Lebaka Leo ka Lona U Lokelang ho Qoba ho Sebelisana le Meea
HAEBA u rutiloe hore mekhoa e itseng ea ho sebelisana le meea ke litsela tsa ho ikopanya le meea e molemo, u ka ’na ua makala ha u ithuta seo Bibele e se bolelang ka ho sebelisana le meea. Ka mohlala, e re: “Le se ke la khelohela ho ba bitsang bafu, leha e le ho linohe; le se ke la botsa litaba ho bona, le tle le se ke la itšela litšila ka bona.” (Mongolo o tšekaletseng ke oa rōna.)—Levitike 19:31; 20:6, 27.
Ha e le hantle, Bibele e hlalosa ea sebelisanang le meea e le ea “manyala ho Jehova.” (Deuteronoma 18:11, 12) Hobane’ng? Ho hlahloba ka hloko seo Bibele e se bolelang ka mofuta o mong o moholo oa ho sebelisana le meea— oo ho thoeng ke ho buisana le bafu—ho tla araba potso eo.
Na Bafu Baa Phela?
Ho fapana le seo batho ba bangata ba se nahanang, Lentsoe la Molimo, Bibele, le ruta hore ho ke ke ha etsahala hore batho ba buisane le baratuoa ba bona ba shoeleng. Hobane’ng? Taba ke hore haeba leha e le mang a buisana le bafu, ’nete e tla ba hore bafu baa phela. E tlameha e be ho na le karolo e itseng ea bona e pholohang lefu. Ba bang ba bolela hore moea o tsoela pele ho phela ha ’mele o shoa. Na seo ke ’nete?
Tlaleho ea Bibele ka pōpo ea motho e re: “Jehova Molimo a bōpa motho ka lerōle la lefatše, ’me a bululela linkong tsa hae phefumoloho ea ho phela, ’me motho ea e-ba moea o phelang.” (Genese 2:7, mongolo o tšekaletseng ke oa rōna.) Na see ha se senole hore motho ka boeena ke moea le hore ha a na moea o sa shoeng o phelang ka mor’a hore ’mele o shoe? Ha e le hantle, Mangolo a re: “Moea o etsang sebe ke oona o tla shoa.” (Ezekiele 18:4) “Ba utloang bona ba tseba hobane ba ea shoa, empa bafu ha ba tsebe letho leha le le leng, . . . nģalong ea bafu [lebitleng le tloaelehileng la motho]. . . ha ho sa le mosebetsi, leha e le morero kapa tsebo, kapa bohlale.”—Moeklesia 9:5, 10.
Ka hona, ho latela Bibele, moea hase ntho e pholohang lefu la ’mele le eo batho ba phelang ba ka buang le eona ka mor’a lefu. Mehlala e ’meli ea litsebi tse hlomphehang tsa Bibele tse fihletseng qeto ea hore moea oa shoa ke e latelang. Moruti oa thuto ea bolumeli oa Mocanada, Clark H. Pinnock o hlokometse: “Khopolo ena [ea hore moea oa motho ha o shoe] e susumelitse thuto ea bolumeli ka nako e telele haholo, empa hase thuto ea Bibele. Bibele ha e rute ka moea oa tlhaho o sa shoeng.” Ka tsela e tšoanang, setsebi sa Mobrithani, John R. W. Stott o itse: “Ho se shoe—hoo ha e le hantle e leng ho se khone ho timetsoa—ha moea, ke khopolo ea Bagerike eseng ea Bibele.”
Leha ho le joalo, batho ba fumana melaetsa le ho utloa mantsoe a bonahalang a e-tsoa ho bafu. Joale ke bo-mang ba buang?
Ho Buisanoa le Bo-mang?
Bibele e bolela hore motho ea sa bonahaleng oa moea o ile a sebelisa noha, feela joalokaha setsebi se ka etsa eka popi ea bua, ho buisana le mosali oa pele, Eva, ’me a etsa hore a be khahlanong le Molimo. (Genese 3:1-5) Bibele e bitsa motho enoa oa moea, kapa lengeloi, “noha ea pele, e bitsoang Diabolose le Satane, e khelosang lefatše kaofela leo ho ahiloeng ho lona.” (Tšenolo 12:9) Eena eo, e leng Satane, o ile a atleha ho eka mangeloi a mang hore a rabele. (Jude 6) Mangeloi ana a khopo a bitsoa bademona ’me ke lira tsa Molimo.
