Lutsandvo Lusisita Njani Kutsi Sincobe Kwesaba?

1. Ngutiphi letinye tintfo labanye bantfu labatesabako?

CABANGA nganaku lokwenteka mbamba. Nestor nemkakhe María, bebafuna kuyokhonta lapho kunesidzingo lesikhulu khona sebamemeteli.b Kodvwa kuze bakhone kukwenta loko, bekudzingeka bashintje indlela bebaphila ngayo. Kepha bebesaba kutsi angeke bajabule nabanemali lencane. Ngesikhatsi Biniam aba nguFakazi waJehova eveni lapho umsebenti wetfu uvinjelwe khona, wabona kutsi njengobe bekasikhonti saNkulunkulu, bekungenteka naye aphatfwe kabi. Loko kwamenta wesaba. Kodvwa lebekakwesaba kakhulu kutsi umndeni wakubo bewutawutiva njani nawuva ngalenkholo yakhe lensha. Valerie watjelwa kutsi unamdlavuza loyingoti kakhulu, futsi bekumatima kutfola dokotela lotihloniphako tinkholelo takhe letisekelwe eBhayibhelini letimayelana nengati. Ngetulu kwaloko, bekesaba kutsi kungenteka afe.

2. Kudzingeke ngani kutsi sincobe kwesaba?

² Ukile yini wativa ngalendlela? Labanye betfu bakile. Nangabe singakuncobi kwesaba, kungenteka sente tincumo letikabi letingalimata buhlobo betfu naJehova. Nguloko kanye Sathane lakufunako. Wetama kusebentisa kwesaba lesinako kuze asente singayilaleli imitsetfo yaJehova, lefaka ekhatsi umyalo wekushumayela tindzaba letimnandzi. (Semb. 12:17) Sathane mubi, unelunya, futsi unemandla kodvwa ungativikela kuye. Kanjani?

3. Yini lengasisita sincobe kwesaba?

³ Nangabe siciniseka kutsi Jehova uyasitsandza futsi utawuhlale asisekela, Sathane angeke asente sesabe. (Hla. 118:6) Sibonelo nje, umbhali weTihlabelelo 118 wabhekana netimo betimcindzetela kakhulu. Bekanetitsa letinyenti, letifaka ekhatsi labanye lebebasetikhundleni letisetulu (emavesi 9, 10). Ngaletinye tikhatsi wabhekana netimo letimatima kakhulu (livesi 13). Ngetulu kwaloko, Jehova wamjezisa kakhulu (livesi 18). Nanobe kunjalo, lomhlabeleli wahlabela watsi: “Angeke ngesabe.” Yini leyamenta wativa avikelekile? Bekati kutsi nanobe Jehova amjezisile, Babe wakhe wasezulwini bekamtsandza kakhulu. Umhlabeleli bekaciniseka kutsi ngisho angabhekana nasiphi simo, Nkulunkulu wakhe lomtsandzako bekatawuhlale amsita.—Hla. 118:29.

4. Ngukuphi kwesaba lesingakuncoba nangabe setsemba kutsi Nkulunkulu uyasitsandza?

⁴ Kufanele siciniseke kutsi Jehova uyasitsandza. Nasiciniseka ngaloko, sitawukhona kuncoba nati tintfo letintsatfu lesivame kutesaba, (1) kwesaba kutsi angeke sikhone kunakekela umndeni wetfu, (2) kwesaba bantfu (3) nekwesaba kufa. Labazalwane nabodzadze lesicoce ngabo ekucaleni bakhona kuncoba kwesaba kwabo ngobe bebaciniseka kutsi Nkulunkulu uyabatsandza.

KWESABA KUTSI ANGEKE UKHONE KUNAKEKELA UMNDENI WAKHO

5. Yini inhloko yemndeni lokungenteka ikhatsateke ngako? (Buka sitfombe lesisekhasini lekucala.)

⁵ Inhloko yemndeni lengumKhristu iwutsatsa njengalobalulekile umsebenti wayo wekunakekela umndeni wayo. (1 Thim. 5:8) Nangabe uyinhloko yemndeni, kungenteka ngesikhatsi se-COVID-19 bewukhatsateke ngekutsi kungenteka ulahlekelwe ngumsebenti wakho. Mhlawumbe bewukhatsateka nangekutsi angeke ukhone kondla umndeni wakho nobe kuwunika indzawo yekuhlala. Kungenteka futsi bewesaba kutsi nawungalahlekelwa ngumsebenti wakho angeke uze uwutfole lomunye. NjengaNestor naMaria lesike sakhuluma ngabo, kungenteka bewucabanga kutsi angeke ukhone kuphila ngemali lencane. Sathane uphumelele kakhulu ekusebentiseni kwesaba lokunjengaloku.

