Buka ya Bobedi ya Marena

10 Akabe+ o ne a ena le bara ba 70 ba neng ba dula Samaria. Jehu a ngola mangolo mme a a romela Samaria ho dikgosana tsa Jezriele, baholo+ le bahlokomedi ba bana ba Akabe* a re: 2 “Ha le fumana lengolo lena, le tla be le le motseng o sireletsehileng le ena le bara ba morena, dikariki tsa ntwa, dipere le dibetsa. 3 Ho bara ba morena, le kgethe mora ya lokileng le ya tshwanelwang ke ho ba morena mme le mo behe teroneng ya ntate wa hae. Le lwanele lelapa la morena wa lona.”

4 Ba tshoha mme ba re: “Haeba marena a mabedi a sa kgona ho hlola Jehu,+ rona re bomang?” 5 Mohlokomedi wa phaleisi,* letona la motse, baholo le bahlokomedi ba romela molaetsa ona ho Jehu: “Re bahlanka ba hao mme re tla etsa ntho e nngwe le e nngwe eo o reng re e etse. Ha ho na motho eo re tla mo kgetha hore e be morena. Etsa seo o bonang se nepahetse.”

6 A ba ngolla lengolo la bobedi le reng: “Haeba le ka lehlakoreng la ka mme le ikemiseditse ho mmamela, kgaolang dihlooho tsa bara ba morena wa lona mme le di tlise ho nna hosane ka nako ena Jezriele.”

Bara ba 70 ba morena ba ne ba ena le banna ba motse ba kgethilweng ba neng ba ba hodisa. 7 Hang ha lengolo le fihla ho bona, ba lata bara ba morena ba 70+ mme ba ba kgaola dihlooho yaba ba di kenya ka dibasketeng mme ba di romela Jezriele ho Jehu. 8 Moromuwa a fihla a re ho Jehu: “Ba tlisitse dihlooho tsa bara ba morena.” Jehu a re: “Di behe ka dihlopha tse pedi keiting ya motse ho fihlela hoseng.” 9 Ha a tswela ka ntle hoseng, a ema ka pela batho bohle yaba o re: “Ha le na molato.* Ke nna ya fetohetseng morenaka ka ba ka mo bolaya+ empa ke mang ya bolaileng baa? 10 Tsebang hore ha ho na lentswe le le leng leo Jehova a le buileng ka lelapa la Akabe leo Jehova a ke keng a le phetha*+ ebile Jehova o phethahaditse mantswe ao a ileng a a bua a sebedisa mohlanka wa hae Elia.”+ 11 Jehu a boela a bolaya bohle ba neng ba setse ba lelapa la Akabe ba Jezriele, banna bohle ba neng ba mo sebeletsa, metswalle ya hae le baprista+ ho fihlela ho se na motho ya setseng.+

12 A tsamaya a ya Samaria. Ntlo eo badisa ba kutelang* dinku ho yona e ne e le ka thoko ho tsela. 13 Ke hona moo Jehu a ileng a kopana le bana ba bo Morena Akazia+ wa Juda. A re ho bona, “Le bomang?” Ba re ho yena: “Re bana ba bo Akazia mme re yo sheba hore na bara ba morena le bara ba mofumahadi ba ntse ba eya jwang.” 14 Hanghang Jehu a re: “Ba tshwareng!” Ba tshwara banna bao ba 42 mme ba ba bolaela sedibeng sa ntlo eo ho kutelwang dinku ho yona. Ha ho le ya mong ya ileng a phonyoha.+

15 Ha a tloha moo, a kopana le Jonadabe+ mora wa Rekabe+ ya neng a tlo mo kgahlanyetsa. Jehu a mo dumedisa* mme a re: “Na o ntshepahalla* jwalo ka ha ke o tshepahalla?”

Jonadabe a re: “E, ke a o tshepahalla.”

Jehu a re: “Haeba ho jwalo, tlisa letsoho la hao.”

