Matsatsi a Tsebahalang Mokhatlong o Buellang ho Kopanngoa ha Malumeli
1844: Ho simolla ha mokhatlo o amanang le mekhatlo ea bolumeli o ileng oa hlahisa Mekhatlo ea Bokreste ea Bahlankana le Baroetsana.
1846: Seboka sa pele sa machaba sa Evangelical Alliance se amanang le mekhatlo e fapaneng ea bolumeli se ne se tšoaretsoe London, Engelane.
1908: Ho theoa Lekhotla le Kopaneng la Likereke tsa Kreste Amerika. Ka 1950 lekhotla lena le ile la fetoha Lekhotla la Lichaba la Likereke tsa Kreste United States of America.
1910: Seboka sa pele sa Lefatše sa Baromuoa se ne se tšoaretsoe Edinburgh, Scotland moo “ha e le hantle ho qalileng mokhatlo o buellang ho kopanngoa ha malumeli.”—Encyclopædia Britannica.
1919: Mopapa Benedict XV o ile a hana memo ea hore Kereke ea K’hatholike e nke karolo sebokeng hammoho le Kereke ea Episcopal ea Protestanta tabeng ea tumelo le taolo (ka liphapang tsa likereke tabeng ea thuto ea motheo le tšebeletso ea kereke).
1921: Ho theoa Lekhotla la Machaba la Baromuoa.
1925: Seboka sa pele sa machaba sa Lekhotla le Akaretsang la Bophelo le Mosebetsi (bakeng sa ho ithuta mekhoa e tšoanang ea kereke tabeng ea moruo, lipolotiki, le sechaba), se ne se tšoaretsoe Stockholm, Sweden.
1927: Seboka sa pele sa lefatše sa Mokhatlo oa “Tumelo le Taolo” tse amang likereke tse fapaneng se ne se tšoaretsoe Lausanne, Switzerland.
1928: Mopapa Pius XI o ile a ntša lengolo le akaretsang Mortalium animos, le thibelang Mak’hatholike ho tšehetsa mokhatlo o buellang ho kopanngoa ha malumeli.
1937: Seboka sa “Bophelo le Mosebetsi” se ne se tšoaretsoe Oxford, Engelane, le seboka sa “Tumelo le Taolo” se neng se tšoaretsoe Edinburgh, Scotland, li ile tsa lumela ho thea komiti ea nakoana bakeng sa ho thea lekhotla la lefatše la likereke. Mosebetsi ona o ile oa khutlisetsoa morao ka baka la ho qhoma ha Ntoa ea II ea Lefatše.
1948: WCC (World Council of Churches [Mokhatlo oa Lefatše oa Likereke]) o ile oa theoa sebokeng se neng se tšoaretsoe Amsterdam, Netherlands. Litho tsa ’ona li ne li kopanyelletsa likereke tsa Protestanta tse 150 le likereke tse ling tsa Orthodox ea Bochabela. Ho tloha nakong eo ka mehla Mokhatlo oa Lefatše oa Likereke o ’nile oa tšoara liboka tse akaretsang (1954: Evanston, Illinois, U.S.A.; 1961: New Delhi, India; 1968: Uppsala, Sweden; 1975: Nairobi, Kenya; 1983: Vancouver, Canada).
1960: Mopapa John XXIII o ile a hlomamisa Mokhatlo oa Baruti oa Ntšetso-pele ea Bonngoe ba Kereke Vatican. Lena ebile “lekhetlo la pele leo Kereke e K’hatholike e ileng ea lumella mokhatlo o buellang ho kopanngoa ha malumeli ka molao.”—Encyclopædia Britannica.
1961: Lekhotla la Machaba la Baromuoa le ile la kopana le Mokhatlo oa Lefatše oa Likereke. Vatican e ile ea simolla ho romela bahlanka ba ’muso libokeng tse akaretsang tsa Mokhatlo oa Lefatše oa Likereke.
1964: Mopapa Paul VI o ile a phatlalatsa Seboka sa Bobeli sa Vatican sa “Melao-motheo ea Bonngoe,” se neng se hlalosa meeli ea ho nka karolo ha K’hatholike mokhatlong o buellang ho kopanngoa ha malumeli.
1965: Mopapa le mobishopo oa Orthodox ba lumellana ho hlakola liketso tsa ho khaoloa tseo baeta-pele ba bona ba li entseng ka 1054.
1968: SODEPAX (Komiti e Kopaneng ea Sechaba, Tsoelo-pele, le Khotso) e ile ea theoa ke Vatican le Mokhatlo oa Lefatše oa Likereke.
1969: Mopapa Paul VI o ile a etela ntlo-khōlō ea lefatše ea Mokhatlo oa Lefatše oa Likereke, Geneva, Switzerland. Leha ho le joalo, o ile a hatisa hore ke eena mohlahlami oa moapostola Petrose le hore monye-nyetsi leha e le ofe mabapi le ho kopana ha Kereke e K’hatholike le Mokhatlo oa Lefatše oa Likereke ho ne ho tla etsahala pele ho nako e tloaelehileng.
1980: SODEPAX e ile ea felisoa.
1986: Mopapa John Paul II o ile a hlophisa seboka sa kereke sa “Letsatsi la Lefatše la ho Rapella Khotso” Assisi, Italy, moo baruti ba likereke ba emetseng malumeli a ka sehloohong a lefatše ba neng ba kopane bakeng sa ho rapella khotso ka mekhoa ea bona e fapaneng.