6. Yini Sathane letama kusenta siyikholelwe?

⁶ Sathane wetama kusenta sikholwe kutsi Jehova akanendzaba natsi nekutsi angeke asisite sinakekele imindeni yetfu. Ngenca yaloko, singahle sicabange kutsi kudzingeka sente konkhe lesingakwenta kuze singalahlekelwa yimisebenti yetfu ngisho loko kungasho kungatinaki timiso letiseBhayibhelini.

7. Yini Jesu lasicinisekisa ngayo?

⁷ Njengobe Jesu amati kahle Babe wakhe kunanobe ngubani lomunye, uyasicinisekisa kutsi Nkulunkulu wetfu ‘uyatati tintfo lesitidzingako ngisho nobe sisengakaticeli.’ (Mat. 6:8) Jesu uyati kutsi Jehova uhlale akulungele kusinika loko lesikudzingako. Ngenca yekutsi singemaKhristu, singemalunga emndeni waNkulunkulu. Njengobe Jehova ayiNhloko yalomndeni, siyaciniseka kutsi utawukwenta loko lakutjela tinhloko temindeni kutsi tikwente ku-1 KuThimothi 5:8.

8. (a) Yini letasisita sincobe kwesaba kutsi angeke sikhone kunakekela imindeni yetfu? (Matewu 6:31-33) (b) Singabalingisa njani laba labashadene labakulesitfombe labapha lodzadze kudla?

⁸ Nasiciniseka kutsi Jehova uyasitsandza, nekutsi uyawutsandza umndeni wetfu, sitawetsemba kutsi utasinika tintfo lesitidzingako. (Fundza Matewu 6:31-33.) Jehova unguMnakekeli lowephanako nalonelutsandvo, futsi uyafuna kusipha tintfo lesitidzingako! Ngesikhatsi adala umhlaba, akagcinanga nje ngekusinika tintfo lesitidzingako kuze siphile, kodvwa wadala netintfo letinyenti letitawusenta sijabule. (Gen. 2:9) Ngisho nobe sinaloko lesikudzingako kuphela, kufanele sikhumbule kutsi sinako ngobe Jehova uyasinakekela. (Mat. 6:11) Kufanele sikhumbule nekutsi ngisho nobe singadzela ini nyalo, angeke kucatsaniswe naloko Nkulunkulu wetfu lositsandzako lasipha kona, nalatawusipha kona esikhatsini lesitako. Nguloko Nestor naMaría labakubona.—Isa. 65:21, 22.

9. Yini longayifundza esibonelweni saNestor naMaría?

⁹ Nestor naMaría bebatiphilela kahle eColombia. Batsi: “Sacabanga ngekwenta kuphila kwetfu kube melula futsi sentele Jehova lokunyenti. Kodvwa besesaba kutsi angeke sijabule nasinemali lencane.” Yini leyabasita kutsi bancobe lokwesaba? Bacabanga ngetindlela letinyenti Jehova labakhombise ngato kutsi uyabatsandza. Ngenca yekutsi bebaciniseka kutsi utawubanakekela, bayekela umsebenti wabo lobewuholela kahle. Batsengisa likhaya labo futsi batfutsela endzaweni lapho kunesidzingo lesikhulu khona sebamemeteli kulelive. Bativa njani ngalesincumo labasenta? Nestor utsi: “Sikubonile kuba liciniso kwemavi lakuMatewu 6:33. Asikake seswela lutfo, futsi sijabule kakhulu.”

KWESABA BANTFU

10. Ngusiphi sizatfu lesenta bantfu babesabe labanye?

¹⁰ Bantfu banemlandvo lomubi wekuphatsa kabi labanye. (Shu. 8:9) Sibonelo nje, labasemagunyeni balisebentisa kabi ligunya labo, tigebengu tenta tintfo letimbi, esikolweni labanye bantfwana baphatsa kabi labanye futsi labanye bantfu baphatsa kabi ngisho nemalunga emindeni yabo. Kungako nje bantfu babesaba labanye bantfu! Sathane ukusebentisa njani loku?

11-12. Sathane ukusebentisa njani kwesaba bantfu?

¹¹ Sathane usebentisa kwesaba bantfu kuze etame kusenta kutsi siyekele kushumayela nekwenta letinye tintfo Jehova lacela kutsi sitente. Ngetulu kwaloko, Sathane wente labanye bohulumende bavimbela umsebenti wetfu futsi basiphatsa kabi. (Luk. 21:12; Semb. 2:10) Kulelive laSathane, bantfu labanyenti basakata tindzaba letingemanga ngaBoFakazi BaJehova. Bantfu labawetsembako lamanga bangahlekisa ngatsi nobe baze basiphatse kabi. (Mat. 10:36) Kuyasimangalisa yini loku lokwentiwa nguSathane? Cha. Loku bekavele akwenta nakumaKhristu ekucala.—Imis. 5:27, 28, 40.

