KGAOLO YA 48
Kgetha Metswalle Hantle
Metswalle ya rona e etsa hore re thabe ha ho le monate mme e a re kgothatsa ha ho le thata. Empa Bibele e a re lemosa hore ha se motho e mong le e mong eo e ka bang motswalle ya hantle. Ka hoo o ka kgetha metswalle e hantle jwang? Nahana ka dipotso tsena.
1. Metswalle eo o e kgethang e ka o ama jwang?
Hangata re qetella re na le mekgwa e tshwanang le ya batho bao re qetang nako le bona, ebang ke mekgwa e metle kapa e mebe. Ntho ena e ka etsahala le haeba re qeta nako e ngata re bua le bona inthaneteng. Bibele e re: “Ya tsamayang le batho ba bohlale o tla hlalefa, empa ya bang le ditshebedisano le ba hlokang kelello [e leng ba sa rateng Jehova] dintho di tla mo tsamaela hampe.” (Liproverbia 13:20) Haeba metswalle ya hao e rata Jehova ebile e mo sebeletsa, e ka o thusa hore o dule o mo rata o be o etse diqeto tse nepahetseng. Haeba metswalle ya hao e sa rate Jehova, e tla etsa hore le wena o se ke wa mo rata. Ha se feela Bibele e re kgothaletsang ho kgetha metswalle hantle. Haeba metswalle ya rona e le batho ba ratang Modimo, e ka re tswela molemo mme le rona re ka e thusa. Re tla kgona ho ‘tshedisana le ho hahana.’—1 Bathesalonika 5:11.
2. Jehova o tla ikutlwa jwang ka metswalle eo o e kgethang?
Jehova o kgetha metswalle hantle. “O na le kamano e haufiufi le ba lokileng.” (Liproverbia 3:32) Jehova o tla ikutlwa jwang haeba re kgetha batho ba sa mo rateng hore e be metswalle ya rona? O tla utlwa bohloko haholo. (Bala Jakobo 4:4.) Empa Jehova o tla thaba a be a re nke re le metswalle ya hae haeba re qoba ho tlwaelana le batho ba fosahetseng, re mo rata ebile re rata batho ba mo ratang.—Pesaleme ya 15:1-4.
ITHUTE DINTLHA TSE DING
Ithute hore na ke hobaneng ha e le habohlokwa hore re kgethe metswalle hantle le hore na o ka etsang hore o be le metswalle e tla o tswela molemo.
3. Hlokomela hore o se ke wa kgetha metswalle e fosahetseng
Batho ba sa rateng Modimo le melao ya hae ke metswalle e fosahetseng. Bapala VIDEO ebe le buisana ka potso e latelang.
Ke jwang re ka iphumanang re tlwaelana le batho ba fosahetseng re sa hlokomele?
Bala 1 Bakorinthe 15:33 ebe le buisana ka dipotso tsena:
Ke motho ya jwang eo e ke keng ya ba motswalle ya nepahetseng bakeng sa hao? Ke hobaneng ha o tjho jwalo?
Bala Pesaleme ya 119:63 ebe le buisana ka potso ena:
O lokela ho sheba eng ha o kgetha motswalle?
Apole e le nngwe e bodileng e ka bodisa tse ding. Ho ba le motswalle ya fosahetseng ho ka o ama jwang?
4. Batho ba sa tshwaneng le rona e ka ba metswalle e hantle
Bibele e re bolella ka banna ba babedi ba mehleng ya Iseraele e leng Davida le Jonathane. Ba ne ba fapane haholo ka dilemo le ka maemo empa e ile ya ba metswalle. Bala 1 Samuele 18:1 ebe le buisana ka potso ena:
Ke hobaneng ha re sa lokela ho kgetha dithaka tsa rona kapa batho ba boemong bo tshwanang le ba rona feela hore e be metswalle ya rona?
Bala Baroma 1:11, 12 ebe le buisana ka potso ena:
Metswalle e ratang Jehova e ka kgothatsana jwang?
Videong ena, bona hore na ke jwang motjha e mong a ileng a fumana metswalle moo a sa lebellang. Bapala VIDEO ebe le buisana ka dipotso tse latelang.
Videong ee, ke hobaneng ha batswadi ba Akil ba ne ba tshwenyehile ka metswalle ya hae ya sekolong?
Keng e entseng hore a batle ho ba motswalle wa bana bao?
Keng e ileng ya mo thusa hore a se ke a hlola a jewa ke bodutu?
5. O ka thuswa keng hore o be le metswalle e hantle?
Ithute hore na o ka fumana metswalle ya sebele jwang le hore na o ka etsang hore le wena o be motswalle wa sebele. Bapala VIDEO.
Bala Liproverbia 18:24 le 27:17 ebe le buisana ka dipotso tsena:
Metswalle ya nnete e thusana jwang?
Na o na le metswalle e jwalo? Haeba ha o na yona, o ka etsang hore o be le yona?
Bala Bafilipi 2:4 ebe le buisana ka potso ena:
O lokela ho ba motswalle wa nnete e le hore o fumane metswalle ya nnete. O ka etsang hore o be motswalle wa nnete?
E le hore o be le metswalle ya nnete, o lokela ho ba motswalle wa nnete
BATHO BA BANG BA RE: “Ho molemo ho kgetha mang le mang feela hore e be motswalle wa hao ho feta ho se be le metswalle ho hang.”
Wena o ka reng?
KAKARETSO
Haeba re kgetha metswalle hantle re tla thabisa Jehova mme ho etsa jwalo ho tla re tswela molemo.
Re Ithutileng?
Ke hobaneng ha e le taba ya bohlokwa ho Jehova hore na re kgetha metswalle e jwang?
Ke batho ba jwang bao o sa lokelang ho ba motswalle wa bona?
Ke jwang o ka bang le metswalle e nepahetseng?
BATLA
Bona hore na metswalle ya nnete e ka re thusa jwang ha ho le thata.
“Eba le Setswalle se Matla Pele Bofelo bo Fihla” (Tora ya ho Lebela, November 2019)
Ithute hore na o ka etsang e le hore o be le metswalle ya nnete.
O lokela ho tseba eng ka ho etsa metswalle inthaneteng?
Bala pale e nang le sehlooho se reng: “Ke ne ke Lakatsa ho ba le Ntate,” mme o hlokomele hore na keng e entseng hore ntate e mong a kgethe metswalle e meng.