Ke Hobaneng ha Dipaki Tsa Jehova di sa Keteke Matsatsi a Itseng a Phomolo?

• Dipaki Tsa Jehova di kgetha matsatsi a phomolo ao di ka a ketekang jwang?

• Na ha Dipaki Tsa Jehova di kgetha ho se keteke matsatsi a itseng a phomolo seo se bontsha hore ha di rate malapa a tsona?

• Na Dipaki Tsa Jehova di qobella batho ba bang hore ba se ke ba keteka matsatsi a phomolo a itseng?

Dipaki Tsa Jehova di kgetha matsatsi a phomolo ao di ka a ketekang jwang?

Dipaki Tsa Jehova di batla tataiso ka Bibeleng pele di ka etsa qeto ya hore na di tla keteka letsatsi la phomolo kapa tjhe. Ho na le mekete le matsatsi a phomolo ao ho hlakileng hore a hanana le seo Bibele e se rutang. Boemong boo, Dipaki Tsa Jehova ha di kenelle meketeng e jwalo. Ha ho tluwa meketeng eo ho sa hlakang hore na Bibele e reng ka yona, Paki e nngwe le e nngwe ya Jehova e lokela ho iketsetsa qeto ya hore na e tla keteka mokete oo kapa tjhe mme e lokela ho lwanela ho ba le letswalo le hlwekileng ka pela “Modimo le batho.”​—Liketso 24:16.

Dipaki Tsa Jehova di ipotsa tse ding tsa dipotso tsena pele di ka etsa qeto ya hore na di tla keteka letsatsi le itseng la phomolo kapa tjhe.a

• Na letsatsi leo la phomolo le thehilwe thutong e hananang le seo Bibele e se rutang?

  Lengolo la Bibele: “ ‘Tswang hara bona, mme le ikarole,’ ho bolela Jehova, ‘le kgaotse ho ama ntho e sa hlwekang.’ ”​—2 Bakorinthe 6:​15-​17.

  Dipaki Tsa Jehova di ikarola ka ho felletseng dithutong tse hananang le seo Bibele e se rutang. Ka hoo, ha di keteke matsatsi a phomolo a akarelletsang dintho tsena tse latelang.

  Matsatsi a phomolo a thehilweng tumelong kapa borapeding ba medimo e meng. Jesu o ile a re: “Ke Jehova Modimo wa hao eo o tla mo rapela, mme ke yena feela eo o tla mo etsetsa tshebeletso e halalelang.” (Matheu 4:​10) Dipaki Tsa Jehova di latela mantswe ao a Jesu ka hore di se ke tsa keteka Keresemese, Easter kapa May Dayb ka ha matsatsi ana a phomolo a thehilwe borapeding ba medimo e meng. Ho feta moo ha di keteke matsatsi a phomolo a kang ana a latelang.

  • Kwanzaa. Lebitso Kwanzaa “le tswa mantsweng a Seswahili a reng matunda ya kwanza mme a bolela ‘ditholwana tsa pele.’ Seo se bolela hore letsatsi leo la phomolo le tswa meketeng e neng e etswa ha ho qeta ho kotulwa ka lekgetlo la pele jwalo ka ha ho tlalehilwe historing ya Afrika.” (Encyclopedia of Black Studies) Le hoja batho ba bang ba nka Kwanzaa e se mokete wa bodumedi, Encyclopedia of African Religion e re letsatsi leo la phomolo le tshwana le mokete o tshwarwang Afrika moo ho wona ditholwana tsa pele “di fuwang medimo le badimo e le ho ba leboha.” Encyclopedia ena e boetse e re: “Letsatsing la phomolo la Kwanzaa le ketekwang ke Maafrika a Amerika ho etswa dintho tse tshwanang le tse etswang moketeng wa kotulo o tshwarwang Afrika ka hore batho ba lebohe medimo le badimo.”

    

  • Mid-Autumn Festival. “Mokete ona o etsetswa ho tlotla modimotsana wa kgwedi.” (Holidays, Festivals, and Celebrations of the World Dictionary) Moketeng oo, ho na le moetlo o etswang wa hore “basadi ba inamele modimotsana eo.”​—Religions of the World​—A Comprehensive Encyclopedia of Beliefs and Practices.