Bibele e bontša hore bademona ba na le matla a ho susumetsa batho. (Luka 8:26-34) Hase feela Molao oa Molimo o reng: “Ho se ke ha fumanoa ha eno motho . . . ea botsang balimo, le ngaka e reng ea porofeta, leha e le ea botsang bafu; hobane bohle ba etsang litaba tseo, ba manyala ho Jehova.” (Deuteronoma 18:10-12) Likotsi tsa ho hlokomoloha molao oo ke life?
Phihlelo ea sebele ea Morena Saule oa Iseraele ea boholo-holo e arabela potso eo. Ka lebaka la ho tšaba lira tsa hae, Morena Saule o ile a ea ho motho ea buisanang le meea. O ile a mo kōpa hore a mo teanye le moprofeta Samuele ea shoeleng. Ha Saule a utloa ha motho enoa ea sebelisanang le meea a hlalosa monna ea hōlileng, o ile a nahana hore pono eo e ne e le ea Samuele. ’Me Saule o ile a fumana molaetsa ofe? Iseraele e ne e tla neheloa matsohong a lira, ’me Saule le bara ba hae ba ne ba tla ba le “Samuele,” e leng se neng se bolela hore ba tla shoa. (1 Samuele 28:4-19) Molimo o ile a nka khato efe ka qeto ea Saule ea ho ea ho motho ea buisanang le meea? Mangolo aa re bolella: “Saule a shoa ka lebaka la ho se tšepahale ha hae . . . le ka lebaka la ho kōpa ea buisanang le meea hore a e botse.” (1 Likronike 10:13, NW) O ile a lefa habohloko hakaakang!
Ka ho tšoanang kajeno, ba amehang tšebelisanong le meea ba ipeha kotsing e khōlō. Bibele e lemosa hore ba ‘sebelisanang le meea’ ba tla ea ‘lefung la bobeli [kapa la ka ho sa feleng].’ (Tšenolo 21:8; 22:15) Joale, ka ho hlakileng tsela e bohlale le e pholosang bophelo ke ea ho qoba ho sebelisana le meea ka mefuta eohle ea hona.
Kamoo U ka Hanelang Meea e Mebe
Ho thoe’ng haeba u se u tšoasehile tšebelisanong le meea? Joale u tla be u etsa hantle ha u nka mehato e potlakileng ho itšireletsa le ho sireletsa lelapa la hao hore le se lematsoe ke meea e khopo. Mehato efe? Ho etsa mohlala: Motho o sireletsa lehae la hae le lelapa la hae joang hore le se hlaseloe ke likokoanyana tse lomang? Ka mor’a hore a li felise ka tlung, o ntša lintho tse hohelang likokoanyana tseo tse lomang ka tlung. O kiba moo ho peperaneng teng le ho tiisa mabota e le ho thibela likokoanyana tseo ho kena, ’me haeba seoa seo sa likokoanyana tse lomang se tsoela pele, a ka ’na a kōpa thuso ’musong sebakeng seo sa habo.
Se tšoanang se ka u thusa hore u hanele meea e khopo le ho itšoasolla ho eona. Nahana ka mohlala oa Bakreste ba lekholong la pele la lilemo ba Efese ba neng ba sebelisana le meea pele e e-ba Bakreste. Ka mor’a hore ba etse qeto ea ho itšoasolla tšebelisanong le meea, ba ile ba nka mehato e meraro ea ho itšireletsa litlhaselong tse kang tsa likokoanyana tse lomang tsa meea e khopo. Ba ile ba etsa eng?
