“Ntwa ke ya Jehova”

Ka 1999, Mmuso wa Fora o ile wa re lekala la rona la Fora le ne le tlameha ho patala lekgetho ho tswa menehelong e ileng ya bokellwa ho tloha ka 1993 ho ya ho 1996. Re ile ra ya makgotleng a Fora empa ha re a ka ra fumana thuso. Re ile ra boela ra ya lekgotleng la boipiletso empa re ile ra hlolwa. Ka mora moo, mmuso o ile wa nka tjhelete e neng e le bankeng ya mokgatlo e ka hodimo ho di-euro tse 4 500 000 ($6 300 000 U.S.). Re ne re se re tshepile hore re tla thuswa ke Lekgotla la Europe la Ditokelo Tsa Botho. Empa lekgotla leo le ile la re pele le nka qeto, re ne re tlameha ho kopana le babuelli ba mmuso wa Fora hammoho le moemedi wa lekgotla la Europe ho bona hore na re ka se dumellane pele re ya kgotla.

Re ne re lebelletse hore moemedi wa lekgotla a re re patale bonyane karolo e itseng ya tjhelete eo ho neng ho itswe re e ntshe. Le ha ho le jwalo, re ne re tseba hore re ne re tla be re tlola melaomotheo ya Bibele haeba re ne re ka patala tjhelete le ha e le e nyenyane feela. Bara le baradi ba bo rona ba ne ba fane ka monehelo oo bakeng sa ho tshehetsa mosebetsi wa boboledi. Ka hoo, e ne e tla be e le phoso ho fa mmuso tjhelete eo. (Mat. 22:21) Empa re ile ra ya kopanong eo ho bontsha hore re hlompha lekgotla la Europe.

Kopano eo e ne e tshwaretswe ho e nngwe ya diphaposi tse ntle haholo lekgotleng. Hang feela ha moemedi wa lekgotla a qala ho bua, o ile a hlakisa hore o ne a lebelletse hore Dipaki Tsa Jehova tsa Fora di patale lekgetho leo mmuso o le batlang. Re ile ra susumelletseha ho mo botsa, “Na o hlokometse hore mmuso o se o ntse o nkile tjhelete e ka hodimo ho di-euro tse 4 500 000 ho tswa bankeng ya rona?”

O ile a makala. Ha babuelli ba mmuso ba dumela hore ehlile ke sona se etsahetseng, maikutlo a moemedi wa lekgotla ka nyewe ena a ile a fetoha ka ho felletseng. O ile a ba kgalemela ka matla yaba o re kopano eo e fele hanghang. Ke ile ka hlokomela hore Jehova o ne a fetotse dintho ka tsela eo re neng re sa e lebella e le hore re ka hlola nyewe eo. Re ne re thabile haholo ha re tswa kopanong eo hape re ne re makalletse se neng se qeta ho etsahala.

Ka la 30 June 2011, Lekgotla la Europe la Ditokelo Tsa Botho le ile la etsa qeto e neng e dumellana le kopo ya rona. Le ile la re lekgetho leo mmuso o neng o le batla le ne le se molaong mme o ne o lokela ho kgutlisa tjhelete eo o neng o e nkile o be o patale le phaello. Qeto ena e entse hore borapedi ba nnete bo tswele pele bo sireletsehile Fora ho fihlela lena le hodimo. Potso yane eo re neng re sa nahana hore re tla e botsa, e ile ya tshwana le lejwe le ileng la kgohlela phatleng ya Goliathe hobane e ile ya fetola qeto e ileng ya nkwa mabapi le nyewe ya rona. Ke hobaneng ha re ile ra hlola? Ke hobane “ntwa ke ya Jehova” jwalo ka ha Davida a ile a bolella Goliathe.—1 Sam. 17:​45-47.

Nyewe ena ha se yona feela eo Dipaki Tsa Jehova di ileng tsa e hlola. Ho theosa le dilemo, mekgatlo e matla ya dipolotiki le ya bodumedi e ile ya re hanyetsa. Le ha ho le jwalo, re se re hlotse dinyewe tse 1 225 makgotleng a phahameng dinaheng tse 70 le makgotleng a mang lefatsheng ka bophara. Dinyewe tsena tseo re di hlotseng di re thusa ho sireletsa ditokelo tsa rona tsa mantlha tse kang ho ba mokgatlo wa bodumedi o molaong, ho kopanela mosebetsing wa boboledi, ho se kenelle meketeng ya botjhaba le ho hana ho tshelwa madi.

