SEHLOOHO SE KA NTLE | O KA ETSANG E LE HORE O NATEFELWE KE HO BALA BIBELE
O ka Etsang e le Hore o Thabele ho Bala Bibele?
O ikutlwa jwang ha o bala Bibele, o a boreha kapa o a natefelwa? Ho itshetlehile ka hore na o e bala jwang. Ha re ke re boneng hore na o ka etsang e le hore o thabele ho bala Bibele.
Sebedisa phetolelo e bonolo le e utlwahalang. Haeba o sebedisa phetolelo ya kgale, e nang le mantswe a thata, o ka nna wa se ke wa natefelwa ke ho bala Bibele. Kahoo bala Bibele eo ho leng bonolo ho e utlwisisa e le hore e ka o finyella pelo. O lokela ho etsa bonnete ba hore o sebedisa Bibele e fetoletsweng hantle le e nepahetseng.a
Sebedisa thekenoloji. Mehleng ena Bibele e se e fumaneha le disebedisweng tsa elektronike. O ka ipalla Bibele ithaneteng, wa e downloada khomputheng, tableteng kapa selefounung. Disebediswa tse ding tsa elektronike di ka o thusa ho fumana ditemana tse ding tse buang ka taba eo o ntseng o bala ka yona le ho bapisa le diphetolelo tse ding. Haeba o motho ya ratang ho mamela ho e na le ho bala, o ka nna wa mamela dikgatiso tsa mantswe tse rekotilweng tsa Bibele. Batho ba bangata ba thabela ho mamela ntho e itseng ha ba ntse ba tsamaya ka dipalangwang tsa setjhaba kapa ba etsa mesebetsi ya bona ya letsatsi le letsatsi. Ke hobaneng ha o sa sebedise e nngwe ya ditsela tsee?
Sebedisa dithulusi tsa ho ithuta Bibele. Dithulusi tsa ho ithuta Bibele di ka etsa hore o natefelwe ke ho e bala. Dimmapa tse bontshang dibaka tse ka Bibeleng di tla o thusa ho bona hore na sebaka seo o ntseng o bala ka sona se hokae. Ho na le dihlooho tse ding tse tshwanang le tse hlahileng makasineng ena, tse ka o thusang ho utlwisisa Bibele kapa o ka boela wa sheba websaeteng ho jw.org/sot tlasa “Dithuto Tsa Bibele.”
Sebelisa litsela tse ling. Haeba o bona eka ho bala Bibele ho thata, o ka leka mekgwa e meng e tla etsa hore e o natefele. Mohlomong o ka qala ka ho bala karolo eo o e ratang ka ho fetisisa. Haeba o batla ho ithuta ka batho ba tummeng ba ka Bibeleng, o ka kgetha a le mong eo o ka qalang ka yena. Ho entswe mehlala ya kamoo o ka etsang sena kateng lebokoseng le nang le sehlooho se reng “Tseba Batho Bao Bibele e Buang ka Bona.” Ho ka boela ha etsahala hore o batla ho tseba tatellano eo diketsahalo tse ka Bibeleng di etsahetseng ka yona. Ke hobaneng ha o sa leke o mong wa mekgwa ee?
a Batho ba bangata ba rata Phetolelo ea Lefatshe le Letjha ea Mangolo a Halalelang kaha e nepahetse hape e ngotswe ka tsela e bonolo. Phetolelo ena e hatisitswe ke Dipaki Tsa Jehova, ka dipuo tse fetang 130. O ka boela wa e downloada websaeteng ho jw.org/sot kapa wa downloada JW Library app. Haeba o batla, Dipaki Tsa Jehova di ka o tlisetsa Bibele moo o dulang.