Kgaketla ya Diabolical Ironclad Beetle

Kokwanyana e bitswang diabolical ironclad beetle (Phloeodes diabolicus) e fumaneha karolong e ka bophirimela Amerika Leboya. Bafuputsi ba re kokwanyana ena e ka jara morwalo o fetang boima ba mmele wa yona ka makgetlo a ka bang 39 000 mme e ka phela le ha e ka hatwa ke koloi. Kokwanyana ee e kgona jwang ho phela tlasa maemo a boima jwalo?

Karolo e ka hodimo le e ka tlase ya kgaketla ya kokwanyana ena e kopana mahlakoreng. Karolo e ka hodimodimo ya kgaketla ena e sireletsa kokwanyana hore e se ke ya utlwa bohloko ha ho ena le ntho e e hatellang le ho sireletsa ditho tsa yona tsa bohlokwa tse ka harehare. Karolo e mahareng yona ha e thata jwalo ka e ka hodimodimo mme sena se etsa hore ho be bobebe hore e hatellehe. Karolo ya ho qetela ya kgaketla ena e bonolo, e leng se etsang hore kokwanyana ena e kgone ho ipetetsa kutung ya sefate kapa pakeng tsa majwe.

Karolo e mahareng ya kgaketla ya kokwanyana ena, ena le dintho tse kang meno a sakga a kopanang jwalo ka puzzle mme sena se etsa hore ntho le ha e le efe e hatellang kokwanyana ena e se ke ya e lematsa. Dikarolo tseo tse shebahalang jwalo ka meno a sakga di kopantswe ka thata ke diprotheine. Ha ho eba le ntho e hatellang kokwanyana ena, diprotheine tseo di a petsoha empa ha morao di a kopana mme sena se etsa hore meno ao a se ke a arohana.

Bafuputsi ba re ha baqapi ba etsang dikoloi, marokgo le mehaho ba ka etsisa tsela eo kgaketla ya kokwanyana ena e entsweng ka yona, ba ka kgona ho etsa dintho tse tla tshwarella le haeba di ka hatellwa kapa tsa ba le morwalo o boima.

O nahana jwang? Na kgaketla ya diabolical ironclad beetle e itlhahetse feela? Kapa na e entswe?