KAROLO YA 5

Kgutlelang ho “Modisa le Molebedi wa Meya ya Lona”

Na o se o kile wa hlahelwa ke a mang a mathata a hlalositsweng bukaneng ee? Haeba ho jwalo, ha o mong. Bahlanka ba bangata ba Modimo ba tshepahalang ba mehleng ya ha ho ne ho ngolwa Bibele le ba mehleng ena, ba ile ba nna ba hlahelwa ke mathata a kang ao. Jehova o ile a ba thusa hore ba a hlole mme le wena a ka o thusa.

“Ke ile ka qala ho hlokomela hore ha ho mohla Jehova a kileng a ntahla, le hore ke lokela ho kgutlela ho yena”

KGODISEHA hore Jehova o tla o tshehetsa ha o kgutlela ho yena. O tla o thusa hore o sebetsane le matshwenyeho, o lwantshane le ho utlwa bohloko le hore o kgotsofale ka ho feletseng ka lebaka la ho ba le letswalo le hlwekileng. Mohlomong o tla boela o susumelletsehe ho sebeletsa Jehova hammoho le badumedi mmoho le wena. Boemo ba hao bo tla tshwana le ba Bakreste ba mehleng ya baapostola bao moapostola Petrose a ileng a re ho bona: “Le ne le le jwaloka dinku, tse hlahlathelang; empa jwale le kgutletse ho modisa le molebedi wa meya ya lona.”—1 Petrose 2:25.

Ruri ho kgutlela ho Jehova ke ntho e molemo ka ho fetisisa eo o ka e etsang. Hobaneng? O tla thabisa pelo ya hae. (Liproverbia 27:11) Jwalokaha o tseba, Jehova o na le maikutlo, kahoo dintho tseo re di etsang di a mo ama. Ke nnete hore Jehova ha a re qobelle hore re mo rate le hore re mo sebeletse. (Deuteronoma 30:19, 20) Moithuti e mong wa Bibele o ile a re: “Ha ho na motho ya ka bulang pelo ya hao, haese wena feela.” Re ka e bula ka ho sebeletsa Jehova ka lerato. Ha re etsa jwalo, re mo fa mpho ya bohlokwa ka ho fetisisa, e leng botshepehi ba rona mme seo se mo thabisa haholo. Ka sebele, ha ho letho le ka bapiswang le thabo eo re e fumanang ka lebaka la ho sebeletsa Jehova.—Liketso 20:35; Tšenolo 4:11.

Moradi wabo rona ya neng a se a sa kopanele o amohelwa ka mofuthu dibokeng

Ho phaella moo, ha o boela o sebeletsa Jehova o tla thabela dithuto tseo a fanang ka tsona. (Matheu 5:3) Ka tsela efe? Lefatsheng ka bophara batho ba ntse ba ipotsa dipotso tse kang, ‘Re phelelang?’ Ba labalabela ho fumana dikarabo tsa dipotso tse mabapi le morero wa bophelo. Jehova o bopile batho ba e na le takatso eo. O re bopetse hore re thabele ho mo sebeletsa. Ha ho na ntho e re thabisang ho feta ho tseba hore re sebeletsa Jehova hobane re mo rata.—Pesaleme ya 63:1-5.

Kgodiseha hore Jehova o batla hore o kgutlele ho yena. O ka kgodiswa keng? Nahana ka ntlha ena: Ha ho ne ho ngolwa bukana ena ho ile ha rapelwa ka tiyo. Mohlomong o ile wa e fuwa ke moholo ka phuthehong kapa ke modumedi mmoho le wena. Yaba o susumelletseha hore o e bale mme o etse diphetoho. Sena sohle se bontsha hore Jehova ha aa o lebala. Empa ka bonolo o o kgutlisetsa ho yena.—Johanne 6:44.

Taba ya hore ha ho mohla Jehova a ka lebalang bahlanka ba hae ba lahlehileng, e ya re kgothatsa. Ke sona seo moradi wabo rona Donna, a ileng a se ananela. O ile a re: “Ke ne ke se ke le hole le nnete, empa hangata ke ne ke kgothatswa ke Pesaleme ya 139:23, 24, e reng: ‘Mpatlisise ka hohle, Modimo, mme o tsebe pelo ya ka. Ntlhahlobe, mme o tsebe menahano ya ka e ntlhokisang botsitso. O bone hore na ho na le tsela leha e le efe e bohloko ka ho nna, o ntsamaise tseleng ya nako e sa lekanyetswang.’ Ke ne ke hlokomela ke se ke tsamaela hole le phutheho mme sebaka seo ke leng ho sona hase ntshwanele, hape ke ne ke tseba hore ke lokela ho kgutlela ka mokgatlong wa Jehova. Ke ile ka qala ho hlokomela hore ha ho mohla Jehova a kileng a ntahla, le hore ke lokela ho kgutlela ho yena. Hona jwale ke thabile haholo hore ebe ke ile ka etsa jwalo!”

Jehova o tla o tshehetsa ha o kgutlela ho yena

Re rapela ka tiyo hore le wena o boele o fumane “thabo ya Jehova.” (Nehemia 8:10) O ke ke wa ikwahlaela hore ebe o kgutletse ho Jehova.

Dikarabo Tsa Dipotso Tse Mabapi le ho Kgutlela ho Jehova

KE LOKELA HO QALA KA HO ETSANG?