¹² Sathane akasebentisi nje kuphela kwesaba kuphikiswa bohulumende. Labanye bayesaba kutsi emalunga emindeni yabo atawutsini nababa boFakazi, loku bakwesaba kakhulu kwendlula kuphatfwa kabi. Batitsandza kakhulu tihlobo tabo futsi bafuna timati Jehova futsi timtsandze. Kubavisa buhlungu kuva tihlobo tabo tikhuluma kabi ngaNkulunkulu weliciniso nangetikhonti takhe. Nobe kunjalo, kuletinye timo tihlobo lebetiphikisa, ngekuhamba kwesikhatsi tigcine tilemukele liciniso. Kodvwa sitawukwenta njani nangabe emalunga emndeni angasafuni lutfo loluphatselene natsi ngenca yekutsi sesiboFakazi?

13. Kuciniseka ngekutsi Nkulunkulu uyasitsandza kungasisita njani nasiphikiswa ngemalunga emndeni? (Tihlabelelo 27:10)

¹³ Angasidvudvuta emavi lamnandzi lakuTihlabelelo 27:10. (Fundza.) Nasikhumbula kutsi Jehova usitsandza kanganani, angeke sesabe kutsi kutawentekani kitsi nasiphikiswa. Siyaciniseka nekutsi utasibusisa ngenca yekucinisela kwetfu. Jehova utawusipha konkhe lesikudzingako kuze siphile, asisite sibe nekuthula futsi sijabule, utawuphindze asisite sihlale sisondzelene naye, kwendlula indlela lomunye langasisita ngayo! Nguloko lokwenteka kuBiniam, lesikhulume ngaye.

14. Yini longayifundza esibonelweni saBiniam?

¹⁴ Biniam waba nguFakazi waJehova nanobe bekati kutsi angahle aphatfwe kabi kakhulu. Kwati kutsi Jehova uyamtsandza kwamsita njani kutsi ancobe kwesaba bantfu? Biniam utsi: “Ngaphatfwa kabi kakhulu kwendlula indlela lebengicabanga ngayo. Kodvwa bengesaba kakhulu kuphikiswa ngumndeni wakitsi kunekuphikiswa nguhulumende. Bengesaba kutsi sincumo sami sekuba nguFakazi besitamdvumata babe lebekangasuyeFakazi, nekutsi emalunga emndeni wakitsi bekatawucabanga kutsi ngisehluleki.” Nobe kunjalo, Biniam bekaciniseka kutsi Jehova uhlale abanakekela labo labatsandzako. Biniam uchubeka utsi: “Ngacabanga ngekutsi Jehova ubasite njani labanye nababhekene netinkinga tetimali, kubandlululwa nalapho bahlaselwa sicumbi sebantfu. Bengati kutsi nangihlala ngetsembekile kuJehova, utangibusisa. Ngesikhatsi ngiboshwa emahlandla futsi ngiphatfwa kabi kakhulu, ngatibonela kutsi Jehova uhlale asisita nangabe setsembekile kuye.” Jehova waba nguBabe mbamba kuBiniam, futsi bantfu bakhe bakhombisa kutsi bangumndeni mbamba kuye.

KWESABA KUFA

15. Sisho ngani kutsi akusikubi kwesaba kufa?

¹⁵ LiBhayibheli litsi kufa kusitsa. (1 Khor. 15:25, 26) Singahle sikhatsateke nasicabanga ngekufa, ikakhulukati nangabe sigula kakhulu nobe nangabe umuntfu lesimtsandzako agula kakhulu. Yini leyenta sikwesabe kufa? Kungobe Jehova wasidala saba nesifiso sekuphila phakadze. (Shu. 3:11) Kodvwa kwesaba kufa ngelizinga lelitsite kungakuvikela kuphila kwetfu. Sibonelo nje, kungasenta kutsi sikunake kudla lesikudlako, sishukumise umtimba, siye esibhedlela nasigula futsi singatibeki engotini kube kute sidzingo.

16. Sathane wetama njani kusebentisa kwesaba kufa?

¹⁶ Sathane uyati kutsi siyakutsandza kuphila. Nobe kunjalo, utsi singalahlekelwa ngunobe yini lesinayo, lokufaka ekhatsi nebuhlobo betfu naJehova kuze nje sisindzise kuphila kwetfu. (Jobe 2:4, 5) Lawo ngemanga laluhlata klaba! Kodvwa ngenca yekutsi nguye “lonendlela yekubangela kufa,” usebentisa kwesaba kwetfu kufa kuze asente sishiye Jehova. (Heb. 2:14, 15) Kuletinye timo, Sathane usebentisa bantfu bakhe kuze basongele labo labakhonta Jehova ngekubabulala nangabe bangayekeli kukhonta Jehova. Ngalesinye sikhatsi, Sathane usitakala ngekugula kwetfu kuze etame kusenta singetsembeki kuNkulunkulu. Bodokotela nobe emalunga emindeni yetfu langasibo boFakazi bangahle basicindzetele kutsi sivume kumpontjelwa ingati, lokuyintfo lengahambisani nemtsetfo waNkulunkulu. Nobe lomunye angahle asicindzetele kutsi semukele kwelashwa ngendlela lengahambisani netimiso teliBhayibheli.

