Buka ya Bobedi ya Marena
19 Hang ha Morena Ezekiase a utlwa ditaba tsena, a tabola diaparo tsa hae a apara lesela le hwashang* yaba o ya ntlong ya Jehova.+ 2 A romela Eliakime mohlokomedi wa ntlo ya morena,* mongodi Shebna le baholo ba baprista ho moprofeta Esaia+ mora wa Amoze. Ba ne ba apere masela a hwashang.* 3 Ba mo bolella mantswe a Ezekiase a reng: “Letsatsi lena ke la mathata, la ho kgalemelwa le la ho tlotlollwa. Re tshwana le mosadi ya haufi le ho ba le ngwana* empa a se na matla a ho beleha.+ 4 Mohlomong Jehova Modimo wa hao o tla utlwa mantswe ohle ao morena wa Asiria a a buileng a sebedisa Rabshake e le hore a some Modimo ya phelang.+ Jehova Modimo wa hao o tla mo kgalemela ka lebaka la mantswe ao a a utlwileng. Re rapelle+ rona batho ba ntseng ba setse.”
5 Bahlanka ba Morena Ezekiase ba fihla ho Esaia.+ 6 Yaba Esaia o re ho bona: “Le lokela ho re ho morena wa lona, ‘Jehova o re: “O se ke wa tshoswa+ ke mantswe ao o utlwileng bahlanka ba morena wa Asiria ba nthohaka ka ona.+ 7 Ke kenya monahano kelellong ya hae. O tla utlwa tlaleho ebe o kgutlela naheng ya hae a be a bolawe ka sabole moo.”’”+
8 Ka mora hore Rabshake a utlwe hore morena wa Asiria o tlohile Lakishe,+ a kgutlela ho yena mme a mo fumana a ntse a lwantsha Libna.+ 9 Morena wa Asiria a utlwa ho thwe Morena Tirhaka wa Ethiopia o tlo mo lwantsha. Ka hoo, a roma batho+ hape ho Ezekiase a re: 10 “Le re ho Morena Ezekiase wa Juda, ‘O se ke wa dumella Modimo wa hao eo o mo tshepileng hore a o thetse, ha a re morena wa Asiria a ke ke a hlola Jerusalema.+ 11 O utlwile hore na marena a Asiria a ile a fedisa dinaha tse ding jwang.+ Hobaneng ha o nahana hore wena o tla pholoha? 12 Na medimo ya ditjhaba tseo baholoholo ba ka ba ileng ba di fedisa e ile ya di pholosa? Se kae setjhaba sa Gozane, Harane,+ Rezefe le batho ba Edene ba neng ba le Tel-asare? 13 O kae morena wa Hamathe, wa Arpade, wa metse ya Sefarvaime, wa Hena le wa Iva?’”+
14 Ezekiase a nka mangolo ho baromuwa a a bala. A ya ntlong ya Jehova yaba o a bula ka pela Jehova.+ 15 Ezekiase a rapela+ Jehova a re: “Jehova Modimo wa Iseraele, wena ya dutseng teroneng ka hodima* dikerubime,+ ke wena feela Modimo wa nnete mebusong yohle e lefatsheng.+ O entse mahodimo le lefatshe. 16 Jehova utlwa o be o mamele.+ Jehova, sheba+ mme o bone. Utlwa mantswe a tswang ho Sankeribe, ao a somang Modimo ya phelang ka ona. 17 Jehova, ke nnete hore marena a Asiria a fedisitse ditjhaba le dinaha tsa tsona.+ 18 A ile a tjhesa medimo ya tsona hobane e ne e le medimo e iketseditsweng,+ e entsweng ka patsi le lejwe. Ke ka hoo a ileng a kgona ho e fedisa. 19 Jehova Modimo wa rona re kopa o re pholose ho morena wa Asiria e le hore mebuso yohle ya lefatshe e ka tseba hore wena Jehova, o Modimo o le mong.”+
20 Esaia mora wa Amoze a romella Ezekiase molaetsa o reng: “Jehova Modimo wa Iseraele o re o utlwile thapelo eo o e entseng+ ka lebaka la Morena Sankeribe wa Asiria.+ 21 Jehova o re ho yena:
‘Morwetsana wa Sione o o hloile ebile o a o tsheha.