  • Nauruz (Nowruz). “Mokete ona o thehilwe bodumeding ba Zoroaster mme o tshwarwa ka letsatsi leo ho nkwang le halalela ka ho fetisisa khalendareng ya boholoholo ya Zoroaster. . . . Modimotsana wa mostshehare (Spirit of Noon) ya tsejwang e le [Rapithwin], ho ne ho nkwa a lelekwa ke modimotsana wa mariha (Spirit of Winter) nakong ya dikgwedi tsa mariha. Modimotsana wa motshehare o ne a amohelwa ka mokete o neng o tshwarwa motshehare o moholo ka letsatsi la Nowruz ho latela moetlo wa bodumedi ba Zoroaster.”​—United Nations Educational, Scientific and Cultural Organization.

  • Shab-e Yalda. Ho ya ka buka ya Sufism in the Secret History of Persia, mokete ona o tshwarwang dinaheng tse ding nakong ya mariha ha letsatsi le le lekgutshwane ka ho fetisisa o “amana le borapedi ba Mithra” e leng modimo wa lesedi. Batho ba bang ba nahana hore matsatsi ana a phomolo a amana le borapedi ba medimo ya letsatsi ya Baroma le Bagerike.c

  • Thanksgiving (Mokete wa Teboho). Jwalo ka Kwanzaa, letsatsi lena la phomolo le thehilwe meketeng ya boholoholo e neng e etsetswa ho rorisa medimo e fapafapaneng. Ha nako e ntse e eya “meetlo ena e neng e etswa mehleng ya boholoholo e ile ya kenyelletswa bodumeding ba Bokreste.”​—A Great and Godly Adventure​—The Pilgrims and the Myth of the First Thanksgiving.

  Mekete e thehilweng ditumelakgweleng kapa ho dumela ho modimo wa mahlohonolo. Bibele e re batho “ba lokisang tafole bakeng sa modimo wa Mahlohonolo” ba ‘furalla Jehova.’ (Esaia 65:​11) Ka lebaka leo, Dipaki Tsa Jehova ha di keteke matsatsi a phomolo a latelang:

  • Ivan Kupala. Buka ya The A to Z of Belarus e re: “Ho dumelwa hore nakong ya [Ivan Kupala] lefatshe le lokolla matla a phahametseng a tlhaho mme motho a ka a fumana haeba a le sebete a bile a le lehlohonolo.” Letsatsi lena la phomolo le simoloha bodumeding ba bohata mme le ne le ketekwa nakong ya hlabula ha letsatsi le le letelele ka ho fetisisa. Encyclopedia of Contemporary Russian Culture e re: “Ka mora hore batho bao e seng Bakreste ba amohele tumelo ya Bokreste, mokete ona wa Ivan Kupala o ile wa kopanngwa le letsatsi la phomolo la Kereke [e leng “saint’s day” (letsatsi la bahalaledi) la Johanne Mokolobetsi].”

  • Lunar New Year (Selemo se Setjha sa Matjhaena kapa Selemo se Setjha sa Makorea). “Nakong ena ya selemo, malapa le metswalle e amehile ka ho sebetsa ka thata e le hore e fumane mahlohonolo selemong seo. Hape ba isa tlhompho ho medimo ya bona mme ba lakaletsana katleho bakeng sa selemo se setjha.” (Mooncakes and Hungry Ghosts​—Festivals of China) Selemo se setjha sa Makorea le sona se jwalo, ka ha moketeng oo “ho rapelwa badimo, ba phetha ditshebeletso tsa meetlo e le ho leleka meya e ditshila hape ho lakaletsanwa katleho bakeng sa selemo se setjha. Batho ba boetse ba lepa bokamoso e le hore ba bone hore na selemo se setjha se tla ba tlisetsang.”​—Encyclopedia of New Year’s Holidays Worldwide.

    

  Matsatsi a phomolo a thehilweng thutong ya hore moya wa motho ha o shwe. Bibele e bua ka ho hlaka hore moya wa motho o a shwa. (Ezekiele 18:4) Ka hoo, Dipaki Tsa Jehova ha di keteke matsatsi a phomolo a latelang a tshehetsang tumelo ya hore moya wa motho ha o shwe:

  • All Souls’ Day (Letsatsi la Bafu). Ho ya ka New Catholic Encyclopedia letsatsing lena “ho ikgopotswa bafu bohle ba shweleng ba tshepahala. Dilemong tsa bo500 ho ya ho 1500 batho ba bangata ba ne ba dumela hore meya ya batho ba pelekatoring e tla itlhahisa ho batho ba ileng ba ba tshwara hampe ha ba ntse ba phela mme e hlaha e le dithotsela, baloi, dinqaqana, jwalojwalo.”

