TSA MONA LE MANE

United States

Phuputsong e ’ngoe, ho ile ha hlokomeloa hore motho a le mong ho ba bararo ba tsamaeang ka maoto o tšela tseleng e phetheselang a sa falimeha—hobane a mametse ’mino, a bua founong kapa a etsa lintho tse ling tse joalo. Ntho e kotsi ka ho fetisisa e neng e ba sitisa ho falimeha ke ho ngola melaetsa ea selefouno. Ba neng ba ngola melaetsa ha ba tšela ba ne ba lieha ho feta ba falimehileng ’me ba ne ba ka ’na ba tšela roboto e koetse, ba tšela sebakeng se sa lokelang kapa ba tšela ba sa sheba mahlakore ka bobeli.

Nigeria

Basali ba isoang Europe ka bolotsana ke batho ba hoebang ka batho, ba qobelloa ho ikana hore ba tla boloka lekunutu litempelaneng tsa boloi tsa juju. E le hore basali bana ba lumele ho sebelisoa e le makhoba a thobalano batho ba hoebang ka batho ba ba tšosa ka hore meea e tla ba otla.

Spain

Batho ba sa sebetseng ba ka etsang liphesente tse hlano ho ea ho tse leshome ha ba kenye mangolo a univesithi le a tsebo ea bona ea mosebetsi likōpong tsa bona tsa mosebetsi hobane a etsa hore ba bonahale ba rutehile ho feta tekano.

Lefatše

Ho nkoa hore mosi o tsoang lipaoleng ke oona o ka sehloohong o bolaeang batho linaheng tse tsoelang pele, moo batho ba limilione li ’nè ba shoang selemo le selemo ba bolaoa ke mafu a matšoafo. Bafuputsi ba re ho na le lik’hemik’hale tse chefu tse tsoang lipaoleng tsa patsi kapa tsa mashala ’me mosi ona o chefu joaloka mosi oa sakerete.