Ho tlile jwang hore ke be karolo ya nyewe e neng e le Europe empa nna ke sebeletsa Ntlokgolo ya Dipaki Tsa Jehova e New York, Amerika?

KE HODISITSWE KE BARUMUWA BA TJHESEHANG

Batswadi ba ka e leng George le Lucille Brumley, ba ne ba le tlelaseng ya bo12 ya Gileade. Ha morao ba ile ba abelwa ho yo sebeletsa Ethiopia e leng moo ke hlahetseng teng ka 1956. Ke ile ka rehwa Philip e le ha ke rehellwa ka moevangedi Filipi wa lekgolong la pele la dilemo. (Dik. 21:8) Selemo ha morao mmuso o ile wa re thibela ho tshwara diboka le ho etsa mosebetsi wa boboledi. Ha ke ntse ke le monyenyane, ke hopola lelapa leso le etsa dintho tsena ka sekgukgu. Ka ha ke ne ke le ngwana, ke ne ke utlwa ho le monate. Empa ka maswabi, mmuso o ile wa re qobella hore re tlohe Ethiopia ka 1960.

Re ile ra fallela Wichita e Kansas, Amerika, mme batswadi ba ka ba ne ba rata mosebetsi wa boboledi jwalo ka ha ba ne ba o rata ha e ne e le baromuwa. Ba rutile nna le ausi wa ka Judy ha mmoho le ngwaneso wa moshanyana Leslie, bao le bona ba hlahetseng Ethiopia, ho rata Jehova ka dipelo tsa rona tsohle le ho mo sebeletsa. Ke kolobeditswe ke le dilemo di 13. Dilemo tse tharo ha morao, lelapa leso le ile la boela la fallela Arequipa e Peru moo ho neng ho ena le tlhokahalo.

Ha ke le dilemo di 18 ka 1974, lekala Peru le ile la kgetha nna le bara ba bang ba bo rona ba bane hore re be bopulamadiboho ba kgethehileng. Re ile ra abelwa tshimo e neng e eso ka e sebetswa hodimo Dithabeng tsa Andes e Bohareng. Re ne re tlameha ho pakela batho ba neng ba bua Sequechua le Seaymara. Re ne re tsamaya ka koloi eo motho a neng a ka dula ka hare ho yona eo re neng re e bitsa Areka hobane e ne e shebahala jwalo ka lebokose le leholo. Ke tla dula ke hopola ka moo re neng re sebedisa Bibele ka teng ho bontsha batho ba moo hore haufinyane Jehova o tla fedisa bofutsana, ho kula le lefu. (Tshen. 21:​3, 4) Ba bangata ba bona e ile ya eba barapedi ba Jehova.

HA KE QALA HO SEBELETSA NTLOKGOLO

Ka 1977, morabo rona Albert Schroeder eo e neng e le setho sa Sehlopha se Busang sa Dipaki Tsa Jehova, o ne a etetse Peru mme o ile a nkgothalletsa ho kenya kopo ya ho yo sebeletsa Bethele e ntlokgolo. Ka hoo, ke ile ka etsa jwalo. Ka mora nako e sa fediseng pelo, ke ile ka qala ho sebeletsa Bethele e Brooklyn ka la 17 June 1977. Ka dilemo tse nne, ke ile ka sebetsa lefapheng la ho Hlwekisa le lefapheng la ho Hlokomela Mehaho.

Ka June 1978, ha ke ne ke le kopanong ya matjhaba e neng e tshwaretswe New Orleans e Louisiana, ke ile ka kopana le Elizabeth Avallone. O ne a hodisitswe ke batswadi ba tshwanang le ba ka ba neng ba rata ho sebeletsa Jehova. Ha re kopana, o ne a se a ena le dilemo tse nne e le pulamadiboho ya ka mehla mme o ne a batla ho ba tshebeletsong ya nako e tletseng bophelo bohle ba hae. Re ile ra nna ra bua mme ha nako e ntse e ya re ile ra tsebana haholwanyane yaba re qala ho ratana. Re ile ra nyalana ka la 20 October 1979 mme ra sebeletsa Bethele mmoho.

