Anna o Rapella ho ba le Mora

Monna wa Moiseraele ya bitswang Elkana o ne a ena le basadi ba babedi, e leng Anna le Penina mme a rata Anna ho feta Penina. Penina o ne a dula a soma Anna hobane a se na bana empa yena a ena le ba bangata. Elkana o ne a tsamaya le ba lelapa la hae selemo le selemo ho ya rapela tabernakeleng e Shilo. Ka le leng ha ba le moo, a bona hore Anna o utlwile bohloko haholo. Yaba o re: ‘Anna, o se ke wa lla. Ke ntse ke le teng. Ke a o rata.’

Ha morao, Anna o ile a yo rapela a le mong. O ne a ntse a lla ha a kopa Jehova hore a mo thuse. O ile a re: ‘Jehova haeba o ka mpha mora, ke tla o fa yena hore a o sebeletse bophelo bohle ba hae.’

Moprista ya Phahameng Eli o ile a bona Anna a ntse a lla yaba o nahana hore o tahilwe. Empa Anna a re ho yena: ‘Tjhe morenaka, ha ke a tahwa. Ke ntse ke bolella Jehova bothata ba ka.’ Eli o ile a hlokomela hore o entse phoso ha a re Anna o tahilwe yaba o re: ‘E se eka Modimo a ka o fa seo o se kopang.’ Anna o ile a ikutlwa a imolohile yaba o a tsamaya. Ka mora dikgwedi tse seng kae, o ile a ba le mora yaba o mo reha Samuele. O ka inahanela feela hore na Anna o ne a thabile hakaakang!

Anna ha a ka a lebala tshepiso ya hae ho Jehova. O ile a isa Samuele tabernakeleng a sa le monyenyane hore a yo sebeletsa Jehova. O ile a re ho Eli: ‘Enwa ke mora eo ke ileng ka rapela Jehova hore a mphe yena. Ke fana ka yena hore a mo sebeletse bophelo bohle ba hae.’ Elkana le Anna ba ne ba tjhakela Samuele selemo se seng le se seng, ba mo tlisetsa seaparo se se nang matsoho. Jehova o ile a fa Anna bara ba bang ba bararo le baradi ba babedi.