17. Ngekuvumelana nalokushiwo KubaseRoma 8:37-39, yini leyenta kungadzingeki sikwesabe kufa?

¹⁷ Nanobe singafuni kufa, kodvwa siyati kutsi Jehova angeke ayekele kusitsandza ngisho singafa. (Fundza KubaseRoma 8:37-39.) Nangabe bangani baJehova bafa, uhlale abakhumbula, kube ngatsi basaphila. (Luk. 20:37, 38) Uyakulangatelela kubavusa ekufeni. (Jobe 14:15) Jehova wakhipha linani lelisetulu kuze ‘sitfole kuphila lokuphakadze.’ (Joh. 3:16) Siyati kutsi Jehova usitsandza kakhulu nekutsi unendzaba mbamba natsi. Kunekutsi simshiye nasigula nobe nasisongelwa ngekufa, kufanele setsembele kuye kuze asidvudvute, asinike kuhlakanipha futsi asiphe emandla. Nguloko kanye lokwentiwa nguValérie nendvodza yakhe.—Hla. 41:3.

18. Yini longayifundza esibonelweni saValérie?

¹⁸ Ngesikhatsi Valérie aneminyaka langu-35, watfola kutsi unamdlavuza lomubi kakhulu futsi longakavami. Lutsandvo lwamsita njani kutsi ancobe kwesaba kufa? Utsi: “Nasitfola kutsi nginamdlavuza, mine nendvodza yami setfuka kakhulu. Bekudzingeka ngihlindvwe kuze ngichubeke ngiphila. Ngaya kubodokotela labanyenti, futsi bonkhe bala kungihlindza ngaphandle kwekungimpompela ingati. Bengesaba, kodvwa ngenca yemtsetfo waNkulunkulu bengingeke ngivume kumpontjelwa ingati! Kuko konkhe kuphila kwami, Jehova bekasolo angikhombisa kutsi ungitsandza kakhulu. Nyalo besekulitfuba lami lekumkhombisa kutsi nami ngiyamtsandza. Ngaso sonkhe sikhatsi nangitfola tindzaba letimbi, bengitimisela kakhulu kujabulisa Jehova, futsi bengingafuni kutsi Sathane ajabule. Ekugcineni ngahlindvwa ngaphandle kwekumpontjelwa ingati. Nanobe ngisagula, Jehova bekahlale asinika loko lesikudzingako. Sibonelo nje, emhlanganweni welibandla wangemphelasontfo, lebewungaphambi kwekutsi bangitjele ngalokugula, besifundza sihloko lesitsi, ‘Kubeketelela Timo Letibuhlungu Talamuhla Ngesibindzi.’c Lesihloko sasidvudvuta kakhulu futsi sihlale sisiphindzaphindza. Tihloko letinjengaleti kanye neluhlelo loluhle lwekukhonta Nkulunkulu, kusite mine nendvodza yami saba nekuthula futsi senta tincumo letikahle.”

KUNCOBA KWESABA

19. Yini letawenteka ngekushesha?

¹⁹ Jehova usite emaKhristu emhlabeni wonkhe kutsi akhone kubhekana netimo letimatima nekumelana naDeveli. (1 Phet. 5:8, 9) Nawe ungakhona. Ngekushesha, Jehova utawutfuma Jesu nalabo latawubusa nabo kutsi ‘babhidlite imisebenti yaDeveli.’ (1 Joh. 3:8) Ngemuva kwaloko, bantfu baNkulunkulu labamkhontako lamhlabeni ‘angeke besabe lutfo futsi kute lokutabetfusa.’ (Isa. 54:14; Mik. 4:4) Kodvwa njengobe sisengakefiki leso sikhatsi, kudzingeka kutsi sichubeke setama kamatima kuncoba kwesaba.

20. Yini letasisita kutsi sincobe kwesaba?

²⁰ Kufanele sihlale siciniseka ngekutsi Jehova uyatitsandza tinceku takhe nekutsi uyativikela. Kuze sikhone kukwenta loku, kufanele sizindle ngendlela Jehova lavikela ngayo tinceku takhe esikhatsini lesendlulile futsi sikhulume ngako. Kungasisita nekukhumbula indlela Jehova lasisite ngayo nasibhekene netimo leticindzetelako. Ngekusitwa nguJehova, singakhona kuncoba kwesaba!—Hla. 34:4.