SIHLOKO LESINGUMGOGODLA | TINGILOSI—TIKHONA MBAMBA YINI? KUNGANI KUBALULEKILE KUTSI SATI?
Tingasisita Njani Tingilosi?
Tingilosi letetsembekile tiyakunaka loko lokwentiwa bantfu futsi tenta konkhe letingakwenta kute kugcwaliseke injongo yaJehova. Ngesikhatsi Nkulunkulu adala umhlaba, tingilosi tahlabela “kanyekanye, netingilosi tonkhe tihlatjeleliswa kujabula.” (Jobe 38:4, 7) Kusukela kadzeni, tingilosi betisolo tilangatelela ‘kubona’ kugcwaliseka kwetiphrofetho letimayelana nelikusasa lelihle lemhlaba.—1 Phetro 1:11, 12.
LiBhayibheli lisitjela kutsi ngaletinye tikhatsi, tingilosi tivikela tikhonti teliciniso kute kufezeke intsandvo yaNkulunkulu. (Tihlabelelo 34:7) Nati tibonelo:
Ngesikhatsi Jehova abhubhisa iSodoma neGomora, tingelosi tasita Loti lotsembekile nemndeni wakhe kutsi babaleke.—Genesisi 19:1, 15-26.
EBhabhulona yasendvulo, emaHebheru lamatsatfu lebekasemasha agwetjelwa kufa ngekutsi aphonswe emlilweni lowesabekako, kodvwa Nkulunkulu watfumela ‘ingilosi yakhe kutsi itewulamlela letinceku takhe.’—Danyela 3:19-28.
Ngemuva kwekutsi Danyela, indvodza lelilungile, icitse busuku bonkhe emgodzini lonemabhubesi lebekalambile, watsi usindze ngobe “Nkulunkulu utfumele ingilosi yakhe, lefike yavala imilomo yemabhubesi.”—Danyela 6:16, 22.
Tingilosi tinemlandvo wekusita bantfu labatsembekile
TINGILOSI TASEKELA LIBANDLA LEBUKHRISTU LANGELIKHULU LEKUCALA
Ngaletinye tikhatsi, titfunywa taNkulunkulu letitingilosi betiba nesandla emisebentini lebeyentiwa ebandleni lebuKhristu langelikhulu lekucala nakunesidzingo, kute kugcwaliseke injongo yaJehova. Cabanga ngaloku:
Ingilosi yavulela baphostoli lebebatiboshwa iminyango yasejele futsi yabatjela kutsi abachubeke nemsebenti wekuyoshumayela ethempelini.—Imisebenti 5:17-21.
Ingilosi yatjela umvangeli Filiphu kutsi aye emgwacweni lolihlane lebewusuka eJerusalema uye eGaza, kute ashumayele umTopiya lebekayokhonta eJerusalema.—Imisebenti 8:26-33.
Ngesikhatsi saNkulunkulu sekutsi bantfu lebebangesiwo emaJuda sale baba ngemaKhristu, ingilosi yabonakala kuKhoneliyuse, umphatsi wemphi wemaRoma, futsi yatsi akabite umphostoli Phetro kutsi ete ekhaya lakhe lomphatsi.—Imisebenti 10:3-5.
Ngesikhatsi umphostoli Phetro asejele, ingilosi yeta kuye futsi yamkhiphela ngephandle kwelijele.—Imisebenti 12:1-11.
TINGASISITA NJANI TINGILOSI?
Kute bufakazi lobukhombisa kutsi esikhatsini setfu Nkulunkulu usatisebentisa tingilosi ngalokusimangaliso kute tisite bantfu njengobe kuchazwa eBhayibhelini. Nobe kunjalo, ngalokuphatselene nesikhatsi setfu, Jesu watsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.” (Matewu 24:14) Bewati yini kutsi balandzeli baJesu benta lomsebenti ngekucondziswa tingilosi?
Tingilosi tisita kutsi kushunyayelwe tindzaba letimnandzi emhlabeni wonkhe
Incwadzi yeSembulo iveta kutsi tingilosi betitawusita bantfu emhlabeni wonkhe kute bafundze ngaJehova Nkulunkulu kanye nangenjongo yakhe ngesintfu. Umphostoli Johane wabhala watsi: “Ngabona lenye ingilosi indiza emoyeni, inetindzaba letimnandzi taphakadze lokwakufanele itimemetele kulabo labahlala emhlabeni, kuto tonkhe tive, tinhlanga, tilwimi, nebantfu, itsi ngelivi lelikhulu: “Mesabeni Nkulunkulu nimnike inkhatimulo, ngobe sikhatsi sakhe sekwehlulela sesifikile, ngako khontani Loyo lowadala lizulu, umhlaba, lwandle, kanye nemitfombo yemanti.’” (Sembulo 14:6, 7) Tintfo letinyenti letentekako tibufakazi bekutsi tingilosi tiyawusekela umsebenti wekushumayela ngeMbuso lowentiwa emhlabeni wonkhe. Ngako-ke, nangabe soni siphendvuka futsi sibuyela kuJehova, “tingilosi taNkulunkulu tiyajabula.”—Lukha 15:10.
Yini letawubese iyenteka nasewuphelile lomsebenti wekushumayela? Libutfo letingilosi letisezulwini litawusekela Jesu Khristu loyiNkhosi yemakhosi “emphini yelilanga lelikhulu laNkulunkulu Somandla,” i-Amagedoni. (Sembulo 16:14-16; 19:14-16) Letingilosi letinemandla nato tiyolekelela ekubhujisweni kwebantfu lababi ngesikhatsi iNkhosi Jesu iletsa “imphindziselo kulabo labangamati nakulabangatilaleli tindzaba letimnandzi letimayelana neNkhosi yetfu Jesu.”—2 Thesalonika 1:7, 8.
Ngako-ke, ciniseka kutsi letingilosi tiyakukhatsalela. Tiyakujabulela kusita labo labanesifiso sekukhonta Nkulunkulu, futsi Jehova utisebentise kanyenti kute ticinise futsi tivikele tikhonti takhe letetsembekile emhlabeni.—Hebheru 1:14.
Ngako, ngamunye wetfu kufanele ente sincumo lesibalulekile. Sitawutilalela yini siphindze sitihloniphe letindzaba letimnandzi letishunyayelwa emhlabeni wonkhe? BoFakazi BaJehova labasendzaweni yangakini bangakujabulela kukusita kutsi utfole tibusiso tekusitwa tingilosi taNkulunkulu letinelutsandvo.