Matloana a Majabajaba a Istanbul

● Likarolong tse ngata tsa lefatše, motho a ka bona matloana a linonyana a entsoeng ka lehong. Ke libaka tse loketseng tseo linonyana li jellang ho tsona, li iphuthumatsang, li behelang, li hōlisetsang malinyane le ho itšireletsa liphoofolong tse li jang le maemong a mabe a leholimo. Istanbul, matloana a linonyana a entsoe hore a shebahale joaloka mehaho e meholo. A mang a tšoana le matlo a maholo a majabajaba; a mang a tšoana le matlo a thapelo a Mamosleme, kapa matlo a boreneng.a A tsejoa ka hore ke matloana a majabajaba a maeba, a linonyana le a lirobele.

Matloana a khale ka ho fetisisa ke a lekholong la bo15 la lilemo, ’me a hahiloe ho latela mehaho ea mehleng ea ’Muso oa Maottoman. Matloana ana a linonyana ke mehaho feela e itekanetseng, empa ho qala lekholong la bo18 la lilemo, ho ile ha hahoa a maholo le a majabajaba. A mang a ne a e-na le likotlolo tse tšelang lijo le metsi, litselana esita le mathule ao linonyana li ka emang ho ’ona, joalokaha eka li boha sebaka. Hangata matloana ana a linonyana a ne a hahoa ka lehlakoreng la mohaho le shebileng letsatsing le bileng le sireletsehileng moeeng—moo a ke keng a fihleloa ke likatse, lintja le batho. Ka linako tse ling matloana ana a ne a sa haheloe linonyana hakaalo empa a ne a haheloa ho khabisa mehaho e le karolo ea moetso oa eona. Motho a ka bona matloana ana a linonyana mahlakoreng a matlo a thapelo a Mamosleme, a maholo le a manyenyane, hammoho le lilibeng tsa sechaba, lilaebraring, marokhong le matlong a batho.

Ka masoabi, matloana a mangata a linonyana a sentsoe ke ho pepesehela maemo a mabe a leholimo, ha a mang ’ona a sentsoe ka boomo ke batho ba neng ba sa hlokomele bohlokoa ba ’ona. Matloana ana a linonyana a ntse a fokotseha. Leha ho le joalo, haeba u etela Istanbul ’me u rata mehaho ea khale, leka ho sheba matloana ana a haheletsoeng ka hloko marulelong. Kaha joale ua a tseba, u tla thabela leeto la hao motseng oo ha u bona matloana ana a majabajaba.

[Mongolo o botlaaseng ba leqephe]