Ditshupiso Tsa Bukana ya Seboka sa Bophelo le Tshebeletso ya Rona
LA 2-8 MAY
MATLOTLO A TSWANG BIBELENG | 1 SAMUELE 27-29
“Leqheka la Davida la Ntwa”
it-1-E 41
Akishe
Ha Saule a ne a batla ho bolaya Davida, Davida o ile a balehela naheng ya Morena Akishe ka makgetlo a mabedi. Lekgetlong la pele bahlanka ba Akishe ba ile ba mo qosa ka hore ke sera, ka hoo Davida o ile a iphetola lehlanya mme Akishe o ile a re ba mo tlohele. (1Sa 21:10-15; Pes 34:Sehloohwana; 56:Sehloohwana) Ha Davida a ya naheng ya Akishe ka lekgetlo la bobedi o ne a na le banna ba 600 ba ntwa le malapa a bona. Akishe o ile a re ba dule Ziklage mme ba ile ba dula moo selemo le dikgwedi tse nne. Nakong eo, Davida o ne a ntse a futuhela Bageshure, Bagireze le Baamaleke empa o ile a etsa hore Akishe a nahane hore o ntse a hlasela metse ya Juda. (1Sa 27:1-12) Akishe o ile a mo kgolwa hoo qetellong a ileng a etsa Davida mohlokomedi wa hae ha Bafilista ba ne ba ilo hlasela Morena Saule. “Dikgosana” tsa Bafilista di ne di sa batle hore Davida le bahlanka ba hae ba ye ntweng le bona. Ka hoo di ile tsa phehella Akishe hore a re ba kgutlele morao yaba ka motsotso wa ho qetela, Akishe o re ba kgutlele Ziklage. (1Sa 28:2; 29:1-11) Ha Davida e se e le morena o ile a lwantsha Bagathe empa Akishe ha a ka a bolawa. Le nakong eo Solomone e neng e le morena, o ne a ntse a phela.—1Ma 2:39-41; sheba GATH.
Barababo Rona ba Batjha, le ka Etsang Hore Batho ba Bang ba le Tshepe?
8 Nahana ka bothata bo bong boo Davida a ileng a ba le bona. Ka mora hore a tlotswe hore e be morena, o ile a lokela ho ema dilemo tse ngata pele e ka ba morena wa Juda. (1 Sam. 16:13; 2 Sam. 2:3, 4) Nakong eo yohle, ke eng e ileng ya mo thusa hore a lete ka mamello? Ho e na le hore a nyahamiswe ke seo, Davida o ile a sebedisa nako eo a nang le yona hore a etse seo a ka kgonang ho se etsa. Ka mohlala ha e ntse e le mophaphathehi naheng ya Bafilista, o ile a sebedisa nako eo a nang le yona ho lwantsha dira tsa Baiseraele. Ka ho etsa jwalo, o ne a sireletsa meedi ya motse wa Juda.—1 Sam. 27:1-12.
it-2-E 245 ¶6
Leshano
Bibele e kgahlanong le leshano haholo haeba le le kotsi. Empa sena ha se bolele hore motho o qobelletswe ho bua nnete ho motho ya se nang tokelo ya ho tseba taba e itseng. Jesu Kreste o ile a re: “Le se ke la fa dintja se halalelang, kapa la lahlela diperela tsa lona ka pela dikolobe, e le hore le ka mohla di se ke tsa di hatakela ka maoto yaba di a reteleha mme di a le rusolla.” (Mat 7:6) Ke ka hoo ka dinako tse ding Jesu a sa kang a fana ka dintlha tse feletseng kapa hona ho araba dipotso tse itseng haeba di ne di ka beha ba bang kotsing. (Mat 15:1-6; 21:23-27; Joh 7:3-10) Ba bang ba ileng ba etsa se tshwanang ke Abrahama, Isaka, Rahaba le Elisha hobane le bona ha ba a ka ba bolella batho bao e neng e se barapedi ba Jehova dintlha tse feletseng ka taba e itseng.—Ge 12:10-19; kgaolo ya 20; 26:1-10; Jos 2:1-6; Jak 2:25; 2Ma 6:11-23.
Matlotlo a Patilweng
w10 1/1 20 ¶5-6
Na Bafu ba ka Thusa ba Phelang?
A ko nahane ka taba ena hantle. Bibele e bolela hore motho ha a shwa “o kgutlela leroleng la hae” le hore “menahano ya hae e a timela.” (Pesaleme ya 146:4) Saule le Samuele ba ne ba tseba hantle hore Modimo o nyatsa batho ba ikopanyang le batho ba buisanang le bafu. Etswe pejana Saule o ne a ile a etella pele ha ho ne ho tloswa dintho tse sebedisan ang le meya naheng eo!—Levitike 19:31.