Moradi wa Jerusalema o sisinya hlooho ha a o bona.
22 Na o a tseba hore ke mang eo o mo rohakang le ho mo tella?+
Ke mang eo o mo halefetseng+
Le ho mo sheba hampe?
Ke Mohalaledi wa Iseraele.+
23 O nyefotse Jehova+ o sebedisa baromuwa ba hao+ wa re:
“Ka dikariki tsa ka tsa ntwa tse ngata
Ke tla hlwella ka hodima dithaba,
Dibakeng tse hole tsa Lebanone.
Ke tla rema difate tsa yona tsa kedare tse telele le difate tsa yona tse ntle tsa junipere.
Ke tla fihla dithabeng tsa yona tse hole ka ho fetisisa, morung wa yona o teteaneng haholo.
24 Ke tla tjheka didiba, ke nwe metsi a baditjhaba.
Ke tla pshesa dinokana* tsohle tsa Egepeta ka maoto a ka.”
25 Na ha o a utlwa hore kgale ke rerile* ho etsa ntho eo?+
Ke nahanne ka yona* ho tloha mehleng ya kgale.+
Jwale ke tla e phetha.+
O tla etsa hore metse e sireleditsweng ka thata e be qubu ya majwe.+
26 Baahi ba yona ba tla fellwa ke matla.
Ba tla tshoha mme ba hlajwe ke dihlong.
Ba tla ba jwalo ka dimela tsa naha le jwang bo botala,+
Jwalo ka jwang bo melang ka hodima ntlo bo omeleditsweng ke moya wa botjhabela.
28 Ke utlwile ka moo o nkwatetseng le ho nkgalefela ka teng.+
Ka hoo, ke tla kenya hakisi ya ka ka nkong ya hao le tomo ya ka+ pakeng tsa molomo wa hao.
Ke tla o kgutlisa ka tsela eo o tlileng ka yona.’+
29 Ezekiase o tla bona ka dintho tse latelang hore sena se tla phethahala: Selemong sena le selemong sa bobedi le tla ja koro* e itlhahisitseng.+ Empa ka selemo sa boraro le tla lema le be le kotule mme le tla lema dirapa tsa morara le be le je ditholwana tsa tsona.+ 30 Batho ba Juda ba setseng+ ba tla tshwana le dimela tse metseng ka metso mme ba hlahise ditholwana. 31 Batho ba setseng ba tla tswa Jerusalema mme ba phonyohileng ba tswe Thabeng ya Sione. Jehova wa mabotho o tla etsa sena ka tjheseho.+
32 Jehova o itse ka morena wa Asiria:+
‘A ke ke a kena motseng ona+
Kapa a betsetsa motsu ho wona.
A ke ke a tla ho wona a nkile thebe
Kapa a haha qubu e o thibellang.’+
33 Jehova o re: ‘Morena wa Asiria o tla kgutla ka tsela eo a tlileng ka yona.
A ke ke a kena motseng ona.
34 Ke tla sireletsa motse ona+ mme ke o pholose ka lebaka la lebitso la ka+
Le ka lebaka la mohlanka wa ka Davida.’”+
35 Bosiung bona boo, lengeloi la Jehova la tla mme la bolaya masole a 185 000 ditenteng tsa Baasiria.+ Ha batho ba tsoha hoseng, ba fumana masole ao a shwele kaofela.+ 36 Morena Sankeribe wa Asiria a kgutlela Ninive+ mme a dula teng.+ 37 Ha a ntse a rapela tempeleng* ya modimo wa hae Nisroke, bara ba hae e leng Adrameleke le Sharezere ba mo bolaya ka sabole+ mme ba balehela naheng ya Ararate.+ Mora wa hae Esare-hadone+ ya eba morena.