  • Mokete wa Qingming (Ch’ing Ming) le Hungry Ghost Festival (Mokete wa Dithotsela Tse Lapileng). Ho tshwarwa mekete ena e mmedi e le hore ho hlomphuwe badimo. Ho latela buka ya Celebrating Life Customs Around the World​—From Baby Showers to Funerals, nakong ya mokete wa Ch’ing Ming “ho tjheswa dijo, dino le tjhelete e le ho etsa bo nnete ba hore batho ba shweleng ha ba lape, ha ba nyorwe ebile ha ba haellwe ke tjhelete.” Buka eo e boetse hape e re “nakong ya Hungry Ghost Month (Kgweding ya Dithotsela Tse Lapileng) haholoholo bosiung boo kgwedi e tolokileng, [batho ba ketekang ba dumela hore] ba ba haufi le batho ba shweleng ka hoo ho bohlokwa ho re ba itshireletse ka ho kokobetsa batho ba shweleng le ho isa tlhompho ho baholoholo ba shweleng.”

  • Chuseok. Buka ya The Korean Tradition of Religion, Society, and Ethics e re mokete ona o akarelletsa “hore ho fuwe meya ya batho ba shweleng dijo le veine.” Ha batho ba fana ka dinyehelo tseo “ba a bontsha hore ba a dumela hore moya wa motho o tswela pele o phela ka mora hore mmele o shwe.”

  Matsatsi a phomolo a amanang le boloi. Bibele e re motho le ha e le ofe “ya sebedisang bonohe, ya sebedisang boselamose kapa le ha e le mang ya batlang dipontsho tsa se tlang kapa moloi, kapa ya betsang ba bang ka mantswe a boloi kapa le ha e le mang ya batlang keletso ho ya buisanang le meya kapa setsebi se bolelang diketsahalo esale pele kapa le ha e le mang ya botsang bafu . . . ke ntho e manyala ho Jehova.” (Deuteronoma 18:​10-12) E le ho qoba mefuta yohle ya boloi e akarelletsang bolepi ba dinaledi (e leng mofuta o mong wa bonohe) Dipaki Tsa Jehova ha di keteke Halloween kapa matsatsi ana a phomolo a latelang:

  • Selemo se Setjha sa Sinhala le Tamil. “Meetlo e meng e etswang ka letsatsi lena . . . e akarelletsa ho etsa dintho tseo balepi ba dinaledi ba reng di lokela ho etswa ka nako e itseng e le hore motho a fumane mahlohonolo.”​—Encyclopedia of Sri Lanka.

  • Songkran. Lebitso la mokete ona wa Asia “le tswa lentsweng la Sesanskrit . . . le bolelang ho ‘tsamaya’ kapa ho ‘fetoha’ mme le ketekwa nakong eo letsatsi le fetelang sehlopheng sa dinaledi tsa zodiac karolong ya Aries.”​—Food, Feasts, and Faith​—An Encyclopedia of Food Culture in World Religions.

  Mekete eo Molao wa Moshe o neng o laela ho re e ketekwe e ileng ya fediswa ke sehlabelo sa Jesu. Bibele e re: “Kreste ke pheletso ya Molao.” (Baroma 10:4) Melaomotheo e tswang Molaong wa Moshe o neng o fuwe Baiseraele e ntse e tswela Bakreste molemo. Le ha ho le jwalo, ha ba keteke mekete e hlahang molaong oo haholoholo e neng e etswa hobane ho lebeletswe Mesia kaha Bakreste ba dumela hore o se a ile a eba teng. Bibele e re: “Dintho tseo ke seriti sa dintho tse tlang ho tla, empa ntho ya sebele ke ya Kreste.” (Bakolose 2:​17) Mekete eo e ile ya phetha morero wa yona nakong e fetileng. Ho ekelletsa moo, batho ba se ba kenyeleditse meetlo e kgahlanong le seo Bibele e se rutang meketeng eo. Ka hoo mekete e latelang ke e meng ya eo Dipaki Tsa Jehova di sa e ketekeng:

  • Hanukkah. Moketeng ona batho ba ikgopotsa ha ho ne ho nehelwa botjha tempele ya Bajuda e Jerusalema. Le ha ho le jwalo, Bibele e re Jesu e ile ya eba Moprista ya Phahameng wa “tente [kapa tempele] e kgolo le e phethahetseng haholo e sa etswang ka matsoho, ke hore, eo e seng ya popo ena.” (Baheberu 9:​11) Bakeng sa Bakreste, tempele eo e lehodimong e ile ya nkela tempele e Jerusalema sebaka.

