Buka ya Bobedi ya Samuele
24 Jehova a boela a halefela Baiseraele+ ha e mong* a ne a susumeletsa Davida kgahlanong le bona a re: “Tsamaya o yo bala+ Baiseraele le Bajuda.”+ 2 Morena a re ho Joabe+ molaodi wa lebotho la sesole: “Ke kopa o ye malokong ohle a Iseraele ho tloha Dane ho ya Beersheba+ mme o ngodise* batho e le hore ke tle ke tsebe palo ya bona.” 3 Empa Joabe a re ho morena: “E se eka Jehova Modimo wa hao a ka eketsa batho ka makgetlo a 100 mme e se eka mahlo a hao morenaka a ka bona ha seo se etsahala. Empa ke hobaneng ha o batla ho etsa ntho e tjee?”
4 Empa morena a hana ho mamela Joabe le balaodi ba lebotho la sesole. Ka hoo, Joabe le balaodi ba lebotho la sesole ba tloha ka pela morena ba yo ngodisa batho ba Iseraele.+ 5 Ba tshela Jordane mme ba hloma ditente Aroere+ ka lehlakoreng le letona* la motse bohareng ba kgohlo* mme ba elella ho Bagade le ho ya Jazere.+ 6 Ka mora moo, ba ya Gileade+ le naheng ya Tatime-hodshi yaba ba fetela Dane-jane mme ba pota le Sidone.+ 7 Yaba ba ya motseng o sireletsehileng wa Tire+ le metseng yohle ya Baheve+ le ya Bakanana, qetellong ba fihla Beersheba+ e Negebe+ ya Juda. 8 Ba ile ba tsamaya naheng yohle mme ba kgutlela Jerusalema ka mora dikgwedi tse robong le matsatsi a 20. 9 Joabe a fa morena palo ya batho ba neng ba ngodisitswe. Banna ba matla ba Iseraele ba tshwarang disabole ba ne ba le 800 000 mme banna ba Juda ba ne ba le 500 000.+
10 Empa Davida a otlwa ke letswalo*+ ka mora hore a bale batho. Yaba Davida o re ho Jehova: “Ke entse sebe+ se seholo ka ho etsa ntho ena. Jehova ke kopa o ntshwarele+ hobane ke entse ka bowatla.”+ 11 Ha Davida a tsoha hoseng, Jehova a re ho moprofeta Gade+ ya bonang dipono bakeng sa Davida: 12 “Tsamaya mme o re ho Davida, ‘Jehova o re: “Ke o fa dikotlo tse tharo. Ikgethele eo o e batlang.”’”+ 13 Gade a tla ho Davida a re ho yena: “Na ho tle dilemo tse supileng tsa tlala naheng ya hao?+ Kapa o qete dikgwedi tse tharo o baleha o lelekiswa ke dira tsa hao?+ Kapa na ho be le lefu la sewa naheng ya hao ka matsatsi a mararo?+ Jwale inahane hantle mme o tle o mpolelle hore na ke reng ho ya nthomileng.” 14 Davida a re ho Gade: “Ke tshwenyehile haholo. Re kopa hore re se ke ra fuwa kotlo ke motho empa e be Jehova ya re fang kotlo+ hobane yena o mohau haholo.”+
15 Jehova a tlisa lefu la sewa+ Iseraele ho tloha hoseng ho fihlela nakong e behilweng. Ho ile ha shwa+ batho ba 70 000 ho tloha Dane ho ya Beersheba.+ 16 Ha lengeloi le otlollela letsoho la lona Jerusalema hore le e fedise, Jehova a utlwa bohloko* ka lebaka la tlokotsi eo+ mme a re ho lengeloi le neng le tlo fedisa batho: “Ho lekane! Theola letsoho la hao.” Lengeloi la Jehova le ne le le haufi le seotlo sa Arauna+ wa Mojebuse.+
17 Ha Davida a bona lengeloi le neng le bolaya batho, a re ho Jehova: “Ke nna ya entseng sebe mme ke nna ya entseng phoso empa dinku tsee+ tsona di entseng? Ke kopa hore o tlise kotlo ena ho nna le ho ba lelapa la ntate wa ka.”+
18 Ka hoo, Gade a tla ho Davida ka letsatsi leo mme a re ho yena: “Nyoloha o yo etsetsa Jehova aletare seotlong sa Arauna wa Mojebuse.”+ 19 Yaba Davida o a nyoloha ka mora hore Gade a mo bolelle seo Jehova a neng a mo laetse sona. 20 Ha Arauna a sheba tlase mme a bona morena le bahlanka ba hae ba tla ho yena, hanghang Arauna a tswa mme a inamela morena. 21 Arauna a re: “Ke hobaneng ha morenaka a tlile ho mohlanka wa hae?” Davida a re: “Ho tla reka seotlo sa hao e le hore re hahele Jehova aletare hore bolwetse bona bo tshwereng batho bo fediswe.”+ 22 Empa Arauna a re ho Davida: “Morenaka, se nke o nyehele ka seo o bonang se le molemo. Dikgomo tsa nyehelo ya setjheso ke tsena le selei sa ho pola le dijoko* tseo o ka di sebedisang bakeng sa patsi. 23 Morena, Arauna o o fa dintho tsena tsohle.” Yaba Arauna o re ho morena: “E se eka Jehova Modimo wa hao a ka o amohela.”
24 Le ha ho le jwalo, morena a re ho Arauna: “Tjhe, ke lokela ho se reka. Nke ke ka etsetsa Jehova Modimo wa ka mahlabelo ka dintho tseo ke di fumaneng mahala.” Yaba Davida o reka seotlo le dikgomo ka dikotwana* tsa silevera tse 50.+ 25 Davida a hahela Jehova aletare+ moo mme a nyehela mahlabelo a setjheso le mahlabelo a kopanetsweng. Yaba Jehova o araba kopo ya Davida bakeng sa setjhaba+ mme a fedisa kotlo ya Iseraele.