A ko ipotse: Haeba Samuele e ne e le moya o neng o ntse o phela, na o ne a tla tlola molao wa Modimo ebe o sebedisana le motho ya buisanang le bafu e le hore a kopane le Saule? Jehova o ne a hanne ho bua le Saule. Na ho ne ho ka etsahala hore motho ya buisanang le bafu a qobelle Modimo ya Matla Ohle hore a bue le Saule a sebedisa Samuele ya shweleng? Tjhe. Ka ho hlakileng, motho eo ya neng a shebahala eka ke Samuele, e ne e se moprofeta wa Modimo ya tshepahalang. E ne e le sebopuwa sa moya, e leng modemona ya kgopo ya ileng a iketsa eka ke Samuele.
LA 9-15 MAY
MATLOTLO A TSWANG BIBELENG | 1 SAMUELE 30-31
“Dumella Jehova Hore a o Matlafatse”
w06 8/1 28 ¶12
Tshaba Jehova mme o Thabe!
12 Ho tshaba Jehova ha ho a ka ha etsa feela hore Davida a se ke a etsa diphoso. Ho ile ha mo matlafatsa hore ha a le maemong a thata a nke kgato e matla le e bohlale. Ka nako e etsang selemo le dikgwedi tse nne, Davida le banna ba hae ba ile ba ipatela Saule Ziklage naheng ya Bafilista. (1 Samuele 27:5-7) Ka lekgetlo le leng ha banna ba Davida ba le siyo, Baamaleke ba futuhileng ba ile ba tjhesa motse yaba ba nkela banna bao basadi, bana le mehlape kaofela. Ha Davida le banna ba hae ba kgutla mme ba bona se etsahetseng, ba ile ba bokolla. Ka potlako feela maswabi a ile a fetoha kgalefo, mme banna ba Davida ba bolela hore ba tla mo tlepetsa ka majwe. Le hoja Davida a ile a tshwenyeha, ha a ka a nyahama. (Liproverbia 24:10) Ho tshaba Modimo ho ile ha mo susumelletsa hore a rapele Jehova, mme o ile “a imatlafatsa ka Jehova.” Ka thuso ya Modimo, Davida le banna ba hae ba ile ba tshwara Baamaleke yaba ba kgutlisa ntho e nngwe le e nngwe.—1 Samuele 30:1-20.
w12 4/15 30 ¶14
Jehova o re Sireletsa Bakeng sa Poloko
14 Davida o ile a thulana le maemo a mangata a sithabetsang bophelong ba hae. (1 Sam. 30:3-6) Mantswe a hae a buduletsweng a bontsha hore Jehova o ne a tseba ka moo a ikutlwang ka teng. (Bala Pesaleme ya 34:18; 56:8.) Le rona Modimo wa tseba hore na re ikutlwa jwang. Ha re ‘robehile dipelo’ kapa re ‘sithabetse moyeng,’ o ba haufi le rona. Sena se ka nna sa re kgothatsa jwalo ka ha se ile sa kgothatsa Davida ya ileng a bina a re: “Ke tla thaba mme ke nyakalle ka lebaka la mosa wa hao o lerato, ka hore ebe o bone mahloreho a ka; o tsebile ka mahlomola a moya wa ka.” (Pes. 31:7) Empa Jehova ha a hlokomele mahlomola a rona feela. O re matlafatsa ka hore a re tshedise a be a re kgothatse. Tsela e nngwe eo a etsang sena ka yona ke ka diboka tsa Bokreste.
Matlotlo a Patilweng
w05 3/15 24 ¶8
Dintlhakgolo Tsa Buka ya Samuele wa Pele
30:23, 24. Qeto ena, e thehilweng ho Numere 31:27, e bontsha hore Jehova o ananela ba etsang mesebetsi e tshehetsang ba bang ka phuthehong. Ka hoo, eng kapa eng eo re e etsang, a re e ‘sebetseng ka moya wohle jwalo ka ha eka re sebeletsa Jehova, eseng batho.’—Bakolose 3:23.
LA 16-22 MAY
MATLOTLO A TSWANG BIBELENG | 2 SAMUELE 1-3
“Re Ithutang ho Kodiyamalla e Bitswang ‘Seqha’?”
w00 6/15 13 ¶9
Hlompha ba Filweng Matla a ho o Laela
9 Na Davida o ile a ba mahlomoleng ha a ne a tujwa? Davida o ile a hweletsa ho Jehova: “Batho ba sehloho ba batla bophelo ba ka.” (Pesaleme ya 54:3) O ile a tshollela pelo ya hae ho Jehova: “Ntwele ho bao e leng dira ho nna, Modimo wa ka! . . . Banna ba bohale ba nkopanetse, ke se na molato, le ha e le sebe. Le ha ke se na molato, ba matha ba ntlhomeletse. Fadimeha, o tle ho nna, o tadime!” (Pesaleme ya 59:1-4) Na o kile wa ikutlwa ka tsela e jwalo—hore ha ho phoso eo o e etseditseng motho ya nang le matla a ho laela, le ha ho le jwalo o o setsesetse morao? Davida ha a ka a hloleha ho bontsha tlhompho ho Saule. Ha Saule a shwa, ho e na le hore Davida a nyakalle, o ile a qapa kodiyamalla: “Saule le Jonathane ba ne ba rateha, ba kgahleha ho pheleng ha bona . . . ba ne ba le lebelo ho feta dintsu, ba le matla ho feta ditau. Oho, barwetsana ba Iseraele, llelang Saule.” (2 Samuele 1:23, 24) Ke mohlala o motle hakaakang wa ho bontsha tlhompho ya sebele ho motlotsuwa wa Jehova, le hoja Saule a ne a foseditse Davida!
w12 4/15 10 ¶8
Ho Eka ke Pontsho e Tshosang ya Mehla ya Bofelo!
