Diproverbia 17:17​—“Motswalle o na le Lerato Kamehla”

Tlhaloso ya Diproverbia 17:17

Metswalle ya nnete ya tshepahala. Jwalo ka bana ba motho, e a tshepahallana ebile e a tsotellana, haholoholo dinakong tse thata.

“Motswalle wa nnete o lerato ka dinako tsohle.” Polelo ena e ka boela ya bolela hore “motswalle wa motho o mo rata kamehla.” Lentswe la Seheberu le sebedisitsweng bakeng sa “lerato” polelong ena ha le bolele feela tsela eo motho a ikutlwang ka yona. Ke lerato le se nang boithati leo motho a ka le bontshang e mong ka diketso. (1 Bakorinthe 13:​4-7) Metswalle e ratanang ka tsela ena e a momahana le haeba setswalle sa bona se lekwa, mohlomong ka lebaka la ho se utlwisisane kapa ho thulana le mathata a itseng bophelong. E boetse e tshwarelana ka bolokolohi. (Diproverbia 10:​12) Motswalle ha a be mona ha motswalle wa hae a atleha. Ho ena le hoo, o thaba le motswalle wa hae.​—Baroma 12:15.

“Motswalle wa nnete  . . ke ngwaneno eo o ka mo tshepang dinakong tsa mahlomola.” Maele ana a bua ka taba ya bohlokwa ya hore bana ba motho ba ka utlwana haholo. Ka hoo, haeba re etsa sohle ho thusa motswalle wa rona ha a ena le mathata, re tla be re etsa seo ngwanabo motho eo wa madi a neng a ka se etsa. Ho phaella moo, lerato leo metswalle e nang le lona ha le fokodiswe ke mathata. Ho ena le hoo, le a matlafala hobane ha ba ena le mathata lerato la bona le tsela eo ba hlomphanang ka yona e matlafala haholwanyane.

Tlaleho ya Diproverbia 17:17

Buka ya Diproverbia ena le dikeletso tse bohlale le ditlhahiso tse ngotsweng ka bokgutshwanyane le ka tsela e thahasellisang mme seo se etsa hore mmadi a nahane. Morena Solomone o ngotse karolo e kgolo ya buka ena ya Bibele. Mokgwa wa hae wa ho ngola o ne o tshwana le wa dithothokiso tsa Seheberu, hobane ho ena le ho sebedisa mantswe a bitsehang ka ho tshwana, o ne a sebedisa mantswe a nang le mohopolo o le mong le mantswe a nang le mehopolo e hanyetsanang. Diproverbia 17:​17 ke mohlala wa thothokiso e nang le mohopolo o le mong hobane polelo ya pele e hlaloswa ke polelo ya bobedi. Diproverbia 18:​24 ke mohlala wa mantswe a nang le mehopolo e hanyetsanang. “Ho na le metswalle e ratang ho utlwisana bohloko empa ho na le motswalle ya tshepahalang haholo ho feta ngwanabo motho.”

E ka nna yaba ha Solomone a ne ngola Diproverbia 17:​17, o ne a nahanne ka setswalle se haufi seo ntate wa hae Davida, a neng a ena le sona le Jonathane, mora wa Morena Saule. (1 Samuele 13:​16; 18:1; 19:​1-3; 20:​30-34, 41, 42; 23:​16-18) Le hoja Davida le Jonathane ba ne ba sa amane, ba ne ba ena le kamano e haufi ho feta ya bana ba motho. Jonathane o ne a bile a ikemiseditse ho shwa e le hore a ka sireletsa motswalle wa hae ya monyenyane.a

Shebella video ena e kgutshwanyane ho ithuta ho eketsehilleng ka buka ya Diproverbia.