Phutheho ya pele eo re ileng ra kopanela ho yona ka mora hore re nyalane e ne e le ya Brooklyn Spanish. Bara le baradi ba bo rona ba moo, ba ne ba re rata haholo. Ha dilemo di ntse di ya, re ile ra kopanela diphuthehong tse ding tse tharo. Bara le baradi ba bo rona ba diphuthehong tseo, le bona ba ne ba re rata haholo ba bile ba tshehetsa tshebeletso ya rona ya Bethele. Re ananela tshehetso ya bona hammoho le ya metswalle le ba lelapa ba ileng ba re thusa ho hlokomela batswadi ba rona ha ba ntse ba tsofala mme ba hloka thuso.

MOSEBETSI WA KA LEFAPHENG LA TSA MOLAO

Ke ile ka makala ha ke abelwa ho yo sebeletsa Lefapheng la Tsa Molao ka January 1982. Dilemo tse tharo ha morao, ke ile ka koptjwa hore ke ye univesithi e le hore ke fumane lengolo la ho ba mmuelli. Ha ke ntse ke le univesithi, ke ile ka makala ha ke hlokomela hore batho ba bangata Amerika le dinaheng tse ding, ba se ba ena le bolokolohi ba ho etsa dintho tse ngata ka lebaka la dinyewe tse ileng tsa hlolwa ke Dipaki Tsa Jehova. Dinyewe tsena ke tsa bohlokwa haholo hobane re ne re rutwa ka tsona kgafetsa.

Ka 1986 ha ke le dilemo di 30, ke ile ka kgethwa hore ke be molebedi wa Lefapha la Tsa Molao Bethele. Ke ne ke thabile empa ke ne ke boetse ke tshohile hobane ke ne ke le monyenyane haholo ebile ke tseba hore kabelo ena e ne e sa tlo ba bonolo.

Ka 1988 ke ile ka fumana lengolo la ka la ho ba mmuelli empa ke ile ka hlokomela hore ho ya univesithi ho ne ho amme kamano ya ka le Jehova haholo. Thuto e phahameng e ka etsa hore motho a bone eka o phahametse ba bang hobane feela ba sa ruteha jwalo ka yena. Elizabeth ke yena ya ileng a nthusa. O ile a nthusa hore ke boele ke etse dintho tseo ke neng ke tlwaetse ho di etsa pele ke ya univesithi ho matlafatsa setswalle sa ka le Jehova. Ho nkile nako hore setswalle sa ka le Jehova se be matla hape. Taba ena e nthutile hore ho ba le tsebo e ngata ha se yona ntho ya bohlokwa ka ho fetisisa bophelong. Ntho ya bohlokwa ka ho fetisisa ke ho ba le kamano e ntle le Jehova, ho mo rata le ho rata batho ba hae.

HO SEBEDISA MOLAO HO FUMANA TOKELO YA HO BOLELA DITABA TSE MONATE

Ha ke tswa univesithi, ke ne ke batla ho thusa Lefapha la Tsa Molao hore le sireletse mokgatlo wa Jehova le tokelo ya rona ya ho bolela ditaba tse monate. Ke ne ke thabela mosebetsi wa ka haholo empa ho ne ho se bonolo hobane dintho di ne di dula di fetoha ka pelenyana ka mokgatlong wa Jehova. Ka mohlala, nakong e fetileng re ne re kopa batho hore ba ntshe monehelo ha re ba fa dingolwa empa ka 1990, Lefapha la Tsa Molao le ile la koptjwa hore le tle ka leano le tla thusa hore mokgwa ona o se ke wa hlola o sebediswa. Ka mora moo, Dipaki Tsa Jehova di ile tsa qala ho fana ka dingolwa mahala. Sena se ile sa nolofatsa mosebetsi o etswang Bethele hammoho le tshimong mme ho fihlela hona jwale, mokgwa ona o motjha o sireletsa mokgatlo hore o se ke wa ba le mathata a amanang le ho patala lekgetho. Batho ba bang ba ne ba nahana hore phetoho ena e tla etsa hore ho se ke ha hlola ho eba le monehelo o lekaneng bakeng sa ho hatisa dingolwa empa ho ile ha etsahala ho fapaneng. Palo ya batho ba neng ba sebeletsa Jehova ka 1990 e se e imenne ka makgetlo a fetang a mabedi mme hona jwale batho ba se ba kgona ho fumana dingolwa le ho ithuta ka Jehova mahala. Ho theosa le dilemo, ke ithutile hore diphetoho tse kgolo tse bileng teng ka mokgatlong wa rona di ile tsa atleha ka thuso ya Jehova le ka tataiso ya mohlanka ya tshepahalang le ya bohlale.—Ex. 15: 2, Mat. 24:45.