8 Bibele e boetse e bua ka batho ba bangata ba tshepahalang. A re ke re bueng ka ba babedi ba bona mme re bone seo re ka ithutang sona ho bona, re qale ka monna ya ileng a tshepahala ho Davida. Mohlomong Jonathane, e leng mora e moholo wa Morena Saule, e ka be e bile mohlahlami boreneng ba Iseraele. Le ha ho le jwalo, Jehova o ile a kgetha Davida hore e be yena morena wa Iseraele ya latelang. Jonathane o ile a hlompha qeto ya Modimo. Ha a ka a ba lefufa yaba o nka hore Davida ke sera. Ho e na le hoo, “moya wa Jonathane [o ile] wa tlamahana le moya wa Davida” ha Jonathane a ne a etsa kano ya hore o tla tshepahala ho Davida. O ile a ba a fa Davida diaparo tsa hae, sabole, seqha le lebanta, e le ha a mo apesa tlotla ya borena. (1 Sam. 18:1-4) Jonathane o ile a etsa sohle seo a neng a ka se kgona ho ‘matlafatsa letsoho la Davida,’ hoo a bileng a beha bophelo ba hae kotsing hore a emele Davida ka pela Saule. Ka botshepehi Jonathane o ile a re ho Davida: “O tla ba morena wa Iseraele, mme ke tla ba wa bobedi ho wena.” (1 Sam. 20:30-34; 23:16, 17) Ha ho makatse hore ebe ka mora lefu la Jonathane, Davida o ile a bolela ka moo a neng a mo rata ka teng le ka moo a neng a utlwile bohloko ka teng ka hore a mo binele kodiyamalla.—2 Sam. 1:17, 26.
Matlotlo a Patilweng
it-1-E 369 ¶2
Moreso
Lentswe “Moreso” le boetse le sebetsa ho batho ba sebetsang mmoho ho finyella morero o itseng. Ka mohlala, Morena Hirame wa Tyre o ile a re Morena Solomone ke morabo. Lebaka e ne e se feela hobane le yena e ne e le morena empa ho ka etsahala hore e ne e le hobane ka bobedi ba bona, ba ne ba fana ka patsi le dintho tse ding bakeng sa tempele. (1Ma 9:13; 5:1-12) Davida o ile a re: “Bonang! Ka moo ho leng hotle le ka moo ho kgahlisang ka teng ha bara ba motho ba dula hammoho bonngweng.” Mantswe ana a bontsha hore taba ya hore batho ke bana ba motho, ha se yona feela e etsang hore ho be le kgotso le kutlwano pakeng tsa bona. (Pes 133:1) Ha e le hantle Davida o ile a bitsa Jonathane morabo, eseng hobane e ne e le bana ba motho empa hobane ba ne ba ratana ebile ba rata le dintho tse tshwanang. (2Sa 1:26) Metswalle e etsang dintho ka tsela e tshwanang le e nahanang ka tsela e tshwanang, le hoja dintho tseo e ka ba tse mpe, ba bitswa bana ba motho.—Lipr 18:9.
LA 23-29 MAY
MATLOTLO A TSWANG BIBELENG | 2 SAMUELE 4-6
“Dula o Ikemiseditse ho Hlompha Jehova”
w05 5/15 17 ¶7
Dintlhakgolo Tsa Buka ya Samuele wa Bobedi
6:1-7. Le hoja Davida a ne a ena le sepheo se setle, boiteko ba hae ba ho tsamaisa Areka ka koloi e ne e le ho tlola taelo ya Modimo mme bo ile ba hloleha. (Exoda 25:13, 14; Numere 4:15, 19; 7:7-9) Hore ebe Uza o ile a tshwara Areka ho bontsha hore ho ba le sepheo se setle ha ho fetole seo Modimo a batlang hore se etswe.
w05 2/1 27 ¶20
Ka Mehla Jehova o Etsa se Nepahetseng
20 Hopola hore e tlameha ebe Uza o ne a tseba Molao hantle. Areka e ne e emela boteng ba Jehova. Molao o ne o boletse ka ho hlaka hore e se ke ya angwa ke batho ba sa dumellwang, o lemosa ka ho totobetseng hore ba tlolang taelo eo ba ne ba tla bolawa. (Numere 4:18-20; 7:89) Ka hona, ho tsamaiswa ha lebokose leo le halalelang e ne e se mosebetsi o lokelang ho nkwa ha bobebe. Ka moo ho bonahalang ka teng, Uza e ne e le Molevi (le hoja e ne e se moprista), ka hoo e tlameha ebe o ne a tseba Molao. Hape, dilemo pejana ho moo Areka e ne e isitswe habo hore e bolokwe teng. (1 Samuele 6:20–7:1) E ne e dutse moo ka dilemo tse ka bang 70, ho fihlela Davida a kgetha ho e fallisa. Ka hoo ho ka etsahala hore ebe Uza o ne a tseba melao e amanang le Areka ho tloha bongwaneng.
