Batho ha ba sa Tshepa Boradipolotiki​—Bibele e Reng ka Taba Ee?

Selemong sa 2024 feela, ho tlo ba le dikgetho tse ngata lefatsheng ho pota. Ha ho eso ka ho eba le dikgetho tse ngata hakana ka selemo. Le ha ho le jwalo batho ba bangata ha ba sa tshepa boradipolotiki.

• Ka la 19 September 2023, Pew Research Center e ile ya tlaleha hore diphuputso tse ngata tsa Maamerika di re “boradipolotiki ba bangata ba itjhebile bo bona” ho ena le ho ameha ka ho sebeletsa setjhaba.a

Batjha ba bangata le bona ha ba sa tshepa boradipolotiki.

• Ka la 29 January 2024, The New York Times e ile ya tlaleha hore “mehleng ena batjha ba amehile ka hore na mathata a teng a ka rarollwa jwang. Empa ha ho etswa diphuputso, batjha ba bontsha hore boradipolotiki ha ba rarolle mathata ao.”

• Ka la 22 January 2024, The Korea Times e ile ya tlaleha hore “dipalopalo di bontsha hore batjha ba tshepa batho ba nang le balatedi ba bangata metjheng ya puisano kapa ba behang divideo Inthaneteng, ho feta ka moo ba tshepang boradipolotiki.”

Na re ka tshepa hore boradipolotiki ba ka re tlisetsa bokamoso bo tjhabileng? Ke mang eo re ka mo tshepang?

Eba hlokolosi hore na o tshepa mang

Ke hantle ha batho ba ameha ka hore na ke mang eo ba lokelang ho mo tshepa. Bibele e re “ya se nang tsebo o dumela lentswe le leng le le leng empa ya bohlale o nahana ka mohato o mong le o mong wa hae.”​—Diproverbia 14:15.

• Ho ithuta ka ho eketsehileng hore na ntho e nepahetse kapa e fosahetse bala sehlooho se reng: “Itshireletse Ditabeng Tseo Eseng Nnete.”

Esita le boradipolotiki ba nang le sepheo se setle, ha ba kgone ho etsa ntho e nngwe le e nngwe eo ba batlang ho e etsa. Ke ka hoo Bibele e re fang keletso ena:

• “Le se ke la tshepa dikgosana kapa motho hobane a ke ke a le pholosa.”​—Pesaleme ya 146:3.

Moetapele eo o ka mo tshepang

Bibele e re Modimo o kgethile moetapele ya tshepahalang le ya sa hlolweng ke letho e leng Jesu Kreste. (Luka 1:​32, 33) Jesu ke Morena wa Mmuso wa Modimo, e leng mmuso o busang o le lehodimong.​—Matheu 6:10.

• Ithute hore na ke hobaneng ha re ka tshepa Jesu le hore na o tla etsang ho fedisa mathata ao re nang le wona. Bala sehlooho se reng: “Morena wa Mmuso wa Modimo ke Mang?” le se reng: “Mmuso wa Modimo o Tla Finyella Eng?”