JW Broadcasting ‘E ya re Matlafatsa le ho re Thabisa!’

HO TLOHA ha JW Broadcasting e thakgolwa ka selemo sa 2014, e ile ya tswela pele ho thabisa bashebelli ba yona le ho ba matlafatsa tumelong. Hona jwale e fumaneha ka dipuo tse fetang 90. Ka mohlala, bahweletsi ba fetang 130 000 naheng ya Benin, Côte d’Ivoire, Ghana, le Togo ba mamela mananeo a fetoletsweng ka Seewe, Sega le Setwi (jwalokaha ho bontshitswe).a

Agatha, e leng mosadi wa mopotolohi e mong ya naheng ya Ghana o re: “Ke utlwa eka Jehova o bua le nna ha ke mametse ditho tsa Sehlopha se Busang le bathusi ba tsona. Ke a ipotsa hore na ebe ke ne ke tla thola monyetla o tjena kae! Kannete tokisetso ena e entse hore re ikutlwe re le haufi haholo le bara le baradibabo rona lefatsheng lohle.”

Tlaleho e tswang naheng ya Zambia e re: “Bahweletsi diphuthehong tse ngata ba etsa boiteko ba hore ba fumane JW Broadcasting le hoja ho se bonolo. Ka mohlala, Phutheho ya Misako e bohole ba dikhilomithara tse ka bang 30 ho toropo e haufi, e mapolasing moo ho nang le melapo e phoroselang ha pula e nele.” Simon, ke mohlanka ya sebeletsang phuthehong ya Misako mme o tlile moo ho hlokahalang bahweletsi. Simon o re: “E le hore re fumane divideo kgwedi le kgwedi, motho e mong phuthehong o tsamaya dihora tse ka bang tse pedi pele a ilo palama koloi e tla mo isa moo a ka kgonang ho downloada mananeo. Ntatemoholo e mong ya dilemo di 70 le bara ba hae ba babedi ba ne ba so ka ba ya dibokeng tsa Dipaki Tsa Jehova pele, empa o ile a thaba ha a utlwa hore ho tlo shebellwa divideo dibokeng, mapolasing a jwalo ka ao. O re: ‘Ena ke tsela ya ho ithuta ka Modimo.’”

Lengolo le tswang naheng ya Russia le re: “E se e le selemo jwale re ntse re shebella JW Broadcasting mme re e rata haholo. Kamora ho shebella lenaneo la pele fela e ne eka re a lora! Re ile ra utlwa re le bonngweng le bara le baradibabo rona lefatsheng lohle! Ra bona hantle hore ehlile re bara ba motho! Re ne re thabetse le ho bona barababo rona ba Sehlopha se Busang. Ba sebetsa ka thata ho etsa bonnete ba hore re fumana dijo ka nako e tshwanetseng ebile monate ke hore re kgona le ho ba tseba. Re dula re lebeletse lenaneo le latelang ka tjantjello mme re motlotlo ho bitswa ka lebitso la Dipaki Tsa Jehova. Kahoo, re leboha Jehova le Kreste ka dintho tsena. Kannete JW Broadcasting e ya re matlafatsa le ho re thabisa!”

Horst le Helga, e leng banyalani ba bang ba hodileng ba dulang naheng ya Germany, ba re: “JW Broadcasting e di hula ka pele. Re ikutlwa re le matla, ha holoholo ha re bona bara le baradibabo rona ba holofetseng. Mohlala wa bona, o re susumelletsa ho etsa sohle seo re ka se kgonang ho sa tsotellehe bokudi ba rona. E ile ya re ha re bona morabo rona ya sa kgoneng ho tsamaya a sebeletsa e le moholo wa phutheho, re ile ra ithuta hore kaofela ha rona re ka kgona ho etsetsa Jehova se itseng. Kamehla, mehlala e jwalo ya bara le baradibabo rona, e ya re matlafatsa. Re dula re kopa Jehova hore a ba matlafatse.”

Kodi ya dulang England, o re: “Ke a leboha ka divideo tsa Kalebe le Sophia, websaete ya jw.org le JW Broadcasting. Le etsa hore ho be bonolo ho utlwisisa Bibele. Ke kolobeditswe ha kena le dilemo tse 8. Ha ke hola ke batla ho lo sebetsa kahong ya Diholo tsa Mmuso hape ke ye Bethele. Ke se ke ntse ke tloba abuti hobane hona jwale ke na le dilemo tse 9.”

Ngwanana e mong ya dilemo tse 8, e leng Arabella ya dulang England o re: “Ke a leboha ka divideo. Ke rata ho ngola, kahoo ke thabela dikarolo tsa moo ho thweng ‘dintho tseo bana ba ka di etsang’ websaeteng ya jw.org. Dintho tseo di etsa hore ke be motswalle wa Jehova. Le tseba ho etsa dipina tse bonolo mme divideo tsa Kalebe le Sophia di ya nthusa. Ke ya leboha ka dintho tseo le di etsang.”