w05 2/1 27 ¶21
Ka Mehla Jehova o Etsa se Nepahetseng
21 Jwalo ka ha ho boletswe pejana, Jehova a ka lemoha se ka dipelong. Ka ha Lentswe la hae le re seo Uza a se entseng e ne e le ‘ketso e hlokang tlhompho,’ mohlomong Jehova o ile a bona sepheo se itseng sa boithati se sa senolweng ka ho hlaka tlalehong eo. Na mohlomong Uza e ne e le motho ya iketelletsang pele, ya tlwaetseng ho tlola meedi e loketseng? (Liproverbia 11:2) Na ho hlahella pontsheng a tsamaisa Areka eo lelapa labo le neng le e hlokometse ho ile ha etsa hore a ikutlwe e le motho wa bohlokwa? (Liproverbia 8:13) Na Uza o ne a se na tumelo hoo a neng a nahana hore letsoho la Jehova le lekgutshwanyane haholo hore le tsitsise lebokose leo le halalelang le neng le tshwantshetsa boteng ba Hae? Ho sa tsotellehe hore na lebaka e ne e le lefe, re ka kgodiseha hore Jehova o ile a etsa se nepahetseng. Mohlomong o ile a bona ntho e itseng pelong ya Uza e ileng ya etsa hore a dihe kahlolo ka potlako.—Liproverbia 21:2.
Matlotlo a Patilweng
w96 4/1 29 ¶1
Ka Mehla Lahlela Merwalo ya Hao ho Jehova
Davida e le morena o ile a tlameha ho jara boikarabelo bo itseng bakeng sa sena. Boitshwaro ba hae bo bontsha hore ka dinako tse ding esita le bao ba nang le kamano e ntle le Jehova ba ka nna ba sitwa ho itshwara maemong a lekang. Qalong Davida o ile a halefa. Hamorao o ile a tshoha. (2 Samuele 6:8, 9) Kamano ya hae ya ho tshepa Jehova e ile ya behwa tekong ha boima. Lena e ne e le lekgetlo leo ho bonahalang a ile a hloleha ho lahlela morwalo wa hae ho Jehova, ka ho se latele ditaelo tsa hae. Na mohlomong boo e ka ba boemo ka rona ka dinako tse ding? Na le ka mohla re ke re behe Jehova molato ka mathata a hlahiswang ke ho hlokomoloha ditaelo tsa hae?—Liproverbia 19:3.
LA 30 MAY–LA 5 JUNE
MATLOTLO A TSWANG BIBELENG | 2 SAMUELE 7-8
“Jehova o Etsa Selekane le Davida”
w10 4/1 20 ¶3
‘Ka Sebele Mmuso wa Hao e Tla ba o Tiileng’
Jehova o angwa ke takatso ya Davida e tlohang botebong ba pelo. Tumellanong le boinehelo ba Davida le boprofeta, Modimo o etsa selekane le Davida sa hore O tla hlahisa e mong lelokong la hae la borena ya tla busa ka ho sa feleng. Nathane o bolella Davida tshepiso ya Modimo e tiileng: “Ka sebele ntlo ya hao le mmuso wa hao e tla ba tse tiileng ka pela hao ho isa nakong e sa lekanyetswang; terone ya hao e tla tiiswa ka thata ho isa nakong e sa lekanyetswang.” (Temana ya 16) Mojalefa wa selekane see, Ya tla busa ka ho sa feleng, ke mang?—Pesaleme ya 89:20, 29, 34-36.
w10 4/1 20 ¶4
‘Ka Sebele Mmuso wa Hao e Tla ba o Tiileng’
Jesu wa Nazaretha e ne e le setloholo sa Davida. Ha lengeloi le phatlalatsa tswalo ya Jesu, le ile la re: “Jehova Modimo o tla mo fa terone ya ntatae Davida, mme o tla busa e le morena wa ntlo ya Jakobo ka ho sa feleng, mme mmuso wa hae o ke ke wa e ba le bofelo.” (Luka 1:32, 33) Ka lebaka leo, selekane se entsweng le Davida se ile sa phethahala ho Jesu Kreste. Ka hoo ho busa ha hae ha ho a itshetleha ka kgetho ya motho, empa ho itshetlehile ka tshepiso ya Modimo e tiileng, e mo nehang tokelo ya ho busa ka ho sa feleng. A re hopoleng hore ka mehla ditshepiso tsa Modimo di a phethahala.—Esaia 55:10, 11.