  • Rosh Hashanah. Lena ke letsatsi la pele selemong sa Bajuda. Mehleng ya boholoholo ha ho ne ho ketekwa mekete ena, batho ba ne ba etsetsa Modimo mahlabelo a kgethehileng. (Numere 29:​1-6) Kaha Jesu Kreste ke Mesia o ile a “fedisa sehlabelo le nyehelo ya mpho.” Seo se ile sa etsa hore mekete eo e se ke ya hlola e eba ya bohlokwa ho Modimo.​—Daniele 9:​26,​27.

• Na letsatsi leo la phomolo le etsa hore madumedi a tswakane?

  Lengolo la Bibele: “Motho ya tshepahalang o na le kabelo efe le ya sa dumelang? Mme tempele ya Modimo e na le tumellano efe le ditshwantsho tse rapelwang?”​—2 Bakorinthe 6:​15-​17.

  Dipaki Tsa Jehova di leka ka hohle hore di be le kgotso le baahelani ba tsona hape di hlompha tokelo eo batho bohle ba nang le yona ya ho ikgethela hore na ba tla dumelang. Le ha ho le jwalo di qoba mekete e etsang hore madumedi a tswakane ka ditsela tsena tse latelang.

  Mekete e rorisang batho ba hlaheletseng bodumeding kapa e kgothaletsang batho ba ditumelo tse fapaneng hore ba rapele ha mmoho. Ha Modimo a ne a isa setjhaba sa hae naheng e nngwe eo baahi ba teng ba neng ba rapela medimo e meng, o ile a re: “O se ke wa hlaba selekane le bona kapa le medimo ya bona. . . . Haeba o sebeletsa medimo ya bona, seo e tla ba leraba ho wena.” (Exoda 23:​32, 33) Ka lebaka leo, Dipaki Tsa Jehova ha di kenelle matsatsing a phomolo a kang a latelang.

  • Loy Krathong Nakong ya mokete ona o etswang ke batho ba Thailand, “batho ba etsa dikotlolo ka makgasi, ba kenya dikerese kapa dibano ka hare ebe ba beha dikotlolo tseo ka metsing e le hore di ka ya le metsi. Batho ba dumela hore ha dikotlolo tseo di ya le metsi, di tsamaisa bomadimabe bo neng bo ka ba hlahela. Ha e le hantle moketeng ona ho ikgopotswa monomoro wa bohato ba leoto bo siilweng ke Buddha.”​—Encyclopedia of Buddhism.

  • National Repentance Day. Koranteng ya Papua New Guinea e bitswang The National, ofisiri ya mmuso e ile ya re batho ba kenellang moketeng ona “ba dumela Bokresteng.” O boetse o re ha batho ba keteka letsatsi lena la phomolo “ba nka ho phela ka tsela ya Bokreste e le ntho ya bohlokwa.”

  • Vesak. “Lena ke letsatsi leo batho ba bodumedi ba Buddha ba nkang le halalela ka ho fetisisa mme ho ketekwa tswalo ya Buddha, ho ba le tsebo ha hae le lefu la hae kapa ho kena Nirvana.”​—Holidays, Festivals, and Celebrations of the World Dictionary.

    

  Mekete yo ho yona ho etswang meetlo ya bodumedi e sa rutweng ka Bibeleng. Jesu o ile a re ho baetapele ba bodumedi: “Le entse lentswe la Modimo lefeela ka lebaka la nyano ya lona.” O ile a boela a re borapedi ba bona ke lefeela hobane ba ruta “ditaelo tsa batho e le dithuto.” (Matheu 15:​6, 9) Kaha Dipaki Tsa Jehova di nka temoso eo e le ya bohlokwa, ho na le mekete e mengata ya bodumedi eo di sa e ketekeng.