Ha re hlole dinyewe hobane feela re ena le babuelli ba hlwahlwa empa ntho e etsang hore baahlodi le ba boholong ba re thuse ke hobane re itshwere hantle. Ke bone mohlala wa sena ka 1998 ha bara ba bo rona ba bararo ba Sehlopha se Busang le basadi ba bona ba ne ba ile dikopanong tsa setereke Cuba. Ha re ne re eba le dikopano le ba boholong pusong, re ne re dula re ba bolella hore ha re kenelle dipolotiking empa tsela eo bara bana ba bo rona ba neng ba hlompha ebile ba le mosa ka yona e ile ya fana ka bopaki ho ba boholong hore ha re kenelle dipolotiking.

Le ha ho le jwalo ha maemo a re tlama ho ya kgotla, re “sebedisa molao ho fumana tokelo ya ho bolela ditaba tse monate.” (Bafil. 1:7) Ka mohlala, ka dilemo tse ngata ba boholong pusong Europe le Korea Borwa, ba ne ba sa dumele hore re na le tokelo ya ho hana ho kenela sesole. Ka lebaka la sena, bara ba bo rona ba Europe ba ka bang 18 000 le ba Korea Borwa ba ka hodimo ho 19 000, ba ile ba ya teronkong ka lebaka la ho hana ho kenela sesole.

Ka la 7 July 2011, Lekgotla la Europe la Ditokelo Tsa Botho le ile la etsa qeto nyeweng ya Bayatyan v. Armenia, hore dinaheng tsohle tse Europe motho a ka etsa mosebetsi o mong haeba a sa kgone ho kenela sesole ka lebaka la tumelo ya hae. Ha morao, Lekgotla la Molao wa Motheo la Korea Borwa le ile la nka qeto e tshwanang ka la 28 June 2018. Re ne re ke ke ra kgona ho hlola dinyewe tsena tsa bohlokwa haeba ba bang ba bara ba bo rona ba ile ba nka lehlakore.

Lefapha la Tsa Molao le ntlokgolo le makaleng a mang lefatsheng lohle le sebetsa ka thata ho sireletsa tokelo ya rona ya ho sebeletsa Jehova le ho bolela ditaba tse monate. Ke tlotla e kgolo ho buella bara le baradi ba bo rona ba hanyetswang ke ba boholong. Ho sa tsotellehe hore na re a hlola kapa re a hlolwa makgotleng, dinyewe tsa rona di fana ka bopaki ho babusisi le marena le ho ditjhaba tsohle. (Mat. 10:18) Re qotsa ditemana tsa Bibele ditokomaneng tsa rona tsa molao le ha re buella dinyewe tsa rona ka pela baahlodi, baemedi ba mmuso, metjha ya phatlalatso le batho ka kakaretso. Sena se etsa hore ba dipelo di ntle ba ithute ka Dipaki Tsa Jehova le hore seo re se dumelang se tswa ka Bibeleng. Ba bang ba batho bana e se ebile e le Bakrestemmoho le rona.

KE A LEBOHA JEHOVA!

Ka dilemo tse 40, ke bile le tlotla ya ho thusa diofisi tsa makala lefatsheng lohle mme ka hlaha ka pela ba boholong pusong le ka pela makgotla a phahameng a mangata. Ke rata bara le baradi ba bo rona bao ke sebetsang le bona Lefapheng la Tsa Molao mona ntlokgolo hammoho le ba sebeletsang mafapheng a tsa molao makaleng a mang lefatsheng lohle. Ke thabile hobane Jehova o ntlhohonolofaditse haholo bophelong.

Haesale Elizabeth a ntsheheditse ka lerato ka dilemo tse 45 ho sa tsotellehe hore na ho ne ho le bonolo kapa ho le thata hakae. O ne a ntshehetsa haholo le hoja a na le bolwetse bo hlaselang masole a hae a mmele le bo etsang hore a fokollwe ke matla.

Re ithutile hore ha re hlole ka lebaka la bokgoni le matla a rona. Empa jwalo ka ha Davida a bontshitse, “Jehova ke matla a batho ba hae.” (Pes. 28:8) Ka nnete “ntwa ke ya Jehova.”