IMIBUTO YELIBHAYIBHELI IYAPHENDVULWA
Tonkhe tinkholo tiyamdvumisa yini Nkulunkulu?
Kungenteka unakile kutsi nawulalela tindzaba temhlaba ukhandza kutsi tintfo letimbi ngaletinye tikhatsi tentiwa egameni lenkholo. Akusito tonkhe tinkholo letivela kuNkulunkulu weliciniso. (Matewu 7:15) Ecinisweni bantfu labanyenti badukisiwe.—Fundza 1 Johane 5:19.
Nobe kunjalo, Nkulunkulu uyababona bantfu labacotfo labakutsandzako lokuhle nalokuliciniso. (Johane 4:23) Nkulunkulu umema bantfu labanjalo kutsi bafundze liciniso eVini lakhe, liBhayibheli.—Fundza 1 Thimothi 2:3-5.
Ungayibona njani inkholo yeliciniso?
Jehova Nkulunkulu ubahlanganisa ndzawonye bantfu labesuka etinkholweni letinyenti letehlukahlukene ngekubafundzisa liciniso nangekubafundzisa kutsi batsandzane. (Mikha 4:2, 3) Loko kwenta kutsi ukhone kubona bantfu labasenkholweni yeliciniso ngendlela labakhatsalelana ngayo.—Fundza Johane 13:35.
Jehova Nkulunkulu uhlanganisa tonkhe tinhlobo tebantfu ekukhonteni kweliciniso.—Tihlabelelo 133:1
Kukholwa kwebantfu labakhonta Nkulunkulu ngeliciniso kanye nendlela yabo yekuphila kusekelwe eBhayibhelini. (2 Thimothi 3:16) Bayalihlonipha nelibito laNkulunkulu. (Tihlabelelo 83:18, NW) Baphindze bamelele uMbuso waNkulunkulu njengobe ukuphela kwelitsemba lebantfu. (Danyela 2: 44) Balingisa Jesu ngekutsi bente ‘kukhanya kwabo kukhanye,’ futsi bente lokuhle kubomakhelwane babo. (Matewu 5:16) Ngako-ke emaKhristu eliciniso abonakala ngekuvakashela bomakhelwane babo emakhaya ngenjongo yekubacocela tindzaba letimnandzi teMbuso waNkulunkulu.—Fundza Matewu 24:14; Imisebenti 5:42; 20:20.