  • Epiphany (Three Kings’ Day, Timkat. Nakong ya mokete ona, batho ba ikgopotsa nakong eo balepi ba dinaledi ba neng ba etetse Jesu kapa ba ikgopotsa kolobetso ya Jesu. Mokete ona “oo e seng wa Bokreste o neng o ketekwa nakong ya selemo, oo ho wona ho neng ho tlotlwa Modimo wa metsi a phallang le dinoka o se o fetotswe mokete wa Bokreste.” (The Christmas Encyclopedia) Mokete o tshwanang le oo e leng Timkat “o thehilwe meetlong.”​—Encyclopedia of Society and Culture in the Ancient World.

  • Mokete wa Nyolohelo wa Morwetsana Maria. Batho ba dumelang hore mme wa Jesu o nyolohetse lehodimong ka mmele wa hae ba keteka letsatsi lena. Buka ya Religion and Society​—Encyclopedia of Fundamentalism e re: “Bakreste ba pele ba ne ba sa dumele seo mme ha ho moo taba eo e hlahang ka Mangolong.”

  • Feast of the Immaculate Conception (Mokete o Thehilweng Tumelong ya Hore Maria o Tswetswe a se na Sebe). “Taba ya hore Maria o tswetswe a se na sebe ha se thuto e hlahang ka Bibeleng . . . ke thuto yo kereke e iqaletseng yona.”​—New Catholic Encyclopedia.

  • Lent. Ho ya ka New Catholic Encyclopedia nako ya ho ikwahlaya le ho itima dijo e ile ya qala “dilemong tsa bo300” e leng dilemo tse ka hodimo ho 200 ka mora hore Bibele e qete ho ngolwa. Encyclopedia ena e boetse e re ka letsatsi la pele la mokete wa Lent, moruti o ne a etsa sefapano ka molora diphatleng tsa batho ba tlileng kerekeng e le ho ba hopotsa hore ba lokela ho fetola mekgwa. Sena se ne se etsahala ka Ash Wednesday (Laboraro la Melora). Kereke e Khatholike e ile ya qala mokgwa oo ho tloha ka selemo sa 1091.”

  • Meskel Encyclopedia of Society and Culture in the Medieval World e re moketeng ona wa Ethiopia, batho ba keteka “hore ba fumane sefapano (seo Jesu a ileng a thakgisetswa ho sona) mme ba besa mollo ebe ba tantsha ba ntse ba o potapota.” Dipaki Tsa Jehova ha di sebedise sefapano bodumeding ba tsona.

• Na letsatsi leo la phomolo le etsa hore batho ba rorise motho, mokgatlo kapa letshwao la naha?

  Lengolo la Bibele: “Sena ke seo Jehova a se boletseng: ‘Ho rohakwe monna ya shahlileng ya tshepang motho wa lefatshe mme a etsa nama letsoho la hae [mme a tshepa matla a batho], le eo pelo ya hae e furallang Jehova.’ ”​—Jeremia 17:5.

  Dipaki Tsa Jehova di a bontsha hore di ananela seo batho ba bang ba se etsang ebile di a ba rapella. Le ha ho le jwalo, ha di kenelle meketeng e kang ena e latelang:

  Matsatsi a phomolo a tlotlang mmusi kapa motho ya hlaheletseng. Bibele e re: “Molemong wa lona, tlohelang motho wa lefatshe, eo phefumoloho ya hae e leng dinkong tsa hae, etswe a ka elwa hloko motheong wa eng?” (Esaia 2:​22) Ka lebaka leo, Dipaki Tsa Jehova ha di keteke mekete e akarelletsang letsatsi la tswalo la morena kapa la mofumahadi.

  Mekete e tlotlang folakga ya naha. Dipaki Tsa Jehova ha di keteke Flag Day (Letsatsi la Folakga). Lebaka ke hore Bibele e re: “Le itebele ditshwantshong tse rapelwang.” (1 Johanne 5:​21) Batho ba bang ha ba nke folakga e le setshwantsho se rapelwang. Empa rahistori Carlton J. H. Hayes o ile a re: “Folakga ke letshwao le ka sehloohong la tumelo ho naha leo batho ba le rapelang.”