w14 10/15 10 ¶14
Eba le Tumelo e sa Thekeseleng Mmusong
14 Nahana ka seo Jehova a ileng a se tshepisa Morena Davida wa Iseraele ya boholoholo ha a etsa selekane sa Davida. (Bala 2 Samuele 7:12, 16.) Jehova o ile a etsa selekane sena le Davida ha e ntse e le morena Jerusalema, mme a mo tshepisa hore Mesia o tla hlaha lesikeng la hae. (Luka 1:30-33) Jehova o ile a boela a totobatsa leloko leo peo e neng e tla hlaha ho lona le hore mojalefa wa Davida o ne a tla ba le “tokelo ya molao” ya ho busa Mmusong wa Bomesia. (Ezek. 21:25-27) Jesu o ne a tla tiisa borena ba Davida ka thata “ho isa nakong e sa lekanyetswang.” Ha e le hantle, peo ya Davida “e tla ba teng ho isa nakong e sa lekanyetswang, le terone ya hae jwalo ka letsatsi.” (Pes. 89:34-37) Puso ya Bomesia e ke ke ya e ba le bobodu, mme ditlhohonolofatso tsa yona e tla ba tsa ka ho sa feleng!
Matlotlo a Patilweng
it-2-E 206 ¶2
Matsatsi a ho Qetela
Boprofeta ba Balame. Pele Baiseraele ba kena Naheng e Tshepisitsweng moprofeta Balame o ile a bua le Morena wa Bamoabe e leng Balake a re: “Tloo, e re ke o eletse ka seo setjhaba sena [Baiseraele] se tla se etsa ho batho ba heno hamorao qetellong ya matsatsi. . . . Ka sebele naledi e tla tswa ho Jakobo, mme ruri lere la borena le tla hlaha ho Iseraele. Ka sebele o tla pshatla ditlhafunelo tsa hlooho ya Moabe le mahata a bara bohle ba morusu wa ntwa.” (Nu 24:14-17) Naledi eo ho buuwang ka yona karolong ya pele ya boprofeta bona, ke Davida, ya ileng a hlola Bamoabe. (2Sa 8:2) Ho latela boprofeta bona, ‘qetello ya matsatsi’ e qadile ha Davida e e ba morena. Ka ha Davida o ne a tshwantshetsa Jesu jwalo ka Morena wa Bomesia, boprofeta bona bo ne bo tla phethahala ho Jesu nakong eo a hlolang dira tsa hae.—Esa 9:7;Pes 2:8, 9.
LA 6-12 JUNE
MATLOTLO A TSWANG BIBELENG | 2 SAMUELE 9-10
“Davida o Ile a Bontsha Mosa”
w06 6/15 14 ¶6
Ka Sebele, o ka Fumana Thabo
Davida o ile a ngola a re: “Ho thaba mang kapa mang ya nahanelang motho ya tlaase.” O ile a tswela pele: “Jehova o tla mo pholosa letsatsing la tlokotsi. Jehova o tla mo lebela mme a mo boloke a phela. Ho tla phatlalatswa hore o thabile.” (Pesaleme ya 41:1, 2) Ho nahanela ka lerato hoo Davida a ileng a ho bontsha Mefiboshethe, e leng mora ya holofetseng wa motswalle ya ratehang wa Davida, Jonathane, ke mohlala o motle wa boikutlo bo nepahetseng bo lokelang ho bontshwa motho ya tlaase.—2 Samuele 9:1-13.
w05 5/15 17 ¶12
Dintlhakgolo Tsa Buka ya Samuele wa Bobedi
9:1, 6, 7. Davida o ile a phethahatsa tshepiso ya hae. Le rona re lokela ho phethahatsa ditshepiso tsa rona.
w02 2/15 14 ¶10
Ba Ile ba Lwana le Meutlwa Nameng ya Bona
10 Dilemo tse itseng hamorao, ka lebaka la ho rata Jonathane haholo, Morena Davida o ile a bontsha Mefiboshethe mosa o lerato. Davida o ile a mo fa thepa yohle ya Saule mme a abela Tsiba molebedi wa Saule hore a hlokomele tshimo ena. Hape Davida o ile a re ho Mefiboshethe: ‘O tla ja bohobe tafoleng ya ka ka mehla.’ (2 Samuele 9:6-10) Ha ho pelaelo hore mosa wa Davida o lerato o ile wa tshedisa Mefiboshethe mme wa fokotsa bohloko bo neng bo bakwa ke kgolofalo ya hae. Ke thuto e ntle hakaakang! Le rona re lokela ho bontsha mosa ho ba tobaneng le moutlwa nameng.
Matlotlo a Patilweng
it-1-E 266
Ditedu
Mehleng ya boholoholo batho ba neng ba phela ka Botjhabela, ho akarelletsa le Baiseraele, ba ne ba nka monna ya nang le ditedu a na le seriti. Molao wa Modimo ho Baiseraele o ne o ba hanela ho kuta moriri wa bona o mahlakoreng, e leng moriri o pakeng tsa tsebe le leihlo le ho senya mathoko a ditedu tsa bona. (Le 19:27; 21:5) Lebaka ke hobane batho ba bang ba ne ba kuta moriri wa bona e le karolo ya bodumedi ba bona ba bohata.