Mohato oa Pele
Bibele ea hlalosa: “Ba bangata ba ba neng ba sebelisa tsebo ea boselamose ba tlisa libuka tsa bona hammoho ’me ba li chesa ka pel’a e mong le e mong.” (Liketso 19:19) Ka ho felisa libuka tseo tsa bona tsa bonohe, Bakreste bao ba bacha ba ile ba beha mohlala bakeng sa bohle ba ratang ho hanela meea e khopo kajeno. Tlosa lintho tsohle tse amanang le ho sebelisana le meea. Sena se tla kopanyelletsa libuka, limakasine, libuka tsa metlae, livideo, litšoantšo tse khōlō, boitsebiso ba elektronike bo tsamaisanang le ho sebelisana le meea le lirekoto tsa ’mino, hammoho le lithatho kapa lintho tse ling tse roaloang bakeng sa “tšireletso.”—Deuteronoma 7:25, 26; 1 Bakorinthe 10:21.
Monna e mong oa Amerika Boroa ea neng a ile a qoela tšebelisanong le meea ka lilemo tse mashome-shome o ile a nka keletso ena ea Mangolo ka ho teba. Oa hopola: “Ka letsatsi le leng ke ile ka bokella lintho tsohle tsa ka tsa meea ka pel’a ntlo ea ka, ka nka selepe ’me ka li etsa likotoana.” Eaba o chesa ntho e ’ngoe le e ’ngoe ho fihlela ho se na letho le setseng. Ka mor’a moo, o ile a hatela pele moeeng ’me kapele ea e-ba mosebeletsi ea chesehang phuthehong e ’ngoe ea Lipaki tsa Jehova.
Leha ho le joalo, mohato oo oa pele ha oa lekana. Hobane’ng? Bonneteng, esita le ka mor’a lilemo Bakreste bao ba Efese ba sentse libuka tsa bona tsa boselamose, moapostola Pauluse o ile a ngola: “Re na le ntoa . . . khahlanong le makhotla a moea a khopo.” (Baefese 6:12) Bademona ba ne ba sa tela. Ba ne ba ntse ba batla monyetla oa ho kena. Ke eng e ’ngoe eo ho neng ho hlokahala hore Bakreste bao ba e etse?
Mohato oa Bobeli
Pauluse o ile a khothatsa Baefese ba lekholong la pele la lilemo: “Aparang lihlomo tse feletseng tsa ntoa tse tsoang ho Molimo e le hore le ka khona ho ema le tiile khahlanong le liketso tse bolotsana tsa Diabolose.” (Baefese 6:11, NW, botlaaseng ba leqephe) Keletso eo e sa sebetsa le kajeno. Feela joaloka motho ea lekang ho felisa likokoanyana tse lomang lapeng la hae, Mokreste o lokela hore a tiise tšireletso ea hae e kang lebota e le hore a ka ba thōko le meea e khopo. Mohato oo oa bobeli o akarelletsa eng?
Pauluse oa hatisa: “Ka holim’a lintho tsohle, le nke thebe e khōlō ea tumelo, eo ka eona le tla khona ho tima metsu eohle e tukang ea ea khopo.” (Baefese 6:16) Thebe ena e hlokahala kahohle-hohle. Ha tumelo ea hao e tiile haholoanyane, u tla hanela meea e khopo ka tieo haholoanyane.—Matheu 17:20.
Joale u ka matlafatsa ho itšireletsa ha hao joang? Ka ho tsoela pele ho ithuta Bibele. Ke ka tsela efe thuto ea Bibele e amanang le tumelo? Bonneteng, feela joalokaha ho tiea ha lebota ho itšetlehile haholo ka matla a motheo, ho tiea ha tumelo ea motho ho itšetlehile haholo ka matla a motheo oa eona. Motheo oo ke eng?
Ke tsebo e nepahetseng ea Lentsoe la Molimo. Moapostola Pauluse oa hlalosa: “Tumelo e latela ntho e utloiloeng. Ntho e utloiloeng le eona e teng ka lentsoe le mabapi le Kreste.” (Baroma 10:17) U memeloa hore u kōpe thuto ea Bibele e sa lefelloeng ho e mong oa Lipaki tsa Jehova, ka nako le sebaka tse tla u lokela. Thuto e joalo e tla matlafatsa tumelo ea hao. (Baroma 1:11, 12; Bakolose 2:6, 7) Phello e tla ba efe? Ka potlako tumelo ea hao e tla ba lerako le tiileng le tla u sireletsa tšusumetsong ea meea e khopo.—Pesaleme ea 91:4; 1 Johanne 5:5.