  Matsatsi a phomolo le mekete e rorisang bahalaledi. Moapostola Petrose o ile a etsang ha motho e mong ya hlomphang Modimo a mo inamela? Bibele e re: “Petrose a mo phahamisa, a re: ‘Ema; le nna ke motho.’ ” (Liketso 10:​25, 26) Petrose le baapostola ba bang ha ba a ka ba dumella batho hore ba ba fe tlhompho e feteletseng kapa ba ba rapele. Ka hoo, Dipaki Tsa Jehova ha di kenelle meketeng e tlotlang batho ba nkwang e le bahalaledi e kang e latelang:

  • All Saints’ Day (Letsatsi la Bahalaledi Bohle). “Mokete ona o tlotla bahalaledi bohle . . . Ha ho tsebahale hore na mokete ona o qadile kae.”​—New Catholic Encyclopedia.

  • Fiesta of Our Lady of Guadalupe (Mokete wa Guadalupe wa Morwetsana Maria). Letsatsi lena le tlotla “mohalaledi wa mosadi wa Mexico,” eo ho dumelwang hore ke Maria mme wa Jesu. Ho thwe o ile a hlaha ka mohlolo ho motho e mong ka selemo sa 1531.​—The Greenwood Encyclopedia of Latino Literature.

    

  • Name Day (Letsatsi la Lebitso). Buka ya Celebrating Life Customs Around the World​—From Baby Showers to Funerals e re: “Ka letsatsi la lebitso ho etswa mokete bakeng sa mohalaledi eo ngwana a reheletsweng ka yena ha a kolobetswa kapa ha a amohela tumelo ya kereke.” E boetse e re “ka letsatsi leo batho ba etsa dintho tse ngata tsa kereke.”

  Mekete ya dipolotiki kapa mehwanto. Bibele e re: “Ho tshabela ho Jehova ho molemo ho feta ho tshepa motho wa lefatshe.” (Pesaleme ya 118:​8, 9) Dipaki Tsa Jehova di dumela hore Modimo ke yena feela ya ka lokisang mathata a batho, ka hoo ha di etse eng kapa eng e ka bontshang hore di tshepa batho ho e na le Modimo. Ka lebaka leo, ha di kenelle meketeng ya dipolotiki kapa mehwanto e kang Letsatsi la Batjha kapa Letsatsi la Basadi. Hape ha di kenelle moketeng wa Emancipation Day (Letsatsi la Tokoloho) kapa mekete e tshwanang le eo. Ho e na le hoo, ba na le tshepo ya hore Mmuso wa Modimo ke ona o tla rarolla mathata a kgethollo ya morabe le ho se lekane setjhabeng.​—Baroma 2:​11; 8:21.

• Na letsatsi lee la phomolo le etsa hore batho ba nke naha kapa morabe o itseng o phahametse e meng?

  Lengolo la Bibele: “Modimo ha a leeme, empa setjhabeng se seng le se seng motho ya mo tshabang le ya sebetsang ho loka o a amoheleha ho yena.”​—Liketso 10:​34, 35.

  Le hoja Dipaki Tsa Jehova di rata dibaka tseo di dulang ho tsona, ha di kenelle meketeng ya botjhaba e kang ena e hlalositsweng ka tlaase.

  Mekete e tlotlang sesole. Ha ho mohla Jesu a kileng a buella ntwa empa o ile a re ho balatedi ba hae: “Tswelang pele ho rata dira tsa lona le ho rapella ba le hlorisang.” (Matheu 5:​44) Ka hoo, Dipaki Tsa Jehova ha di kenelle meketeng e tlotlang masole ho akarelletsa matsatsi a phomolo a latelang:

  • Anzac Day. “Anzac e emela Australian and New Zealand Army Corps,” mme “butlebutle Anzac Day e ile ya fetoha letsatsi leo ka lona ho ikgopotswang masole a ileng a shwella ntweng.”​—Historical Dictionary of Australia.

  • Veterans Day (Remembrance Day, Remembrance Sunday, kapa Memorial Day). Matsatsi ana a phomolo a tlotla “masole a ileng a shwella ntweng.”​—Encyclopædia Britannica.

  Mekete ya histori ya naha kapa ya boipuso. Jesu o ile a re ka balatedi ba hae: “Ha se karolo ya lefatshe, feela jwalo ka ha ke se karolo ya lefatshe.” (Johanne 17:​16) Le hoja Dipaki Tsa Jehova di thabela ho ithuta histori ya naha, ha di kenelle meketeng e kang ena e latelang:

  • Australia Day. Ho ya ka Worldmark Encyclopedia of Cultures and Daily Life, letsatsing lena ho ikgopotswa “letsatsi leo ka lona masole a Manyesemane a ileng a phahamisa folakga ya naha ya ona yaba a phatlalatsa hore Australia ke kolone ya Engelane ka selemo sa 1788.”