Ha motho ya neng a kula a se a fodile a ka nna a lokela ho etsa dintho tseo a neng a tlwaetse ho di etsa hanyane ka hanyane. Ka ho tshwanang, o ka ntlafatsa kamano ya hao le Modimo ka hore o ithute dintho tse seng kae letsatsi le letsatsi. O se ke wa nahana hore o lokela ho etsa dintho tsohle ka nako e le nngwe. Mohlomong o ka nka metsotso e seng mekae o bala Bibele kapa o mametse mmalo wa yona o rekotilweng, hape o ka bala dingolwa kapa wa kena websaeteng ya jw.org/st-za mme wa boela wa shebella mananeo a ho jw.org/st-za. Leka ho ya dibokeng tsa phutheho kapele kamoo o ka kgonang. Ha bohlokwa le ho feta, rapela Jehova hore a o thuse. ‘Lahlela matshwenyeho ohle a hao ho yena, hobane o a o tsotella.’—1 Petrose 5:7.

“Ka mora hore ke kgaotse ho kopanela, ke ne ke tshaba le ho rapela. Eitse hoba ke itete sebete ho rapela, moholo e mong wa phutheho e haufi o ile a nketela. O ile a nthusa ho elellwa hore Jehova ha aa ntahla. A nkgothalletsa ho bala Bibele kamehla. Ka ho etsa seo, ke ile ka tiya lengole mme ka qalella ho ba teng dibokeng. Ho e so ye kae, ke ile ka boela ka ya tshimong. Ruri ke a leboha hore ebe Jehova ha aa ka a lahla tshepo ka nna.”—Eeva.

EBE BATHO BA KA PHUTHEHONG BA TLA NTADIMA JWANG?

Kgodiseha hore batho ba ka phuthehong ba tla o amohela ka mofuthu. Ba ke ke ba o tshwaya diphoso kapa hona ho o ahlola, empa ba tla o bontsha lerato ba be ba etse sohle seo ba ka se kgonang ho o kgothatsa.—Baheberu 10:24, 25.

“Ke ne ke swabela ho ya Holong ya Mmuso. Ke ipotsa hore na ba bang ba tla reng. E mong wa baradi babo rona ya bileng phuthehong eo ka dilemo tse 30 o ile a re: ‘Re a o amohela Ngwanaka!’ Seo se ile sa nkama maikutlo. Ke ile ka ikutlwa ke amohelehile.”—Javier.

“Ke ile ka ya Holong ya Mmuso mme ka dula ditulong tse ka morao e le hore batho ba se ke ba mpona. Leha ho le jwalo, ba bang ba ile ba ntseba le hoja ke ne ke qetetse ho tla dibokeng ha ke sa le ngwana. Ba ile ba nkamohela mme ba nhaka ka mofuthu hoo ke ileng ka phutholoha. Ke ile ka ikutlwa hore ke amohetswe ka diatla tse pedi.”—Marco.

BAHOLO BA KA NTHUSA JWANG?

Baholo ba tla o tshwara ka mosa. Ba tla o babatsa haele mona o e na le takatso ya ho tsosolosa “lerato leo o neng o e na le lona pele.” (Tšenolo 2:4) Ka mosa ba tla o thusa ho lokisa diphoso tsa hao, mme ba tla etsa seo “ka moya o bonolo.” (Bagalata 6:1; Liproverbia 28:13) Ba ka nna ba kopa mohweletsi e mong hore a o kgannele thuto, mohlomong a sebedisa buka ya O ka Thaba ka ho sa Feleng! kapa Atamela ho Jehova. Kgodiseha hore baholo ba tla o kgothatsa ba be ba o tshehetse kahohle kamoo ba ka kgonang kateng.—Esaia 32:1, 2.

“Ka dilemo tse robedi tseo ke neng ke sa kopanele ka tsona, baholo ba ne ba nthusa. Ka letsatsi le leng, moholo e mong o ile a mpontsha difoto tseo a neng a re nkile tsona nakong e fetileng. Di ile tsa nkgopotsa dintho tse ngata tse monate tseo re neng re di etsa hoo ke ileng ka hlolohelwa ho sebeletsa Jehova hape. Ka lerato baholo ba ile ba nthusa hore ke boele ke tlwaele ho etsa dintho tse matlafatsang kamano ya ka le Modimo.”—Victor.

“O Tla le Matlafatsa”

Buka ya rona ya Binelang Jehova, e na le dipina tse mmalwa tse ka o tshedisang le ho o kgothatsa ha o ntse o leka ho kgutlela ho Jehova. Nka ka mohlala mantswe a pina ya 60. E thehilwe ho 1 Petrose 5:10, e nang le sehlooho se reng “O Tla le Matlafatsa.”

Jehova o ile a le bontsha nnete

A le ntsha lefifing la lefatshe.

A bona takatso ya pelo tsa lona

Ya ho batla Mmopi le ho loka.

La re le tla etsa thato ya hae;

A le thusa hore le e phethe.
Modimo Jah o le file Mora wa hae;

Kahoo o le batlela katleho.

O fane ka Mora ya ratehang wa Hae,

Ho hang a ke ke a le tlohela.

O hopola lerato la lona;

O hlokomela bahlanka ba Hae.

(KHORASE)

O le rekile ka madi a Kreste Jesu.

O tla le tiisa, a le matlafatse.

A le tataise a be a le boloke.

O tla le tiisa, a le matlafatse.

E le hore o mamele pina ena ka mantswe le dipina tse ding tsa rona, skena letshwao lena kapa o kene ho jw.org/st-za