Imibuto Levela Kubafundzi
Davide bekacabanga kutsi angeke afe yini ngesikhatsi atsi utawudvumisa libito laNkulunkulu “kuze kube phakadze,” njengobe kubhalwe kuTihlabelelo 61:8?
Cha. Loko Davide lakubhala bekuliciniso.
Cabanga ngaloko lakubhala kulelivesi nakulamanye lafana nalo, watsi: “Ngitawubese ngiyahlabela ngidvumise libito lakho kuze kube phakadze njengobe ngitawube ngifeza tifungo tami onkhe malanga.” “Awu Jehova Nkulunkulu wami, ngikudvumisa ngayo yonkhe inhlitiyo yami, ngitawudvumisa libito lakho kuze kube phakadze.” “Ngitawudvumisa libito lakho kuze kube phakadze.”—Hla. 61:8; 86:12; 145:1, 2.
Ngesikhatsi Davide abhala lamavi, bekangacabangi kutsi ngeke afe. Bekati kutsi Jehova bekatsite umphumela wesono kufa futsi bekati kutsi naye unesono. (Gen. 3:3, 17-19; Hla. 51:4, 5) Bekati nekutsi ngisho nemadvodza lemukelwa nguNkulunkulu, njenga-Abrahama, Isaka naJakobe afa. Ngetulu kwaloko, bekati kutsi naye utawufa. (Hla. 37:25; 39:4) Kodvwa emavi lakuTihlabelelo 61:8 akhombisa kutsi bekanesifiso sekudvumisa Nkulunkulu kuze kube phakadze futsi bekatimisele kukwenta loko yingci nje nakasaphila.—2 Sam. 7:12.
Ngaletinye tikhatsi Davide bekabhala ngalokwenteke ekuphileni kwakhe, njengobe sibona embhalweni longenhla weTihlabelelo 18, 51, na-52. KuTihlabelelo 23, Davide wachaza Jehova ngekutsi ungumelusi loniketa sicondziso, kucabuleka nesivikelo. Davide bekangumelusi lonjalo. Bekafuna kukhonta Nkulunkulu ‘onkhe emalanga ekuphila kwakhe.’—Hla. 23:6.
Khumbula nekutsi nguJehova lowaphefumulela Davide kutsi abhale tintfo latibhala. Loko lakubhala bekufaka ekhatsi tiphrofetho lebetitawugcwaliseka ngekuhamba kwesikhatsi. Sibonelo nje, kuTihlabelelo 110, Davide wabhala ngesikhatsi lesitako lapho khona iNkhosi yakhe ‘itawuhlala ngesekudla’ saNkulunkulu ezulwini futsi itfole emandla lamakhulu. Emandla ekwentani? Ekuncoba titsa taNkulunkulu futsi ‘yehlulele tive’ emhlabeni. Davide bekangukhokho waMesiya, loyo lebekatawubusa asezulwini futsi abe ‘ngumphristi kuze kube phakadze.’ (Hla. 110:1-6) Jesu watsi lesiphrofetho lesikuTihlabelelo 110 besimayelana naye, washo nekutsi besitawugcwaliseka esikhatsini lesitako.—Mat. 22:41-45.
Davide waphefumulelwa kutsi abhale ngalebekutawenteka ngesikhatsi asaphila nasesikhatsini lesitako nasekavusiwe futsi advumisa Jehova kuze kube phakadze. Loku kusenta sibone kutsi Tihlabelelo 37:10, 11 na-29 tichaza simo lebesikhona ka-Israyeli kanye nesimo lesitawuba khona emhlabeni wonkhe esikhatsini lesitako lapho Nkulunkulu sekagcwalisa tetsembiso takhe.—Buka sigaba 8, esihlokweni lesitsi “Uyawuba Nami EPharadisi,” lesikulomagazini.
Tihlabelelo 61:8 nalamanye emavesi lafana nato akhombisa kutsi Davide bekafuna kudvumisa Jehova ka-Israyeli kuze kube ngulapho afa. Lamavesi aphindze akhombise loko Davide latawukwenta esikhatsini lesitako nasekamvusile Jehova.