  • Guy Fawkes Day. Lena ke “letsatsi leo naha e ketekang le ho ikgopotsa ka moo Guy Fawkes le batshehetsi ba Khatholike ba ileng ba hloleha ka teng ho bolaya Morena James wa Pele wa Engelane le ditho tsa palamente ya Engelane ka selemo sa 1605.”​—A Dictionary of Engdish Folklore.

  • Independence Day (Letsatsi la Boipuso). Dinaheng tse ngata, “lena ke letsatsi leo setjhaba se ketekang letsatsi leo ka lona naha e ileng ya ipusa ka lona.”​—Merriam-Webster’s Unabridged Dictionary.

• Na letsatsi lee la phomolo le kenyelletsa boitshwaro bo sa hlwekang?

  Lengolo la Bibele: “Etswe nako e fetileng e lekane hore ebe le phethile thato ya ditjhaba ha le ne le tswela pele diketsong tsa boitshwaro bo hlephileng, ditakatsong tse feteletseng, ho fetelleng ka veine, meketeng e lerata, ditlhodisanong tsa ho nwa, le borapeding ba ditshwantsho bo sa dumellwang.”​—1 Petrose 4:3.

  Dipaki Tsa Jehova di mamela lengolo lena ka hore di qobe mekete e hlaha le mekete eo ho yona ho nowang haholo. Dipaki Tsa Jehova di thabela ho ba mmoho le metswalle ya tsona. Haeba di kgetha ho nwa jwala, ha di nwe haholo. Di leka ka hohle hore di mamele keletso ya Bibele e reng: “Ebang le a ja kapa le a nwa kapa le etsa ntho le ha e le efe e nngwe, le etse dintho tsohle bakeng sa thoriso ya Modimo.”​—1 Bakorinthe 10:31.

  Ka hoo, Dipaki Tsa Jehova ha di kenelle meketeng ya dicarnival kapa mekete e meng e tshwanang le yona eo ho yona ho etswang boitshwaro boo Bibele e bo nyatsang. Sena se akarelletsa mokete wa Bajuda o bitswang Purim. Buka ya Essential Judaism e re le hoja moketeng wa Purim ho ne ho ikgopotswa nako eo Bajuda ba ileng ba lopollwa ka yona ka selemo sa bohlano pele ho mehla ya Jesu, hona jwale o ka hlaloswa e le “mokete wa Mardi Gras kapa Carnival.” Batho ba bangata ba yang moketeng ona “ba apara diphahlo tse kgethehileng (hangata banna ba apara diphahlo tsa basadi), ba ba mabifi, ba nwa ho tlola hape ba etsa lerata.”

Na ha Dipaki Tsa Jehova di kgetha ho se keteke matsatsi a itseng a phomolo seo se bontsha hore ha di rate malapa a tsona?

Ha ho jwalo. Bibele e ruta batho hore ba rate ba be ba hlomphe ba malapa a bo bona ho sa tsotellehe hore na ba dumela eng. (1 Petrose 3:​1, 2, 7) Ha motho eo e leng Paki ya Jehova a kgetha ho se kenelle meketeng e itseng, ba lelapa ba ka utlwa bohloko, ba mo kwatela kapa ba utlwa eka o ba fetohetse. Dipaki Tsa Jehova tse ngata di leka hore di kgodise ba lelapa hore di a ba rata hape di a ba hlakisetsa hore na ke hobaneng ha di entse qeto ya ho se kenelle meketeng e itseng. Di boetse di leka hore di ka tjhakela ba lelapa ha ho kgoneha.

Na Dipaki Tsa Jehova di qobella batho ba bang hore ba se ke ba keteka matsatsi a phomolo a itseng?

Ha ho jwalo. Dipaki Tsa Jehova di dumela hore motho e mong le e mong o lokela ho iketsetsa qeto. (Joshua 24:​15) Dipaki Tsa Jehova di ‘hlompha batho ba mefuta yohle,’ ho sa tsotellehe hore na ba bodumeding bofe.​—1 Petrose 2:17.