A le tlisa yaba Jehu o mo hulela ka kariking. 16 Jehu a re ho yena: “Tsamaya le nna mme o bone hore ha ke mamelle batho ba sa tshepahalleng Jehova.”+ A tsamaya le yena ka kariki ya hae ya ntwa. 17 Ha a fihla Samaria a bolaya bohle+ ba setseng ba lelapa la Akabe ba Samaria ho ya ka seo Jehova a se buileng ho Elia.+

18 Jehu a bitsa batho bohle a re ho bona: “Akabe o sebeleditse Baale hanyenyane+ empa nna ke tla mo sebeletsa ho feta moo. 19 Mpitsetseng baprofeta bohle ba Baale,+ barapedi ba hae le baprista ba hae.+ Le etse hore ba be teng kaofela hobane ke tlo etsetsa Baale sehlabelo se seholo. Motho ya sa tleng o tla bolawa.” Empa Jehu o ne a ba thetsa hobane o ne a batla ho fedisa barapedi ba Baale.

20 Jehu a boela a re: “Phatlalatsang* hore ho na le seboka se halalelang sa Baale.” Ba etsa jwalo. 21 Ka mora moo, Jehu a romela molaetsa oo Iseraele yohle mme barapedi bohle ba Baale ba tla. Ba kena ka tempeleng* ya Baale+ mme ba tlala ka ho yona. 22 Jehu a re ho motho ya neng a ikarabella ka diaparo: “Ntshetsa barapedi bohle ba Baale diaparo.” A ba ntshetsa tsona. 23 Jehu le Jonadabe+ mora wa Rekabe ba kena ka tempeleng ya Baale. Jehu a re ho barapedi ba Baale: “Etsang bonnete ba hore ha ho na morapedi wa Jehova ka mona, ho sale barapedi ba Baale feela.” 24 Barapedi ba Baale ba etsa mahlabelo le dinyehelo tsa setjheso. Jehu o ne a behile bahlanka ba hae ba 80 ka ntle mme a itse ho bona: “Haeba le ha e le mang a dumella e mong wa bona hore a phonyohe, ke yena ya tla bolawa.”

25 Hang ha ho qetwa ho etswa dinyehelo tsa setjheso, Jehu a re ho balebedi* le ho balaodi ba hae ba masole: “Kenang le ba bolaye! Le se ke la dumella le a le mong hore a phonyohe!”+ Ka hoo, balebedi le bathusi ba ba bolaya mme ba ba lahlela ka ntle. Ba kena le ka sehalalelong* se ka hare sa tempele ya Baale. 26 Ba ntsha dipilara tse halalelang+ tse ka tempeleng ya Baale mme ba di tjhesa.+ 27 Ba diha pilara e halalelang+ ya Baale le tempele ya Baale+ mme ba e etsa ntlwana. E ntse e le teng ho fihlela kajeno.

28 Jehu o ile a fedisa borapedi ba Baale Iseraele. 29 Empa ha a ka a tlohela ho etsa dibe tseo Jeroboame mora wa Nebate a neng a entse hore Baiseraele ba di etse e leng ho rapela manamane a kgauta a neng a le Bethele le Dane.+ 30 Jehova a re ho Jehu: “Ka ha o nthabisitse ka hore o etse dintho tseo ke neng ke di reretse lelapa la Akabe,+ meloko ya hao e mene e tla dula teroneng ya Iseraele.”+ 31 Empa Jehu ha a ka a mamela Molao wa Jehova Modimo wa Iseraele ka ho felletseng.*+ Ha a ka a tlohela ho etsa dibe tseo Jeroboame a neng a entse hore Baiseraele ba di etse.+

32 Mehleng eo Jehova a fedisa* Baiseraele butlebutle. Hazaele a nna a ba hlasela naheng yohle ya Iseraele+ 33 ho tloha ka botjhabela ho Jordane, naha yohle ya Gileade moo ho dulang Bagade, Barubene le Bamanase+ le ho tloha Aroere e leng pela Kgohlo ya Arnone, Gileade le Bashane.+

34 Histori yohle ya Jehu le dintho tsohle tse kgolo tseo a di entseng le matla a hae, di ngotswe bukeng ya histori ya marena a Iseraele. 35 Jehu a shwa* mme a patelwa Samaria. Mora wa hae Joakaze+ ya eba morena. 36 Jehu o busitse Iseraele e Samaria ka dilemo tse 28.