Seno se Ratoang sa Mexico

● Ha bahlōli ba Masepanishe ba fihla Mexico mathoasong a lekholo la bo16 la lilemo, a ile a latsoa seno sa moo se bitsoang pulque, se entsoeng ka lero le lomositsoeng la lekhala la Amerika. Joaloka biri, pulque ha e na tahi e ngata. E boetse e na le liprotheine tse tsoang limeleng, lik’habohaedreite, livithamine le liminerale, kahoo libakeng tse ngata e sebelisetsoa ho matlafatsa ’mele.

Kaha Masepanishe a ne a tloaetse ho noa seno se tahang nakong ea lijo, ka potlako a ile a qala ho ntlafatsa lero la lekhala la Amerika e le hore a etse seno se seng se matlanyana se bitsoang mescal. Seno sena ke sona se ileng sa etsoa pele ho tequila e tsejoang kajeno. Mehleng ena, ho na le baetsi ba bangata haholo ba tequila Mexico, ’me ba etsa lilithara tse fetang limilione tse 189 ka selemo, ebe karolo ea 40 lekholong ea tsona e romeloa linaheng tse ling.

Lirapa tsa lekhala le leputsoa la Amerika, e leng mofuta oa likhahla o nang le makhasi a matenya a tletseng lero, li fumaneha lihlabeng tse ommeng tse ka bophirimela bo hare Mexico, profinseng ea Jalisco e haufi le toropo ea Tequila, e leng eo seno sena se reheletsoeng ka eona.a Lekhala la Amerika le nka lilemo tse 12 ho hōla, ’me le monya liminerale tse ngata nakong eo. Ha semela seo se kotuloa, ho tlosoa makhasi a sona a hlabang, ebe ho sala pelo ea sona e bōpehileng joaloka phaenapole e bitsoang piña. E ka ba boima ba lik’hilograma tse 50 ’me e na le lero le lengata. Ho hlokahala hoo e ka bang lik’hilograma tse supileng tsa piñas e le hore ho etsoe lithara e le ’ngoe ea tequila.

Mamexico a mangata a thabela ho noa tequila e le joalo, e tsamaea le letsoai le selae sa lime (tholoana e kang sirilamunu). Batho ba tsoang linaheng tse ling bona ba tloaetse ho noa margarita e nang le tequila, e tsoakileng le lero la lime le la joala bo entsoeng ka lero la lamunu, e tšetsoeng leqhoa ebe e noelloa ka mohopeng o nang le letsoai molomong.b Kaha e rekisetsoa linaha tse ka bang 90, ke ka nepo linaheng tse ling tequila e bitsoang seno se ratoang sa Mexico.

[Mongolo o botlaaseng ba leqephe]