LA 13-19 JUNE
MATLOTLO A TSWANG BIBELENG | 2 SAMUELE 11-12
“Lwantsha Ditakatso Tse Fosahetseng”
O ka Qoba Maraba a Satane
10 Ka lebaka la ho ba meharo, Morena Davida o ile a lebala dintho tseo Jehova a mo fileng tsona tse kang maruo, botumo le ho hlola dira tsa hae tse ngata. Davida le yena o ile a ananela le ho dumela hore dintho tseo Modimo a mo fileng tsona di ne di le ngata ‘ho feta ka moo a ka di phetang.’ (Pes. 40:5) Empa ho ile ha etsahala hore Davida a lebale dintho tseo Jehova a mo fileng tsona. O ne a se a sa kgotsofalla dintho tseo a nang le tsona. Le hoja Davida a ne a e na le basadi ba bangata, o ile a ba meharo yaba o batla mosadi wa motho e mong. Mosadi eo e ne le Bathe-sheba mme monna wa hae e ne e le Uria Mohethe. Davida o ile a inahana boyena yaba o etsa thobalano le Bathe-sheba yaba Bathe-sheba o a ima. Davida ha a ka a etsa bohlola feela empa o ile a etsa hore Uria a bolawe. (2 Sam. 11:2-15) Davida o ne a nahanang? Na o ne a nahana hore Jehova ha a mmone? Mohlanka eo ya tshepahalang wa Jehova, o ile a wela lerabeng la ho ba meharo le ho inahana boyena yaba o ipakela mathata a mangata. Empa ha morao, Davida o ile a amohela phoso ya hae yaba o a baka. O ile a thaba haholo ha Jehova a mo tshwarela.—2 Sam. 12:7-13.
Ke Jwang re ka Mamelang Jehova, Hona Hobaneng?
15 Jehova ha a ka a kgetha Davida hore e be hlooho ya lelapa la hae feela empa le ya setjhaba sa Iseraele. Davida o ne a e na le matla a maholo ka ha e ne e le morena. Ka dinako tse ding o ne a sebedisa matla a hae hampe hoo a ileng a etsa diphoso tse tebileng. (2 Sam. 11:14, 15) Empa o ile a bontsha hore o mamela Jehova ka hore a amohele kgalemelo. O ile a rapela Jehova mme a mo bolella ka moo a ikutlwang ka teng, yaba o leka ka hohle ho mamela keletso ya hae. (Pes. 51:1-4) Hape o ile a bontsha boikokobetso ka hore ebe ha a ka a mamela keletso ya banna feela empa le ya basadi. (1 Sam. 19:11, 12; 25:32, 33) Davida o ile a ithuta diphosong tsa hae mme a etsa hore ntho ya bohlokwa bophelong ba hae, e be ho sebeletsa Jehova.
Dumella Melao le Melaomotheo ya Modimo Hore e Kwetlise Letswalo la Hao
7 Re a thaba hore ebe ha re hloke ho utlwa bohloko pele, e le hore re ithute dintho tsa bohlokwa tse ka Lentsweng la Modimo. Re ka ithuta ho tswa mehlaleng e ka Bibeleng ya batho ba ileng ba tlola molao wa Modimo. Liproverbia 1:5 e re: “Motho ya bohlale o tla mamela mme a amohele tayo e eketsehileng.” Ka sebele re fumana tataiso ya bohlokwa e tswang ho Modimo ha re bala le ho nahanisisa ka mehlala ya sebele e ka Bibeleng. Ka mohlala, nahana ka bohloko boo Morena Davida a ileng a bo utlwa ka mora hore a tlole molao wa Jehova ka ho etsa bofebe le Bathe-sheba. (2 Sam. 12:7-14) Ha re ntse re bala le ho nahanisisa ka tlaleho ena, re ka nna ra ipotsa: ‘Ebe Morena Davida a ka be a ile a qoba masisapelo a tlisitsweng ke ho etsa bofebe le Bathe-sheba jwang? Haeba le nna ke ne ke le boemong boo, na ebe ke ne ke tla ba sebete sa ho qoba ketso eo? Ebe ke ne ke tla baleha jwalo ka Josefa, kapa ke ne ke tla inehela jwalo ka Davida?’ (Gen. 39:11-15) Ha re hlahlobisisa ditlamorao tsa sebe, re ka ba sebete mme ra ‘hloya se sebe.’
