Ezekiele
47 O ile a nkgutlisetsa moo ho kenwang teng tempeleng,+ moo ke ile ka bona metsi a phallela ka botjhabela a tswa tlasa monyako wa tempele+ hobane karolo e ka pele ya tempele e ne e shebile ka botjhabela. Metsi ao a ne a phallela tlase a tswa ka tlasa lehlakore le letona la tempele, ka borwa ho aletare.
2 O ile a tswa le nna ka tsela ya keiti e ka leboya+ a nkisa ka ntle yaba re potoloha keiti e ka ntle e shebileng ka botjhabela.+ Ke ile ka bona metsi a phalla hanyenyane ho tloha ka lehlakoreng le letona.
3 Ha monna eo a tswa a ya ka botjhabela, a tshwere kgwele e methang,+ o ile a metha dimithara tse ka bang 518* yaba o ntshedisa metsing ao. A ne a fihla maqaqailaneng.
4 O ile a metha dimithara tse ding tse ka bang 518* yaba o re ke tshele mme metsi ao a ne a fihla mangoleng.
O ile a boela a metha dimithara tse ding tse ka bang 518* yaba o re ke tshele mme metsi a ne a se a fihla thekeng.
5 Ha a metha dimithara tse ding tse ka bang 518,* e ne e le metsi a tebileng hoo ke neng ke sa kgone ho tshela. Metsi ao a ne a le mangata hoo motho a neng a tla lokela ho sesa. O ne a ke ke a kgona ho tshela ka maoto.
6 O ile a re ho nna: “Mora motho, na o kile wa bona ntho e tjee?”
Yaba o a ntsamaisa o nkgutlisetsa lebopong la noka. 7 Ha ke kgutla, ka bona difate tse ngata haholo ka mahlakoreng a mabedi a lebopo la noka.+ 8 A re ho nna: “Metsi ana a phallela sebakeng se ka botjhabela mme a feta le Araba*+ ebe a kena ka lewatleng. Ha a kena ka lewatleng,+ metsi a lona a tla hlweka. 9 Dibopuwa tse ngata di tla kgona ho phela hohle moo metsi* ao a phallelang teng. Ho tla ba le ditlhapi tse ngata hobane metsi a tla phalla moo. Metsi a lewatle a tla hlweka mme hohle moo metsi ao a fihlang teng ntho e nngwe le e nngwe e tla phela.
10 Batshwasi ba ditlhapi ba tla ema pela lona ho tloha Ene-gedi+ ho ya fihla Ene-eglaime, moo ho tla ba le sebaka seo ba anehang matlowa a bona ho sona. Ho tla ba le ditlhapi tse ngata tsa mefuta e fapaneng jwalo ka ditlhapi tsa Lewatle le Leholo.*+
11 E tla ba dibaka tse dulang di ena le metsi le tse tletseng seretse mme di ke ke tsa hlwekiswa. Di tla dula di ena le letswai.+
12 Difate tsa mefuta yohle ya ditholwana di tla mela lebopong le ka nqena le ka nqane. Makgasi a tsona a ke ke a omella ebile di tla dula di ena le ditholwana. Di tla beha ditholwana kgwedi e nngwe le e nngwe hobane di fumana metsi ho tswa sehalalelong.+ Ditholwana tsa tsona e tla ba dijo le makgasi a tsona a fodise.”+
13 Jehova Mmusi wa Dintho Tsohle o re: “Sena ke sebaka seo le tla se fa maloko a 12 a Iseraele e le lefa la naha. Le fe Josefa dikarolo tse pedi tsa naha.+ 14 Le tla e fuwa e le lefa ebile le tla e arolelwa ka ho lekana. Ke ile ka hlapanya hore ke tla fa baholoholo ba lona naha ena+ mme hona jwale e fuwa lona e le lefa.
15 Ona ke moedi wa naha o ka lehlakoreng le ka leboya: O tloha Lewatleng le Leholo ka tsela ya Hethlone+ ho ya fihla Zedade,+ 16 Hamathe,+ Berotha+ le Siberaime e dipakeng tsa Damaseka le Hamathe ho ya fihla Hazere-hatikone e pela moedi wa Haurane.+ 17 Moedi o tla tloha lewatleng ho ya fihla Hazare-enone+ moeding wa Damaseka o ka leboya le moeding wa Hamathe.+ Ona ke moedi o ka leboya.
18 Moedi o ka botjhabela o tla tloha dipakeng tsa Haurane le Damaseka o fete Jordane dipakeng tsa Gileade+ le naha ya Iseraele. Le o methe ho tloha moeding o ka leboya ho ya lewatleng le ka botjhabela.* Ona ke moedi o ka botjhabela.
19 Moedi o ka borwa* o tla tloha Tamare o kene metsing a Meribathe-kadeshe+ le Phuleng* mme o fetele Lewatleng le Leholo.+ Ona ke moedi o ka borwa.*
20 Lehlakoreng le ka bophirimela ke Lewatle le Leholo le tlohang moeding o ka borwa ho ya fihla karolong e shebaneng le Lebo-Hamathe.*+ Ona ke moedi o ka bophirimela.
21 Le arolelane naha ena malokong a lona a 12 a Iseraele. 22 Le e arolelane e le lefa le be le e arolele baditjhaba ba dulang le lona ba bileng le bana ba ntse ba dula le lona. Ba tla ba jwalo ka Baiseraele ho lona. Ba tla fuwa lefa malokong a Iseraele ha mmoho le lona. 23 Le fe moditjhaba lefa naheng ya leloko leo a dulang ho lona,” ke Jehova Mmusi wa Dintho Tsohle ya tjhong.