Ho Ntlafatsa Tsebo Ya Rona Boboleding​—Ka ho Fetofetoha le Maemo

KE HOBANENG HA HO LE BOHLOKWA: Batlotsuwa le ba bongata bo boholo ba mema batho ba mefuta yohle hore ba “nke metsi a bophelo ntle ho tefo.” (Tše 22:17) Metsi a na a tshwantshetso a emela dintho tsohle tseo Jehova a fanang ka tsona ho pholosa batho ba mamelang sebeng le lefung. E le hore re thuse batho ba nang le ditso le ditumelo tse sa tshwaneng, re lokela ho bolela “ditaba tse molemo tse sa feleng” ka tsela e kgahlang e mong le e mong wa bona.​—Tše 14:6.

O KA ETSA SEO JWANG:

• Kgetha ho bua ka taba e itseng kapa lengolo le tla ama batho ba tshimong ya heno. O ka kgetha ho bua o sebedisa mohlala wa seo o ka se buang le batho kapa wa kgetha ho bua ka molaetsa oo o kileng wa o sebedisa ka katleho. Batho ba tshimong ya heno ba thabela ho bua ka ditaba dife le mangolo afe? Na ho na le ntho e hlahileng ditabeng eo batho ba nahanang ka yona le eo ba buang ka yona? Ke taba efe e ka kgahlang monna kapa mosadi?

• Dumedisa batho bao o buisanang le bona ka tsela e tlwaelehileng sebakeng sa heno.​—2Ko 6:3, 4

• Tseba dingolwa le divideo tse hlahang ho Dithulusi Tsa ho Ruta e le hore o di bontshe motho ya thahasellang

• Downloada divideo le dingolwa ka dipuo tsa batho ba tshimong ya heno

• Fetola molaetsa wa hao ho latela ditlhoko tsa mongantlo. (1Ko 9:19-23) Ka mohlala, o ka reng haeba o utlwa hore mongantlo o sa tswa hlokahallwa?

SHEBELLA VIDEO, EBE KA MORA MOO O ARABA DIPOTSO TSE LATELANG:

• Ke eng eo mohweletsi a qadileng ho bua ka yona le mongantlo?

• Mongantlo o ne a etsahallwa ke eng bophelong ba hae?

• Lengolo le neng le le molemo boemo boo ke lefe, hona hobaneng?

• O fetola molaetsa wa hao jwang hore o kgahle batho ba tshimong ya heno?