Matlotlo a Patilweng
it-1-E 590 ¶1
Davida
Jehova o ile a bona seo Davida a ileng a se etsa mme o ile a senola ketso eo ya hae e nyonyehang. Haeba Jehova a ile a dumella hore taba ya Davida le Bathe-sheba e sebetswe ke baahlodi tlasa Molao wa Moshe, ka bobedi ba ka be ba ile ba bolawa hammoho le lesea le neng le so ka le tswalwa. (De 5:18; 22:22) Le ha ho le jwalo, Jehova o ile a sebetsa taba ya Davida ka boyena mme o ile a mo bontsha mohau ka lebaka la selekane sa Mmuso. (2Sa 7:11-16) Lebaka le leng e ne e le hobane Davida a ile a bontsha mohau ho ba bang. (1Sa 24:4-7; bapisa le Jak 2:13) Hape, Jehova o ile a bona hore ka bobedi ba ne ba baketse phoso ya bona. (Pes 51:1-4) Empa ba ile ba fumana kotlo. Jehova o ile a sebedisa moprofeta Nathane hore a re ho Davida: “Bona! ke o hlahisetsa tlokotsi ka tlung ya hao.”—2Sa 12:1-12.
LA 20-26 JUNE
MATLOTLO A TSWANG BIBELENG | 2 SAMUELE 13-14
“Amnone o Ile a ba le Mathata Hobane o ne a Itjhebile Boyena”
it-1-E 32
Absalome
Ho Bolawa ha Amnone. Amnone o ile a rata kgaitsedi ya hae Tamare hobane o ne a le motle. Amnone o ile a iketsa ekare o a kula mme a kopa hore Tamare e be yena ya mo tlisetsang dijo yaba o a mo beta. Amnone o ile a hloya Tamare ho feta ka moo a neng a mo rata ka teng ka hoo o ile a mo tebela. Tamare o ile a kopana le kgaitsedi ya hae Absalome ka mora hore a itshele ka molora hloohong le ho tabola seaparo sa hae se selelele sa ka hodimo se metsero, se neng se mo kgetholla e le morwetsana le moradi wa morena. Hanghang Absalome o ile a belaella Amnone ka ha o ne a hlokometse hore o ne a e na le maikutlo a lerato bakeng sa kgaitsedi ya hae. Absalome o ile a laela Tamare hore a se ke a bua ka taba ena mme a mo nka hore a ilo dula le yena.—2Sa 13:1-20.
Eba le Boitshwaro
11 Bibele e boetse e bua ka mohlala wa ba ileng ba hloleha ho bontsha boitshwaro tabeng ya ho etsa thobalano. E boetse e bua ka ditlamorao tse bohloko tseo ba ileng ba di fumana. Bohle ba tobaneng le teko e tshwanang le ya Kim, ba lokela ho nahanisisa ka tlaleho ya mohlankana ya hlokang boitshwaro, eo ho buuwang ka yena ho Liproverbia kgaolo ya 7. Ba ka boela ba nahana ka mohlala o mobe wa Amnone le ka ditlamorao tse bohloko tse ileng tsa mo hlahela. (2 Sam. 13:1, 2, 10-15, 28-32) Batswadi ba ka thusa bana ba bona ho ba le boitshwaro ha ba se ba ratana, mohlomong ka ho sebedisa ditlaleho tsa Bibele tseo re qetang ho bua ka tsona.
it-1-E 33 ¶1
Absalome
Ho ile ha feta dilemo tse pedi. Nakong ya ho kutwa ha dinku, Absalome o ile a etsa mokete Baale-hazore e dikhilomithara tse ka bang 22 ka borwa ho Jerusalema mme o ile a mema Davida le bara ba hae. Ha ntate wa hae a re a ke ke a kgona ho tla moketeng, Absalome o ile a mo kopa ka tiyo hore a romele mora wa hae wa letsibolo e leng Amnone bakeng sa hae. (Lipr 10:18) Ha mokete o ntse o tswela pele, Absalome o ile a laela bahlanka ba hae hore ha Amnone a ‘nyakaletse ke veine’ ba mo bolaye. Ha bara ba bang ba Davida ba kgutlela Jerusalema, Absalome o ile a balehela ho ntatemoholo wa hae wa Mosyria ya neng a le Geshure e neng e le ka botjhabela ho lewatle la Galilea. (2Sa 13:23-38) “Sabole” eo moprofeta Nathane a ileng a bua ka yona, e ne e kene “ntlong” ya Davida mme e ne e tla ba teng bophelo bohle ba hae.—2Sa 12:10.
Matlotlo a Patilweng
g05 1/8 24-25
Botle Boo e Hlileng e Leng Bona ba Bohlokwa
Ha ho bapiswa, nahana ka Absalome, mora e mong wa Davida. O ile a ipaka e le motho e mobe ho sa tsotellehe botle ba hae bo neng bo tsotwa. Bibele e re ka yena: “Jwale ha ho bapiswa le Absalome ho ne ho se monna e motle hakaalo Iseraele yohle hoo a roriswang haholo hakaalo. O ne a se na sekodi ho tloha bohatong ba leoto ho isa hara hlooho.” (2 Samuele 14:25) Le ha ho le jwalo, takatso ya Absalome ya bophahamo e ile ya mo susumelletsa hore e be lerabele le lwantshang ntata lona le ho nka puso ka dikgoka. O bile a beta direthe tsa ntatae. Ka lebaka leo, Modimo o ile a halefela Absalome mme a shwa ha bohloko.—2 Samuele 15:10-14; 16:13-22; 17:14; 18:9, 15.
