Buka ya Bobedi ya Samuele
6 Davida a boela a bokella banna ba 30 000 ba matla ka ho fetisisa Iseraele. 2 Jwale Davida le banna bohle ba neng ba ena le yena ba ya Baale-juda ho ya lata Areka ya Modimo wa nnete,+ eo ho yona batho ba rapelang Jehova wa mabotho,+ ya dutseng hodima* dikerubime.+ 3 Le ha ho le jwalo, ba palamisa Areka ya Modimo wa nnete kariking e ntjha+ e le hore ba e tlose ntlong ya Abinadabe+ e neng e le leralleng. Uza le Akio bara ba Abinadabe, ba ne ba tsamaya ka pela kariki eo e ntjha.
4 Ka hoo, ba tlosa Areka ya Modimo wa nnete ntlong ya Abinadabe e neng e le leralleng mme Akio o ne a tsamaya ka pela Areka eo. 5 Davida le Baiseraele bohle ba ne ba keteka ka pela Jehova ka diletsa tsa mefuta yohle tsa junipere ya lepolanka, diharepa, diletsa tse ding tse dikgwele,+ meropa e menyenyane,+ disistrame le ka disimbala.+ 6 Empa ha ba fihla seotlong sa Nakone, Uza a otlolla letsoho mme a tshwara Areka ya Modimo wa nnete+ hobane dikgomo di ile tsa batla di e diha. 7 Yaba Jehova Modimo wa nnete o halefela Uza mme o mo bolaela+ moo hobane a ne a sa hlompha molao wa Modimo.+ Ka hoo, o ile a shwella moo pela Areka ya Modimo wa nnete. 8 Empa Davida a kwata hobane Jehova a ne a halefetse Uza haholo. Sebaka seo sa bitswa Pereze-uza* ho fihlela letsatsing lena. 9 Letsatsing leo, Davida a tshoha mme a tshaba Jehova+ a re: “Jwale Areka ya Jehova e ka tla jwang ho nna?”+ 10 Davida o ne a sa batle ho tlisa Areka ya Jehova ho yena Motseng wa Davida.+ A re e iswe ntlong ya Obede-edomo+ wa Mogathe.
11 Areka ya Jehova ya dula ntlong ya Obede-edomo wa Mogathe ka dikgwedi tse tharo mme Jehova a nna a hlohonolofatsa Obede-edomo le bohle ba lelapa la hae.+ 12 Morena Davida a fumana tlaleho ena: “Jehova o hlohonolofaditse ntlo ya Obede-edomo le dintho tsohle tsa hae ka lebaka la Areka ya Modimo wa nnete.” Ka hoo, Davida a lata Areka ya Modimo wa nnete ntlong ya Obede-edomo a e tlisa Motseng wa Davida a thabile.+ 13 Ha batho ba jereng+ Areka ya Jehova ba tsamaile mehato e tsheletseng, a etsa sehlabelo ka poho le phoofolo e nonneng.
14 Davida o ne a tantsha ka matla a hae kaofela ka pela Jehova. Ka nako eo yohle o ne a apere* efoda* ya line.+ 15 Davida le Baiseraele bohle ba ne ba tlisa Areka+ ya Jehova ba thabile+ ebile ba letsa lenaka.+ 16 Empa ha Areka ya Jehova e fihla Motseng wa Davida, Mikale+ moradi wa Saule o ne a shebile tlase ka fensetere mme a bona Morena Davida a tlolatlola a bile a tantsha ka pela Jehova. A mo nyefola ka pelong ya hae.+ 17 Yaba ba tlisa Areka ya Jehova mme ba e beha ka tenteng eo Davida a neng a e hlometse yona.+ Davida a etsetsa Jehova+ dinyehelo tsa setjheso+ le mahlabelo a kopanetsweng.+ 18 Ha a qetile ho etsa dinyehelo tsa setjheso le mahlabelo a kopanetsweng, a hlohonolofatsa batho ka lebitso la Jehova wa mabotho. 19 Ho ekelletsa moo, o ile a fa Baiseraele bohle, monna le mosadi e mong le e mong bohobe bo sedikadikwe bo lesoba hare, polokwe ya ditholwana tsa palema le polokwe ya morara o omisitsweng. Ka mora moo, batho bohle ba ya matlong a bona.
20 Jwale ha Davida a kgutla ho ya hlohonolofatsa ba lelapa la hae, Mikale+ moradi wa Saule a tswa ho ya kopana le yena. A re: “Morena wa Iseraele o itlotlolotse hakaakang kajeno ha a ne a hlobola ka pela basebeletsi ba hae ba basadi feela jwalo ka ha monna ya se nang kelello a hlobola ka pela batho!”+ 21 Yaba Davida o re ho Mikale: “Ke ne ke ketekela Jehova ya kgethileng nna, eseng ntate wa hao le ba lelapa la hae le ya ileng a nkgetha hore ke be moetapele wa setjhaba sa Jehova sa Iseraele.+ Ka hoo, ke tla ketekela Jehova 22 mme ke tla ikokobetsa le ho feta ke be ke ipehe fatshe esita le mahlong a ka. Empa basebeletsi ba basadi bao o buileng ka bona, ba tla ntlotlisa.” 23 Ka hoo, Mikale+ moradi wa Saule o ile a ba a shwa a se na bana.