Mohato oa boraro oo Bakreste bao ba Efese ba ileng ba lokela ho o nka ke ofe?
Mohato oa Boraro
Khale koana Efese, balumeli bao ba bacha ba ne ba nkile mehato ea ho hanela meea e khopo, empa Bakreste bao ba ne ba ntse ba phela motseng oo ho oona ho neng o atile bodemona. Ba ne ba hloka tšireletso e eketsehileng. Ka hona, ha moapostola Pauluse a ngolla balumeli-’moho le eena, o ile a ba bolella seo ba lokelang ho se etsa: ‘Ka mofuta o mong le o mong oa thapelo le thapeli le tsoele pele ho rapela ka nako e ’ngoe le e ’ngoe ka moea. ’Me ho finyella seo le lule le falimehile ka tiisetso eohle le ka thapeli molemong oa bahalaleli bohle.’—Baefese 6:18.
Ka sebele ho rapela ka matla le kamehla bakeng sa tšireletso ea Jehova e ne e le, e bile e sa le mohato o tiileng o hlokahalang bakeng sa ho itšireletsa meeeng e khopo. ’Me hoa khothatsa ho tseba hore Jehova o tla arabela thapeli ea hao e tsoang pelong ka ho u sireletsa, le hona ho u fa tšehetso ea mangeloi a hae. (Pesaleme ea 34:7; 91:2, 3, 11, 14; 145:19) Ka hona, ke habohlokoa haholo ho phehella ho rapela Molimo, “U re lopolle ho ea khopo.”—Matheu 6:13; 1 Johanne 5:18, 19.
Antônio, eo pele a neng a buisana le meea Brazil, o ile a ananela bohlokoa ba thapelo. Ka mor’a hore a amohele thuto ea Bibele ’me a ithute lebitso la Molimo, Jehova, o ile a qala ho rapela Jehova Molimo ka matla hore a mo thuse ho itšoasolla tšebelisanong le meea. Ha a hetla morao, o re: “Ho rapela Jehova ho ipakile e le setšabelo sa ka le sa ba bang ba bangata ba neng ba entsoe makhoba ke meea e mebe nakong e fetileng.”—Liproverbia 18:10.
U Ka Atleha
Ke habohlokoa hore u behe tšepo eohle ea hao ho Jehova ka mor’a hore u mo tsebe, u ipehe tlas’a bobusi ba hae le ho mamela litaelo tsa hae. Haeba u etsa sena, ha u kōpa hore a u thuse, u sebelisa lebitso la hae, o tla u sireletsa. Antônio o ile a fumana tšireletso e joalo. Kajeno ke moholo oa Mokreste phuthehong e ’ngoe ea Lipaki tsa Jehova e São Paulo ’me o ananela hore ebe o ile a fumana ’nete e ileng ea mo lokolla.—Johanne 8:32.
Joaloka Antônio le ba bang ba likete ba neng ba sebelisana le meea pele empa ba se ba sebeletsa Jehova Molimo hona joale, u ka atleha ho itšoasolla ho sebelisaneng le meea. Ka hona, lahla lintho tsohle tse amanang le ho sebelisana le meea, matlafatsa tumelo ea hao ka ho ithuta Bibele le ho rapella tšireletso ea Jehova. Latela mehato ena—bophelo ba hao bo itšetlehile ka eona!
[Ntlha e Qolotsoeng e leqepheng la 5]
Ho latela Bibele, ba phelang ba ke ke ba buisana le bafu
[Setšoantšo se leqepheng la 6]
1. Tlosa lintho tsohle tse amanang le tšebelisano le meea
[Setšoantšo se leqepheng la 7]
2. Tsoela pele ho ithuta Bibele
[Setšoantšo se leqepheng la 8]
3. Rapela ka matla le kamehla