Buka ya Bobedi ya Samuele

20 Jwale ho ne ho ena le monna ya neng a le dikgathatso eo lebitso la hae e leng Sheba,+ mora wa Bikri wa Mobenjamine. O ile a letsa lenaka+ a re: “Ha ho na letho le re kopanyang le Davida ebile ha re na lefa ho mora wa Jese.+ E mong le e mong a ke a kgutlele ho modimo* wa hae, wena Iseraele!”+ 2 Yaba banna bohle ba Iseraele ba tlohela ho latela Davida mme ba latela Sheba mora wa Bikri.+ Empa banna ba Juda ba nna ba latela morena wa bona ho tloha Jordane ho ya Jerusalema.+

3 Ha morena Davida a kgutlela ntlong* ya hae Jerusalema,+ a nka basadi ba hae ba direthe bao a neng a ba siile hore ba hlokomele ntlo+ yaba o ba kwalla ka tlung mme o etsa hore ntlo eo e lebelwe. O ne a ba fa dijo empa ha a ka a robala le bona.+ Ba ile ba dula ka moo ba kwaletswe ho fihlela ba shwa, ba ne ba phela jwalo ka bahlolohadi le hoja monna wa bona a ne a ntse a phela.

4 Jwale morena a re ho Amasa:+ “Mpokellele banna ba Juda pele ho feta matsatsi a mararo, le wena o lokela ho ba teng.” 5 Ka hoo, Amasa a bokella banna ba Juda empa a fihla ka mora nako eo a neng a e behetswe. 6 Yaba Davida o re ho Abishai:+ “Sheba+ mora wa Bikri a ka re etsa hampe ho feta ka moo Absalome a re entseng ka teng.+ Nka bahlanka ba ka mme o mo lelekise e le hore a se ke a fihla metseng e sireletsehileng mme a re phonyoha.” 7 Ka hoo, banna ba Joabe,+ Bakerethe, Bapelethe+ le banna bohle ba matla ba tswa ho ya mo lelekisa. Ba tswa Jerusalema ho ya lelekisa Sheba mora wa Bikri. 8 Ha ba le haufi le lejwe le leholo Gibeone,+ Amasa+ a tswa ho tla kopana le bona. Joabe o ne a apere diaparo tsa hae tsa ntwa, a kentse sabole ya hae ka selateng mme a se tlameletse lethekeng la hae. Ha a atamela Amasa, sabole ya hae ya wa.

9 Joabe a re ho Amasa: “Na o ntse o ikela hantle ngwaneso?” Yaba Joabe o tshwara ditedu tsa Amasa ka letsoho le letona jwalo ka ha eka o a mo suna. 10 Amasa o ne a sa hlokomela sabole e neng e le letsohong la Joabe yaba Joabe o mo hlaba ka yona mpeng+ mme mala a hae a tswela fatshe. Ha ho a ka ha hlokahala hore a mo hlabe hape, e ile yaba ho fedile ka yena. Jwale Joabe le abuti wa hae Abishai ba lelekisa Sheba mora wa Bikri.

11 E mong wa bahlanka ba Joabe o ne a eme pela Amasa a ntse a re: “Mang kapa mang ya lehlakoreng la Joabe le mang kapa mang eo e leng wa Davida, a ke a latele Joabe!” 12 Ka nako eo, Amasa o ne a ntse a pitika ka hara madi a hae a le hara tsela. Ha mohlankana eo a bona hore batho bohle ba ne ba ema, a hulela Amasa ka thoko ho tsela. Yaba o mo kwahela ka seaparo hobane o ne a bona hore batho bohle ba a ema ha ba fihla pela hae. 13 Ha a se a mo tlositse tseleng, banna bohle ba latela Joabe mme ba lelekisa Sheba+ mora wa Bikri.

14 Sheba a feta malokong ohle a Iseraele a ya Abele ya Bethe-maaka.+ Babikri ba bokana ha mmoho yaba ba a mo latela.

15 Joabe le banna ba hae ba thibella Sheba motseng wa Abele ya Bethe-maaka yaba ba haha lerako hore ba hlasele motse hobane o ne o potapotilwe ke leralla. Banna bohle ba neng ba ena le Joabe ba thuha lerako e le hore ba le dihe. 16 Mosadi e mong ya bohlale a hweletsa ho tswa motseng a re: “Banna mamelang, mamelang! Ke kopa le bolelle Joabe hore a tle, ke hloka ho bua le yena.” 17 Yaba Joabe o ya ho yena mme mosadi eo a re: “Na ke wena Joabe?” A re: “E, ke nna.” Yaba mosadi eo o re ho yena: “Mamela mantswe a lekgoba la hao.” Yaba o re: “Ke mametse.” 18 A tswela pele a re: “Mehleng ya kgale batho ba ne ba tlwaetse ho re, ‘Ereng ba batle keletso motseng wa Abele’ ebe taba eo e fella hona moo. 19 Ke emela ba nang le kgotso le ba tshepahalang Iseraele. O batla ho fedisa motse o kang mme ho Iseraele. Ke hobaneng ha o batla ho fedisa lefa la Jehova?”+ 20 Joabe a re: “Ke ntho e sa utlwahaleng hore ke fedise motse ona. 21 Ha ho jwalo empa monna e mong ya bitswang Sheba+ mora wa Bikri, ya tswang sebakeng se dithaba sa Efraime+ o fetohetse* Morena Davida. Haeba feela o ka mpha monna eo, nke ke ka fedisa motse ona.” Yaba mosadi eo o re ho Joabe: “O tla akgellwa hlooho ya hae ka hodima lerako.”

22 Hanghang mosadi eo ya bohlale a kgutlela ho batho bohle mme ba kgaola hlooho ya Sheba mora wa Bikri yaba ba e akgella Joabe. Ka mora moo, Joabe a letsa lenaka mme ba tloha motseng, e mong le e mong a kgutlela ha hae.+ Joabe a kgutlela Jerusalema ho morena.

23 Jwale Joabe o ne a okametse lebotho lohle la Iseraele,+ Benaia+ mora wa Jehojada+ o ne a okametse Bakerethe le Bapelethe.+ 24 Adorame+ o ne a okametse ba neng ba bitseditswe ho tla sebeletsa morena, Josafate+ mora wa Akilude e ne e le motlalehi. 25 Sheva e ne e le mongodi mme Tsadoke+ le Abiathare+ e le baprista. 26 Ira wa Mojaire le yena ya eba moetapele* ya ka sehloohong wa Davida.