Na o utlwa o kgahlwa ke Absalome? Le hanyenyane. Ha e le hantle, e ne e le motho eo batho ba sa mo rateng. Ponahalo ya hae e ntle ha ya ka ya kwahela boikakaso le ho se tshepahale ha hae, le ha e le hona hore e ile ya mo qobisa tlokotsi. Ka lehlakoreng le leng, Bibele e na le mehlala e mengata ya batho ba bohlale, ba ipiletsang bao ho seng letho le buuwang ka ponahalo ya bona. Ho hlakile hore hoo e neng e le ha bohlokwa e ne e le botle ba bona ba ka hare.
LA 27 JUNE–LA 3 JULY
MATLOTLO A TSWANG BIBELENG | 2 SAMUELE 15-17
“Absalome o Ile a Fetoha Lerabele Hobane a ne a Ikgohomosa”
it-1-E 860
Moetellipele
E ne e le ntho e tlwaelehileng ka botjhabela ho Asia hore dimathi di mathe ka pela koloi ya morena ho etsa bonnete ba hore dintho di maemong a matle, ho phatlalatsa hore morena o a tla le ho mo thusa ka dintho tseo a di hlokang. (1Sa 8:11) Absalome le Adonija ba marabele, ba ile ba latela tlwaelo ena e neng e etswa ke marena ka hore ba behe dimathi tse 50 hore di mathe ka pela dikoloi tsa bona e le hore ba ka hlomphuwa ke batho.—2Sa 15:1; 1Ma 1:5; sheba RUNNERS.
w12 7/15 13 ¶5
Sebeletsa Molimo ea Fanang ka Tokoloho
5 Bibele e na le mehlala e mengata ya batho ba ileng ba susumetsa ba bang hampe. Mohlala o mong o jwalo ke mora wa Morena Davida e leng Absalome. Absalome o ne a le sebopeho se setle ka tsela e ikgethang. Le ha ho le jwalo, ha nako e ntse e feta, jwalo ka Satane, o ile a itumella hore a be meharo mme a rate maemo ka ha o ile a tswela borena ba ntatae pelo le hoja a ne a se na tokelo ya ho ba morena. E le ha a leka ho inkela borena ka bolotsana, Absalome o ile a iketsa eka o tsotella setjhaba sa habo sa Baiseraele mme ka masene a fana ka maikutlo a hore morena yena ha a se tsotelle. Ka sebele, feela jwalo ka ha Diabolose a ile a etsa serapeng sa Edene, Absalome o ile a iketsa eka o tsotella batho ba bang, empa ka nako e tshwanang ka bokgopo a senya ntate wa hae lebitso.—2 Sam. 15:1-5.
it-1-E 1083-1084
Hebrone
Ka mora dilemo tse mmalwa, mora wa Davida Absalome, o ile a kgutlela Hebrone yaba o ntshetsa leano la hae pele la ho batla ho nkela ntate wa hae borena ka mahahapa. (2Sa 15:7-10) E ka nna yaba Absalome o ile a qala sena Hebrone hobane e ne e le moo a neng a hlahetse teng. Mohlomong lebaka le leng ke hobane e ne e kile ya eba motsemoholo wa Juda o tummeng. Hamorao setloholo sa Davida e leng Morena Roboame, o ile a tsosolosa motse wa Hebrone. (2Likr 11: 5-10) Ka mora hore Juda e etswe lesupi ke Bababylona le hore Bajuda ba kgutle botlamuweng, ba bang ba Bajuda ba ile ba dula Kiriathe-arba e Hebrone.—Ne 11:25.
Matlotlo a Patilweng
Na o na le Dintlha Kaofela?
11 Le rona ka dinako tse ding re ka tshwarwa ka leeme ka lebaka la batho ba hasang mashano ka rona. A re ke re ithuteng mohlaleng wa Morena Davida le Mefiboshethe. Davida o ile a ba mosa ho Mefiboshethe ka hore a mo kgutlisetse naha eo e neng e le ya ntatemoholo wa hae Saule. (2 Sam. 9:6, 7) Ha morao, o ile a utlwa tlaleho e mpe ka Mefiboshethe. Empa ha a ka a batlisisa hore na tlaleho eo ke nnete kapa tjhe. Ho e na le hoo, o ile a amoha Mefiboshethe thepa yohle ya hae. (2 Sam. 16:1-4) Davida o ile a lemoha phoso ya hae ka mora hore a bue le Mefiboshethe, yaba o mo buseletsa tse ding tsa dintho tseo a neng a mo amohile tsona. (2 Sam. 19:24-29) Davida a ka be a ile a qoba ho tshwara Mefiboshethe hampe haeba a ne a ile a batlisisa pele a etsa qeto hore na tlaleho eo a e utlwileng ke nnete kapa tjhe.