Yini Lebangela Lomjikeleto Wekuzondana?

Yini lebangela lomjikeleto lomubi wekuzondana emhlabeni? Kuze sati kutsi yini lebangela kuzondana, kufanele sati kutsi iyini inzondo, yini leyenta bantfu bacale kuzondana kanye nekutsi yandza njani.

Iyini Inzondo?

Inzondo ngumuva lonemandla wekungamtsandzi lomunye umuntfu nobe licembu lebantfu. Akusiko nje kutfukutselela umuntfu kwesikhashana.

YINI LEYENTA BANTFU BACALE KUZONDANA?

Tinyenti tizatfu letenta bantfu bacale kuzondana. Bangazonda labanye bantfu ngenca yaloko labangiko, hhayi ngobe kukhona lokutsite labakwentile. Labo labazonda labanye bangabazonda ngenca yekutsi bacabanga kutsi benta tintfo letimbi, bafuna kubalimata nobe angeke baze bashintje. Bangabatsatsa njengalabangakabaluleki, labayingoti nobe labababangela tinkinga. Labo labazonda labanye kungenteka bake bahlukubeteka, baphatfwa ngekungalungi nobe letinye tintfo letabenta baba nenzondo.

YANDZA NJANI INZONDO?

Ngaletinye tikhatsi bantfu bazonda labanye bantfu labangabati nekubati. Sibonelo nje, umuntfu angazonda labanye ngenca nje yekutsi umndeni nebangani bakhe bayabazonda. Ngako-ke, inzondo yandza ngaleyondlela.

Nasicondza indlela inzondo leyandza ngayo, sitawucondza nekutsi yini leyenta bantfu labangaka bazondane. Nobe kunjalo, kuze sincobe inzondo legcwele emhlabeni, kufanele sati kutsi yacala njani. Loko singakutfola ngekutsi sifundze liBhayibheli.

LIBHAYIBHELI LIYAVETA KUTSI YACALA NJANI INZONDO

Sitfombe sema-arrow lamelela tintfo letibangela umjikeleto wenzondo. 1. Tindzaba Letingemanga letivela kubantfu lobetayele, kutekuchumana, nasetindzabeni. 2. Kungati lisiko, buhlanga nobe inkholo. 3. Kwesaba lushintjo, kulahlekelwa nobe tintfo longatati. 4. Inzondo lefaka ekhatsi lubandlululo, kukhetsa kanye nebudlova.

INZONDO LEHAMBISANA NELUNYA AYIZANGE ICALISWE BANTFU. Yacala ngesikhatsi Sathane Develi, lobekayingilosi ezulwini, avukela Nkulunkulu. Develi waba ‘ngumbulali kusukela acala’ kuvukela. ‘Njengemcambimanga nababe wemanga,’ uchubekile abangela inzondo nebudlova. (Johane 8:44; 1 Johane 3:11, 12) LiBhayibheli limchaza ngekutsi unelunya, utfukutsele futsi uneludlame.—Jobe 2:7; Sembulo 12:9, 12, 17.

KUMELULA KUTSI BANTFU LABANESONO BAZONDANE. Umuntfu wekucala, Adamu, walingisa Sathane ngekutsi one. Ngenca yaloko, bonkhe bantfu batfola sono. (KubaseRoma 5:12) Khayini, indvodzana ya-Adamu yekucala, bekamzonda umnakabo Abela waze wambulala. (1 Johane 3:12) Kuliciniso kutsi labanye bantfu bakhombisa kutsi banelutsandvo neluvelo, kodvwa ngenca yekuba nesono, bantfu labanyenti baticabangela bona, banemona futsi bayatikhukhumeta, lokubenta babe nenzondo.—2 KuThimothi 3:1-5.

UMUNTFU LONGABATSANDZI BANTFU LABEHLUKILE KUYE, KUMELULA KUTSI ABE NENZONDO. Lelive lesiphila kulo lenta bantfu babe nenzondo ngekutsi likhutsate kungavelani kanye netento letilimata labanye. Kugcwele kungabatsandzi bantfu labehlukile, lubandlululo, kwetfuka inhlamba, kuhlupha labanye kanye nekulimata tintfo tebantfu ngenca yekutsi “lonkhe live lisemandleni alomubi,” longuSathane Develi.—1 Johane 5:19.

Nobe kunjalo, liBhayibheli aligcini nje ngekuveta umsuka wenzondo, kodvwa liphindze livete nelikhambi.