngemetamo yebantfu lengazange iphumelele kanye netifiso letingazange tifezwe.”
LiBhayibheli liphindze litsi: “Akusiko kwemuntfu kutsi aticondzisele yena tinyatselo takhe.” (Jeremiya 10:23) Bantfu labanesono bete kuhlakanipha lokudzingekako nelikhono lekubona tintfo kusengembili kute bakwati kwenta tintfo ngendlela lephumelelako. Njengobe bantfu bangakhoni kucondzisa tinyatselo tabo, bangaticondzisa njani-ke tinyatselo tesive sonkhe? Uyabona yini kutsi kungani babusi behluleka kucedza kuhlupheka? Ecinisweni, etikhatsini letinyenti bohulumende lababi nobe imibuso, ngibo lababangela kuhlupheka.
KUYENGA KWENKHOLO YEMANGA
Jesu watsi: “Nangabe nitsandzana, bonkhe batawukwati kutsi nibafundzi bami.”—Johane 13:35.
Baholi bato tonkhe tinkholo bashumayela mayelana nelutsandvo nebunye. Liciniso likutsi behlulekile kwenta balandzeli babo kutsi babe nelutsandvo lolucinile lolungakhona kucedza kubandlululana. Kunekutsi isite bantfu babe nelutsandvo, inkholo ngiyo levame kubangela kwehlukana, kubandlululana kanye nekungevani emkhatsini webantfu netive letehlukahlukene. Esiphetfweni sencwadzi yakhe letsi “Christianity and the World Religions,” Hans Küng losati senkholo wabhala: “Tiphitsiphitsi tetembusave letinkhulu kakhulu naletigcwele kukhohlakala nguleto inkholo letigcugcutelako, itibangele futsi itivumele.”
Ngetulu kwaloko, bafundisi betinkholo letinyenti bakuvumele kulalana kwebantfu labangakashadi, kuphinga kanye nebunkonkoni. Loku kubangele kwandza kwetifo, kukhishwa kwetisu, kukhulelwa lokungakahlelwa, imishado lecitsekako kanye nemindeni lebhidlikako, lokutintfo letibangela buhlungu nelusizi lolukhulu.
KUBA NESONO KWEBANTFU NETIFISO TEBUGOVU
“Nguloyo naloyo ulingwa ngekuhungwa nangekuyengwa sifiso sakhe. Ngako sifiso nasesakhekile siveta sono.”—Jakobe 1:14, 15.
Ngenca yesono lesasitfola njengelifa, sonkhe siyawenta emaphutsa, siyaphambuka futsi kudzingeka silwe nesifiso ‘sekwenta lokufiswa yinyama.’ (Efesu 2:3) Lapho kuvela litfuba lwekwenta ngekuvumelana nesifo lesibi, kungaba matima kakhulu kulwisana naso. Nasincotjwa ngulesifiso, kuba nemiphumela lebuhlungu.
P. D. Mehta longumbhali watsi: “Kuhlupheka lokunyenti kubangelwa tinkhanuko tetfu, kufuna kwetfu injabulo nekutenetisa ngendlela lengalawuleki, bugovu kanye netifiso tetfu.” Tonkhe tinhlobo tekukhanuka nekwehluleka kutibamba—lokufaka ekhatsi tjwala, tidzakamiva, kugembula, kuya ecansini, nalokunye lokunyenti—tonakalise bantfu labanyenti labahlonishwako futsi tayiletsela kuhlupheka imindeni yabo, bangani kanye nalabanye. Nasicabanga ngekuba nesono kwebantfu, siyavumelana naloko liBhayibheli lelikushoko, kutsi: “Kumelula nganobe ngubani kubona kutsi kulesikhatsi sanyalo konkhe lokuphilako kuyalila ngenca yetinkinga temhlaba wonkhe.”—Roma 8:22, i-“The New Testament in Modern English,” ya–J. B. Phillips.
EMANDLA EMIMOYA LEMIBI
LiBhayibheli litsi Sathane ‘ungunkulunkulu walelive,’ futsi ukanye nemimoya lemibi lenemandla lebitwa ngekutsi ngemadimoni.—2 Khorinte 4:4; Sembulo 12:9.
NjengaSathane, emadimoni aphishanekile afuna kulawula nekuyenga bantfu. Umphostoli Pawula wakuvuma loko ngesikhatsi atsi: “Siyalwa, kodvwa asilwi nengati nenyama, kepha silwa nabohulumende, nalabanemagunya, nebabusi balelive lebumnyama, kanye nemabutfo emimoya lemibi etindzaweni tasezulwini.”—Efesu 6:12.
Nanobe emadimoni akujabulela kuhlupha bantfu, lowo akusiwo umgomo wawo loyinhloko. Afisa kwenta bantfu bashiye Jehova, longuNkulunkulu Losetikwako Konkhe. (Tihlabelelo 83:18, NW) Imikhuba lefaka ekhatsi kufundza tinkhanyeti, kwenta imilingo, kutsakatsa kanye nekubiketela ngelikusasa, inguletinye tindlela emadimoni latisebentisako kute ayenge bantfu futsi abalawule. Kungaleso sizatfu Jehova asecwayisa ngaletingoti futsi abavikela bonkhe labamelana naSathane nemadimoni.—Jakobe 4:7.
SIPHILA “EMALANGENI EKUGCINA”
Eminyakeni lengaba tinkhulungwane letimbili leyendlulile, liBhayibheli labiketela: “Yati kutsi emalangeni ekugcina kutawuba netikhatsi letibucayi lokumatima kubhekana nato.”
Nalichaza loko lokwenta letikhatsi tibe bucayi, liBhayibheli lichubeka litsi: “Ngobe bantfu batawutitsandza bona, batsandze imali, batigabatise, batigcabhe, . . . babe bete lutsandvo, bangavumi kwenta tivumelwane, banyundzele, bangatibambi, babe nelulaka, bangakutsandzi lokuhle, batsengise ngalabanye, babe nenkhani, bagcwale umgcabho, batsandze injabulo kunekutsandza Nkulunkulu.” Kuyacaca kutsi sizatfu lesiyinhloko sako konkhe kuhlupheka lesikubona lamuhla kutsi siphila “emalangeni ekugcina.”—2 Thimothi 3:1-4.
Nasicabanga ngako konkhe lesesikhulume ngako, asicaci yini sizatfu lesenta bantfu behluleke kucedza kuhlupheka ngisho nobe bangaba netinhloso letinhle kangakanani? Singalutfolaphi-ke lusito? Kufanele setsembele kuMdali wetfu, lowetsembise kutsi ‘utawubhidlita imisebenti yaDeveli’ nebalandzeli bakhe. (1 Johane 3:8) Sihloko lesilandzelako sitawuchaza loko Nkulunkulu latawukwenta kute acedze tonkhe tintfo letibangela kuhlupheka.