Bibele e re ke Hobaneng ha Batho ba sa Kgone ho Phedisana ka Kgotso?

Baetapele le mekgatlo ya lefatshe ha e kgone ho etsa hore ho be le kgotso lefatsheng. Hona jwale ho na le dintwa tse ngata ho feta tse neng di le teng pele ho Ntwa ya Bobedi ya Lefatshe. Hona jwale batho ba ka bang dibilione tse pedi, e leng kotara ya baahi ba lefatshe ba phela dibakeng tseo ho nang le dintwa.

Bibele e re ke hobaneng ha batho ba sa kgone ho etsa hore ho be le kgotso?

Mabaka a mararo a etsang hore ho se ke ha eba le kgotso

1. 1. Batho ba na le mekgwa e ba sitisang hore ba leke ho etsa hore ho be le kgotso. Bibele e re mehleng ena batho “ba tla itjheba bo bona, ba rate tjhelete, ba ithorise, ba ikgohomose, . . . ba sa tshepahaleng, . . . ba sa batleng ho dumellana le batho ba bang ka ntho efe kapa efe, . . . ba sa ithibeng, ba bohale bo tshosang, . . . ba manganga [le] ba ikakasang.”​—2 Timothea 3:​2-4.

2. 2. Ha batho ba sa thuswe ke Mmopi wa bona Jehovaa Modimo, ba ke ke ba kgona ho rarolla mathata a bona esita le ha ba ka ikopanya. Bibele e re: “Motho ha a kgone ho laola mehato ya hae.”​—Jeremia 10:23.

3. 3. Lefatshe le buswa ke motho ya kgopo a bile a le matla e leng Satane Diabolose ya “kgelosang lefatshe lohle.” (Tshenolo 12:9) Ho tla dula ho ena le dintwa le ho se utlwane ha feela lefatshe lohle le ntse le buswa ke Satane.​—1 Johanne 5:19.

Ke mang ya ka etsang hore ho be le kgotso?

Bibele e re ke Modimo ya tla etsa hore ho be le kgotso eseng batho.

• “Jehova o re: ‘Ke tseba hantle hore na ke tla le etsetsang. Ke tla le tlisetsa kgotso eseng tlokotsi e le hore le be le tshepo le bokamoso bo tjhabileng.’ ”​—Jeremia 29:11.

Modimo o tla phethahatsa tshepiso eo jwang? ‘Modimo ya fanang ka kgotso o tla fedisa Satane.’ (Baroma 16:​20) Modimo o tla sebedisa mmuso o lehodimong oo Bibele e reng ke “Mmuso wa Modimo,” ho etsa hore ho be le kgotso lefatsheng. (Luka 4:​43) Jesu Kreste, e leng Morena wa Mmuso oo, o tla ruta batho hore na ba phedisane ka kgotso jwang.​—Esaia 9:​6, 7.

• E le hore o ithute dintlha tse eketsehileng, bala sehlooho se reng: “ʼMuso oa Molimo o Tla Etsa’ng?”