O Ile a Bolaya Ngwanabo ka Lebaka la ho Kwata

Ka mora hore Adama le Eva ba lelekwe serapeng sa Edene, ba ile ba ba le bana ba bangata. Mora wa bona wa pele Kaine, e ne e le molemi mme wa bobedi e leng Abele e le modisa.

Ka letsatsi le leng, Kaine le Abele ba ile ba etsetsa Jehova mahlabelo. Na o a tseba hore na sehlabelo keng? Ke mpho e kgethehileng. Jehova o ile a thabela sehlabelo sa Abele empa a se ke a thabela sa Kaine. Kaine o ile a kwata haholo. Yaba Jehova o re Kaine a se ke a kwata hobane ha a kwatile, o tla etsa phoso. Empa ha a ka a mamela.

Kaine o ile a re ho Abele: ‘A re ye naheng.’ Ha ba le naheng, Kaine o ile a otla Abele mme a mo bolaya. Jehova o ile a etsang? O ile a lelekela Kaine hole le ba lelapa labo. A etsa hore a se ke a hlola a kgutla.

Re ithutang ho see? Re ka nna ra kwata ha re bona dintho di sa etswe ka tsela eo re batlang ka yona. Haeba re kwatile kapa batho ba bang ba re bolella hore re se ke ra kwata, re lokela ho kgaotsa ho kwata e le hore re se ke ra etsa ntho e mpe.

Jehova o tla dula a hopola Abele hobane Abele o ile a etsa se nepahetseng. Modimo o tla tsosa Abele ha a etsa lefatshe paradeise.